2 Sãmwɛlle 23 - SEBR SÕNGO

A Daviid yaoolem koeese

¹ Ad-a Daviid yaoolem koeese: A Zese biiga, a Daviid n na n gome, yaa nin-kãsenga n na n gome, a Zakoob Wẽnda sẽn kõ a soab naama koɛɛga la y na n kelge, a Israyɛl yɩɩn-nooda soab koɛɛga, la y na n kelge,

² Wẽnd sẽn pʋdg a soab bãngrã n na n gome bãmb zĩigẽ la a noor na n gome.

³ A Zakoob Wẽnnaam yeel-m lame, a Israyɛl Pĩiga togs-m lame: Ned ning sẽn dɩta naam ne zemsgo, sẽn dɩta naam la a zoet Wẽnd nifu,

⁴ wẽnda yibeoog vẽenem, sõor pukr wakato, sawat sẽn ka be raare. Saag niime n yooge, tɩ wĩndga yãngd ne moodã, mood sẽn nan yit paalem.

⁵ N-ye! M zaka yɛsa wɩla Wẽnd taoore, la rẽ yaa b sẽn yõg zood ne maama, b zood sẽn ka be sɛɛbã, b zood sẽn yals neere, n ka mi kɩllgã. Sẽn ya wakat ning fãa, maam n maand raoodo, m daaba pita wakat buud fãa.

⁶ Wẽnem-naaba tãb-biisi wẽnda we-raoogẽ gõaaga, ka bũmb sẽn na wʋk n pĩ yãoog ye,

⁷ kãasda ne kutu la kãn-tʋbre, koondame n gil n wẽneg n yõoge.

A Daviid gãndaado

⁸ Ad-a Daviid gãndaado: A Isbaal, Akmonitga la gãnda-bɛd a tãaba tãnsoaba. B ra boond-a-la yɛsa: Adino Esnitga. A dɩka a kãnde n kʋ neb kobs-nii, zĩig pʋgẽ bala.

⁹ Sẽn pʋgda, yaa a Dodo biig, a Elazar. A Elazar yaa Aoyitga. A yɩɩ tãb-biis a tãaba nin-yende, tãb-biis niyns sẽn da yãagd a Daviid a sẽn waa n baood Filisti rãmba noorã, Filisti rãmba sẽn waa n tong zabre, n yɛs-b taoorã. A Israyɛl tãb-biisa basa raoodo, n kong n zoe.

¹⁰ A Elazar tedga ne Filisti rãmbã n tar kɛɛbo al t'a nuga sẽn sog sʋʋga wa ki n ka le tõe n puk ye. Baraare, ne Soaala-Wẽnd sõngre, yɩɩ kʋʋb tɛka. Tãb-biisa lɛɛg n waame n na n zɛ teeda bala.

¹¹ Gãndaoog ning sẽn le pʋgdã, yɩ-la a Sama; yẽ yaa Araritga, a Age biiga. Filisti rãmba da tigma taab Leyi tẽnga. B ra bee bɛng pʋʋgẽ; a Israyɛl zoe-la b taoore.

¹² La yẽ tɩ yalsa pʋʋga tẽnsʋka, n dig bɛɛbã n deeg pʋʋgã. Yɩɩ tõogr kãseng la a Israyɛl tõog a bɛɛba ne Soaala sõngre.

¹³ Daar a ye, tigsg wakato, neb a tãabo n yi gãndaad pis-tã wã sʋka n wa yãend a Daviid, Adulam tãn-bokẽ wã. Dẽ tɩ Filisti rãmba wẽe b sik Refayim dãmba tãnga sigdgẽ.

¹⁴ A Daviid da be-la a zabr kõn-ling-m doogẽ, tɩ Filisti rãmba be Bɛtelyɛɛm.

¹⁵ A Daviid waa n yik n yãbda ko-yũudu la a sokame: «Ãnda n na n wa kõm-m koom tɩ m yũ, ko-baoor ning sẽn be Bɛtelyɛɛm noorã kooma?»

¹⁶ Dẽ la gãndaad a tãabã wẽdg n kẽ Filisti rãmba sika, n tɩ toog kooma n wa kɩs a Daviid. A Daviid pa tʋlg n yũ ye. A rɩk-a lame n bas Soaala-Wẽnd taoore.

¹⁷ A yeelame: «Soaala-Wẽnd na laas-m ne ko-kãnga yũubu. M sã n yũ, yaa zɩɩm la m yũ yã, sẽn bas-b vɩɩma taale n kẽng n tɩ bao kooma zɩɩm la m yũyã.» A sɩd zãgsa yũubu. Gãndaad a tãab kãensa me sẽn tʋm la woto.

¹⁸ Sẽn ket n pʋgd yaa a Abisayi, a Seruya biiga, la a Zoab saam-biiga. Yẽ me ra yaa gãndaad pis-tã wã nin-yende. Yẽ me zẽka a kãn-dibg raar a ye, neb kobs-tã zugu la a kʋ-b lame. A yʋʋr yii gãndaad pis-tã wã sʋka,

¹⁹ a yʋʋr yiime, n yɩɩg a taaba. A tol n wa lebga b naaba. A gãndalsma sẽn pa yɩɩg yaa tãnsoaben-dãmb bɛd a tãaba rẽnda.

²⁰ Sẽn le tʋma gãndalsem tʋʋm ka tɛka, yaa a Benaya. A ba yaa a Zoyada; a yaa tãb-biig a ye sẽn pid ne sũ-keelem yagenga. A tẽng yaa Kabseyɛl. Yẽ n kʋ Moab Ariyɛl dãmb a yiibã. Yẽ n sig loangẽ, saag sẽn yɛdg a zom maas daare, n kʋ bõnyẽega.

²¹ A le kʋʋ nin-daoog a ye sẽn ya Ezipt neda. Ezipt daoã da tara kãnde; yẽ seg-a-la ne dasaar bala, n deeg a kãndã n wẽneg n kʋ-a ne rẽ.

²² A Zoyada biig a Benaya me sẽn tʋm la woto. Dẽ me la a yʋʋr yi tãb-biis pis-tã wã sʋka.

²³ La a yʋʋr yii wʋsgo gãndaad pis-tã wã sʋka. Yẽ me gãndalsem sẽn pa kolge yaa tãnsoaben-dãmb bɛda a tãaba rẽnda. A Daviid kɩtame t'a lebg a meng gũudba taoor soaba.

Gãndaad pis-tã wã sõadga

²⁴ A Asayɛl, a Zoab saam-biiga, a Elana, Bɛtelyɛɛm Dodo biiga,

²⁵ a Sama, Arod tẽnga, a Elika, Arod tẽnga,

²⁶ a Eles, Pelɛt tẽnga, a Ira, Tekoa rao a Ikɛs biiga,

²⁷ a Abiyezer, Anatot tẽnga, a Mebunayi, Usa tẽnga,

²⁸ a Salmon, Aoya tẽnga, a Marayi, Netofa tẽnga,

²⁹ a Eleb, Netofa Baana biiga, a Itayi, a Ribayi biiga, Gibea sẽn be Bẽnzame tẽn-peelmẽ,

³⁰ a Benaya, Piratõ tẽnga, a Idayi, Gaas kʋɩl-beesẽ,

³¹ a Abiyalbõ, Bɛt-Araba tẽnga, a Azmavɛt, Bawurim tẽnga,

³² a Eliyaba, Saalbõ rao a Yasen biig a ye, a Zonatã,

³³ a Sama, Arar tẽnga, a Ayiyam, a Sarar biiga, Arar tẽnga,

³⁴ a Elifelɛt, a Aasbayi biiga, Maaka rao a ye yagenga, a Eliyam, a Ayitofɛl biiga, Gilo tẽnga,

³⁵ a Esrayi, Karmɛl tẽnga a Paarayi, Arabga,

³⁶ a Igal, a Natã biiga, Soba raoa, a Bani, a Gad roogẽ,

³⁷ a Selɛk, Amonitga, a Narayi, Beerot tẽnga, a Seruya biig. a Zoab zab-teeda tʋkda,

³⁸ a Ira, a Yetɛr sakẽ, a Gareb, a Yetɛr sakẽ,

³⁹ a Uri n baasde. Yẽ yaa Ititga. B fãa gill yaa pis-tã la a yopoe.