2 Sãmwɛlle 7 - SEBR SÕNGO

Bãngd a Natã

¹ Dĩma waa n kẽ-la a yi-paalẽ n na n zĩndi, tɩ Soaala-Wẽnd kõ-a-la vʋʋsgo la b fãag-a-la a bɛɛba fãa sẽn da gũbg-a wã nusẽ.

² Dẽ la a yeel bãngd a Natã: «Gese, mam kẽeda roogo sẽn maan ne ra-sĩdma, tɩ kuga walsa koglg yaool n be zãnd sẽn ti ne pɛɛl tẽngre.»

³ T'a Natã leok dĩma: «Aya! Bɩ y maan y sũur sẽn dat bũmb ning fãa, tɩ b bee ne yãmba.»

⁴ Badaar yʋngo, Naaba-Wẽnd leoka bãngda a Natã gomd kãngã:

⁵ «Kẽng n tɩ togs m tʋʋm-tʋmda a Daviid tɩ Soaala-Wẽnd koɛɛg la woto: ‹Yaa foom n na n me roogo n kõ-m tɩ m kẽ bɩ?

⁶ M pa bao roogo m sẽn yiis Israyɛl kamba Ezipt tẽnga n tãag rũnna. Kẽna kẽname tɩ m be sɛk roogẽ, zãnd tẽngre.

⁷ Mam sẽn tũ a Israyɛl kamba zĩig ning fãa, m yeel-b tɩ bũmbu? M goma ne a Israyɛl naaba a bõe, nanams niyns m sẽn kõ noor tɩ kɩɩm m bãgre, a Israyɛlã? Dĩm bʋg la m yeel yã: Bõe tɩ y pa kẽes-m doog pʋg sẽn maneg n ka ne kʋgs ra-sidma?›

⁸ Marsã, tɩ yeel m tʋʋm-tʋmda a Daviid: Ad Tãnsoaba-Wẽnd sẽn yet bũmb ninga. Yaa maam n tɩ yiis foom pʋ-weesẽ, f sẽn waa n pʋgd f rũmsi, n bool-f tɩ f wa yɩ m buud a Israyɛl dĩma.

⁹ Fo sẽn kẽng zĩig ning fãa, mam da bee ne foom; mam kʋ-la f bɛɛba fãa f taoore. Mam kɩtame tɩ fo yʋʋr yi n zʋʋg tẽng zug nanams bɛda fãa yʋʋr sẽn yitã.

¹⁰ Mam kõ-la m buud a Israyɛl zĩig t'a zĩndi; m na n vigla yẽnda be, t'a kɩ yẽgna, n kell n pa a zĩigẽ la nin-wẽnsã kõn le yaal-a wa pĩnd ye,

¹¹ wala m sẽn waa n kõ m buud a Israyɛl bʋ-kaoodb tɩ b ges a yelle. Mam kõ-f-la vʋʋsgo, n fãag-f ne f bɛɛbã. La mam meng n togsd foo tɩ m na n yalga f buudu.

¹² F yõor sã n wa ta a tɛka, tɩ fo sak f saam-dãmba, mam na zẽk f kamb, fo poorẽ, m na zẽk biig f sẽn doge. M na n zaoolg-a-la naam goeel sẽn vigl kẽnkẽ zugu.

¹³ La yaa yẽ n na n me roogo, mam yʋʋr pẽgr yĩnga. La mam na viglg a naam zaoore t'a ra le vik ye.

¹⁴ Mam na n yɩ-la a ba, la a na n yɩɩ mam biiga. A sã n maan wẽnga, mam na sɩbg-a ne gʋlgo la gʋlga na n yɩɩ ninsaalba.

¹⁵ La m kõn yiis m barka a zug, wala m sẽn yãk a Sol barka, la dig-a n yiis fo taoora ye.

¹⁶ Fo roogo la f rĩunga na kaoose, a kõn sɛ ye; f zaoorã na n viglame la a kõn vik abada.»

¹⁷ Bãngda a Natã n tɩ togsa dĩma a Daviid Soaala-Wẽnd likrã la b koeesa fãa.

A Daviid pʋʋsgo

¹⁸ La a Daviid kẽng n tɩ pʋʋsa Soaala-Wẽnd la a yeela b taoore: «Mam yaa ãnna, Soaala-Wẽnde? La mam buud zema bõe, tɩ yãmb zẽk mam n ta zĩig ninga m sẽn beẽ wã?

¹⁹ La yãmb gesa rẽnda n yet tɩ paooda, Soaala-Wẽnde; yãmb kãaba m roog neer la neere, n pʋlem-a noog ti nan ket n zãra.

²⁰ Bõe la a Daviid tõe n togs yãmb n paase? Yãmb mi-m lame, Soaala,

²¹ yãmb gomd yĩnga, la y sũur daab yĩnga, yãmb maana yel-kãsense la y sak n wilga y tʋʋm-tʋmdã.

²² Yãmb waooga, Soaala-Wẽnde! Sẽn wẽnda yãmb ka be ye! La Wẽnnaam a to me ka be, sã n pa yãmba, wala d tʋb sẽn wʋmde.

²³ Buud a ye bee tẽng zugu, sẽn wẽnd yãmb buudu, sẽn wẽnd a Israyɛl bɩ? Wẽnnaam sẽn wa n fãag a Israyɛl, n kɩt t'a lebg bãmb pʋɩɩre, n kɩt t'a yʋʋr yi, b maana a yĩnga, a tẽnga yĩnga, wẽnd-makr dãmba la bõn-bãna, n dig nin-zẽmba ne b wẽn-naandse n yiis a Israyɛl taoore.

²⁴ Yãmb vigla y buudu, a Israyɛl, t'a yɩ yãmb soolem daar fãa; la yãmba, Soaala, yãmb lebga a Israyɛl Wẽnnaam.

²⁵ Marsã yãmb sẽn kãab y tʋʋm-tʋmda bũmb ningã, y sẽn pʋlem a rooga bũmb ningã, bɩ y sõng tɩ y gomda pids daar fãa, la y sak n maan wala y sẽn yeele.

²⁶ Bɩ yãmb yʋʋr paam pẽgre daar fãa! Wẽnd na kɩt tɩ b yeele: Dũni fãa Soaala, la a Israyɛl Wẽnnaam! Wẽnd na kɩt tɩ yãmb tʋʋm-tʋmda roog paam pãng yãmb taoore!

²⁷ Sɩd yaa yãmb menga, la dũni fãa Soaala la a Israyɛl Wẽnnaam. Yaa yãmb n vẽneg y meng ne yãmb tʋʋm-tʋmda a Daviid, n yeele: Mam na n mee roogo n kõ-fo! Yaa gom kãnga n keng mam pɛlga, tɩ mam saag n pʋʋs yãmb woto.

²⁸ La marsã, Soaala-Wẽnde, yãmb la Wẽnde, la yãmb goama fãa yaa sɩd bala, la yaa yãmb n wilgd yãmb tʋʋm-tʋmda kiba noogã.

²⁹ Bɩ y sak n ning yãmb tʋʋm-tʋmda yir barka, t'a kell n kaoos yãmb taoor daar fãa! Tɩ yaa yãmba, Soaala-Wẽnde, n gome, la y kãabg yĩnga, yãmb tʋʋm-tʋmda roog na n paama bark zamaan fãa.»