2 Sãmwɛlle 5 - SEBR SÕNGO

A Daviid lebga Israyɛl me dĩma

¹ Wẽnd kãnga Israyɛl sagsã fãa wa a Daviid nengẽ Ebrõ. B yeel-a lame: «Ade, tõnd yaa f buudu la f rooga neba.

² Pĩnda, a Sol sẽn da waa n ya tõnd dĩma, yaa foom n da talld Israyɛl kamba n kẽnd tãpo la f le talld-ba n watẽ. Soaala-Wẽnd yeela foom: ‹Foom n na n yɩ m buud a Israyɛl ba-wubdga, foom n na n yɩ a Israyɛl dĩma.› »

³ La woto, a Israyɛl nin-kẽemba waa dĩma a Daviid nengẽ Ebrõ. La dĩma a Daviid yõga zood ne bãmba, Ebrõ, Soaala-Wẽnd taoore. B pʋdga a Daviid zug naam kaam, t'a lebg a Israyɛl dĩma.

⁴ A Daviid da tara yʋʋm pis-tã, a sẽn waa n na dɩ naam. A rɩɩ naam yʋʋm pis-naase.

⁵ A rɩɩ Zɩɩda naam, Ebrõ, yʋʋm a yopoe la kiis a yoobe n dɩ Zɩɩda la a Israyɛl fãa naam Zerizalɛɛm, yʋʋm pis-tã la a tã.

A Daviid kẽeda Zerizalɛɛm

⁶ La Dĩma ne a tãb-biisa waa n taka zabr Zerizalɛɛm ne Zebuzitsa sẽn da be tẽn-kãnga. Sɩda tẽnga rãmb yeela a Daviid: «Yãmb naoor sẽn wat n na n tabg ka tɩ ya zoeense la wobs la y na n pĩngd goabg la rɩtgo.» Bãmb da rat n yeelame t'a Daviid kõn tol n kẽ be lɛ-lɛ.

⁷ La a Daviid zabame n deeg Siõ tãnsoaben-doogo; dẽ n lebg a Daviid na-tẽnga.

⁸ Baraare a Daviid yeelame: «Ned sã n dat n kẽ Zebuzitsa tẽnga a maanda sɩlem b bas zoeensa la wobsa pĩngr yɩnga n tũ bok ning b sẽn wedg n na n wa ne kooma tẽnga pʋga.» A Daviid sẽn kis wa fãa-la woabg la zoanga. Yaa rẽ yĩnga la b yeta: «Wobs la zoeense pa tar zĩig Wẽnd zakẽ ye.»

⁹ A Daviid kẽe tãnsoben-dooga pʋga, n bool-a t'a Daviid na-tẽnga. La a mee lalg n gilgi, n sɩng Milo n digd pʋgẽ.

¹⁰ A Daviid pãng da tara paasgo daar fãa tɩ Tãnsoaba-Wẽnd ra bee ne yẽnda.

¹¹ A Iram, Tir dĩma tʋma a Daviid tʋʋm-tʋmdba ne ra sĩdma la da-wãadba la kug-peesdba, tɩ b me roogo n kõ a Daviid.

¹² A Daviid bãngame tɩ Soaala-Wẽnd n da paasd a naama keelem, t'a yɩ a Israyɛl dĩma, la b zẽk a rĩungu, bãmb buud a Israyɛl yĩnga.

A Daviid kamba

¹³ A Daviid sẽn yi Ebrõ, n ta Zerizalɛɛm, a le kẽesa pagba. A le roga kom-dibli la kom-pugli.

¹⁴ Ad kamb niyns sẽn dog Zerizalɛɛma yʋya: a Samua, a Sobab, a Natã, a Salomo.

¹⁵ A Yivar, a Elisuwa, a Nefɛg, a Yafiya.

¹⁶ A Elisama, a Elyada, a Elifelɛt.

A Daviid ne Filisti rãmb zabre

¹⁷ Filisti rãmba sẽn wʋm tɩ b taaga a Daviid kaam t'a yɩ Israyɛl dĩma, b rʋʋsa tãpo n na n yõk-a. A Daviid sẽn wʋm boto, a zoeeme n tɩ kẽ tãnsoaben-doogã.

¹⁸ Filisti rãmba, taa Refayitsa tãnnaokã, n tong b tãb-biisã.

¹⁹ A Daviid soka Wẽnde: «M tõe n zaba ne Filisti rãmbã la y na n ning-b-la mam nugẽ bɩ?» La Soaala-Wẽnd leoka a Daviid: «Zab ne-ba! Vẽenega m na n ninga Filisti rãmbã f nugẽ!»

²⁰ Dẽ la a Daviid tees Baal-Perasim, la zĩ-kãnga a tõoga Filisti rãmba; la a yeelame: «Naaba-Wẽnd bɛɛga m bɛɛba lalga, wala koom sẽn kaoog bɛongo.» Yaa rẽ la b boond zĩ-kãnga tɩ Baal-Perasim.

²¹ Filisti rãmba ra zoe n basa b wẽnd dãmba, la a Daviid ne a neba wʋk-b lame.

²² Filisti rãmb le rʋʋsa tãpo Refayim tãnnaokẽ wã.

²³ A Daviid soka Soaala-Wẽnde la b leok-a lame: «Da tees b taoore n sɩng zabr ye. Gilg b poorẽ pargen-tuudẽ wã.

²⁴ Fo sã n wa wʋm nao rãamde, pargensa zutu, maan gũusgu, tɩ yaa Soaala-Wẽnd n lʋɩt f taoore n na pãb Filisti rãmba.»

²⁵ A Daviid maana wala Soaala-Wẽnd sẽn da kõ a noore, la a tõoga Filisti rãmba, Gezɛr tẽnga noorẽ.