2 Sãmwɛlle 24 - SEBR SÕNGO

Buuda sõadga

¹ Soaala-Wẽnd sũur le puuga ne Israyɛl dãmba, tɩ b na n tus a Daviid t'a maan bũmb sẽn na n wa ne b bõne. Soaala ninga a Daviid yamẽ t'a sõd Israyɛl ne a Zɩɩda.

² Dẽ la dĩma yeel a tãnsoab a Zoab sẽn da be ne-a wã: «Saag Israyɛl tẽnsa fãa, n sɩng Dã n ta Beerseba, la sõd neba tɩ m bãng b sõore.»

³ A Zoab leoka dĩma: «Wẽnd na kɩt tɩ y neba sõor paas naoor koabga, tɩ y ket n vɩ ne yõore, la bõe la m zu-soaba dat ne sõadga woto?»

⁴ A Zoab ne tãnsoaben-dãmba yãeeme tɩ dĩma raab ka tõe n ka pids ye, la b loogame n na n tɩ sõd Israyɛl nebã.

⁵ B rʋʋga Zʋrdẽ n wẽ b sik Aroɛr, tẽng ning sẽn be Gad kʋɩl-bɛɛga sudga nug rɩtgo, Yazɛr sẽnẽ.

⁶ B kẽname n wa ta Galaad la b kẽe Ititsa tẽnga sẽn boond tɩ Kadɛs, n yi be n ta Dã, n gõdg n tees Sidõ.

⁷ B taa Tir tãnsoaben-doogã, n kẽ Ivitsa ne Kanaã rãmba soolem, n wa ta Zɩɩda Negɛb, Beerseba.

⁸ B sẽn saag tẽn-peelma n sɛ b leba Zerizalɛɛm, b kiis a wɛ la rasem pisi yĩnga.

⁹ A Zoab wilga dĩma b sẽn sõd nebã n paam sõor ninga: Israyɛl neba ra yaa tãb-biis tus kobs-nii sẽn tõe n bob sʋʋga. Zɩɩda yaa tus kobs-nu.

A Daviid sɩbgre

¹⁰ Dẽ poore a Daviid sũur kiuusame, a sẽn maan sõadga yĩnga la a yeela Soaala: «M beega wʋsgo! Sak-y n kõ-m sugri tɩ y yamba maana gãeemd mengã.»

¹¹ Beoog ne a na n vẽeg tɩ Soaala-Wẽnd da zoe n wilga b koe-kãnga a Gad, bãngd a ye sẽn da be a Daviid sɛɛgẽ n taasd-a Soaala-Wẽnd koeesã:

¹² «Tɩ yeel a Daviid: Yaa woto la m gomd ne foo: sɩbgr buud a tã la m tõe n sɩbg-fo. Yãk f sẽn date, tɩ m na tũ f raabo.» Vẽkembeoogo, a Daviid sẽn neke,

¹³ a Gad kẽnga a nengẽ, n tɩ toags-a. A yeela woto: «F ratame n yãend kom f tẽnga pʋgẽ yʋʋm a tã, bɩ f ratame n zoe f bɛ taoor kiis a tã, bɩ f ratame tɩ tẽn-kũum lʋɩ tẽnga rasem a tãabo? Marsã, tagse la f kõ-m koɛɛg ning m sẽn na n tɩ leok sẽn tʋm-a maama.»

¹⁴ A Daviid leoka a Gad: «M ka mi m sẽn na n leok bũmb ninga tɩ m zĩi ne yɩɩre. La ade, d lʋɩ Naaba-Wẽnd nugẽ tɩ b nimbãan-zoeer waooga. D da lʋɩ ninsaalb nugẽ ye!»

¹⁵ Woto wã yaa bãag sẽn wat ne kũum la Soaala-Wẽnd fẽeg tẽnga, yibeoog kãng n ta ra-yɩten-daare, la neba sẽn ki Dã n ta Beerseba, yɩɩ tus pisopoe.

¹⁶ Malɛka zẽka a nug n na n wã Zerizalɛɛm, la Naaba-Wẽnd lebsa b noore, n yeel tẽn-kũuma malɛkã: «Sekame. Yõbg f nugu.» Malɛkã ra bee Zebuze rao a Aravna zɛɛgẽ.

¹⁷ A Daviid sẽn yãe tɩ malɛk n wa ne bã-longdma a yeela Naaba-Wẽnde: «Yaa maam n beege, yaa maam n maan wẽnga, la nin-bãmba, zãma wã, b maana bõe? Bɩ y sɩbg maam ne m zaka bala.»

Maan-kugr meebo

¹⁸ Badaare a Gad taa a Daviid nengẽ n yeel-a: «Kẽng n tɩ me maan-kugr Zebuze raoa, a Aravna zɛɛgẽ wã.»

¹⁹ A Daviid kẽnga wala a Gad sẽn wilg-a, la wala yẽ me sẽn deeg Soaala nengẽ.

²⁰ A Aravna yãee dĩma ne a tãnsoaben-dãmba tɩ b wat a nengẽ. A Aravna waa n yĩgimda dĩma taoore, n kɩ a neng tẽnga.

²¹ N yeele: «Yaa bõe tɩ m dĩma, m zu-soaba wat a yamba nengẽ?» T'a Daviid yeele: «M dat n daa f zɛɛgã n me maan-kugr m Soaala yĩnga. Woto bãaga na zãag ne tẽngã.»

²² A Aravna leoka a Daviid: «Bɩ m zu-soaba deeg zɛɛgã n kʋ b sẽn date. Ad-m niisã, maoonga yĩnga. Ad-m kũura raado n paas raoogo ning sẽn palgd nag koodsa yublã.

²³ Y yamba dɩkda rẽ fãa n kõt a dĩma.» La a paasame: «Wẽnd na reeg y kosgo!»

²⁴ Dĩma leokame: «Bada! M dat n daame. M pa rat n kõ Soaala maoongo n pa tol n yiis m toorẽ bũmb ye.» A Daviid daa zɛɛga la niisã, wakɩ koeems pis-nu.

²⁵ Zĩ-kãnga a Daviid mee maan-kugri Soaala yĩnga. A kʋʋ yũ-nood la laafi kosg maando. Soaala-Wẽnd kũma tẽnga rãmb nimbãanega la bãaga zãaga ne a Israyɛl.