2 Sãmwɛlle 4 - SEBR SÕNGO

A Isbaal kʋʋbo

¹ A Sol biiga a Isbaal wʋmame t'a Abnɛr ki Ebrõ, t'a yɛɛse, tɩ Israyɛl tõr sũur sãame.

² A Sol kamba zakẽ, nin-daad la bi-bees a yiibu n da be be. A ye yʋʋr a Baana, a yiib soaba a Rekab. B ra ya Beerot rao a Rimõ kamba, a Bẽnzame roogẽ, tɩ bala b geta Beerot me wala a Bẽnzame soolem.

³ Beerot neba ra zoeeme n wa kẽ Gitayim, la b keta be n ta rũnna n lebg be noakense.

⁴ A Sol biig a Zonatã da tara a biig a yembre, la a karsa ra fabame. A ra tara yʋʋm a nu, a Sol ne a Zonatã kʋʋra sẽn yɩ Zizreyɛl n wa, a ma wubdga põk-a lame n na n zoe, la zoeesa sẽn yɩ ne yãgb bala, biiga fʋrg n lʋɩɩme t'a kars sãame.

⁵ Beerot rao, a Rimõ, kamb a yiibã, a Rekab ne a Baana, waa n yika wĩnto-sʋka n kẽng a Isbaal yiri wa b na n tɩ sika koodo. B kẽeme n mik t'a kẽe vʋʋsgo.

⁶ B sẽn ta woto n mik t'a gãe a gãag zugu, a ro-gãagẽ b kõs a pʋʋrã.

⁷ B sẽn kʋ-a woto, a Rekab ne a Baana fiuuga a zugã n zoe n looge. B teesa Zʋrdẽ bãg-faaga la b kẽna yʋnga tõre.

⁸ B talla a Isbaal zugã n wa a Daviid taoore, Ebrõ, la b yeela dĩma: «Ad-a Sol biiga a Isbaal zugu, yãmb bɛyã sẽn da rat y yõore. Soaala-Wẽnd saka rũnna tɩ d soaala la d dĩma paam n dok a sũur ne a Sol la a buudu.»

⁹ La a Daviid goma ne Beerot Rimõ kambã, a Rekab ne a yao a Baana, n yeel-ba: «Bas-y tɩ m wẽen ne Wẽnd sẽn vɩ la sẽn yiisd maam toog buud fãa pʋgẽ wã la m yeel-y woto:

¹⁰ Sẽn da wa-a n togs maam a Sol kũuma, ra tẽeme t'a waa ne koe noogo, la mam kɩtame tɩ b yõk-a n kʋ Siklag, n yao a koe noogã.

¹¹ M maanda wãn marsã ne bi-bees sẽn kʋ nin-tɩrga a zak pʋgẽ, rẽ yẽne me a gãag zugu! M pa tog n sok sẽn daag-b zɩɩma la m kɩt tɩ b menem dũniya sɩda?»

¹² A Daviid kõ-la a neba noor tɩ b kʋ-ba. B kʋʋsa b nus la b nao n lul-b Ebrõ ko-baoora sɛɛga. La b rɩka a Isbaal zugã, n tɩ mum a Abnɛr yaoogẽ, Ebrõ tẽnga.