2 Sãmwɛlle 22 - SEBR SÕNGO

A Daviid yɩɩlle

¹ Soaala-Wẽnd sẽn fãag a Daviid a Sol la bɛɛb a taab nusẽ, a yɩɩla yɩɩn kãnga:

² Soaala la m pĩiga, m soondg zĩiga, bãmb la m fãagda.

³ B yaa pĩig n ligind maam, bãmb la m gãongo, m raood zab teoogo, bãmb la m põasg zĩiga, m soondg roogo, bãmb n fãagd-m nin-toosa nusẽ.

⁴ Bɩ b soog pẽgre! M Sẽn bool Soaalã, m tõoga m bɛɛba.

⁵ Kũuma kʋɩl-bɛɛga tigsa a ko-beedo la maam la a da rat n dɩ bala. Wẽnem-naaba sũu tãpo, la a ling-m lame.

⁶ Sẽn dat-b maam ne kɩɩm-kulga naaga taaba n wẽ-m gũbri, b gãnega bẽdgo m taoore.

⁷ M boola m Soaala m yɩɩra pʋgẽ, m Soaala la m tees n kelem. B zĩnda b ro-sõnga pʋga n wʋm m koɛɛga. M kɛlenga lʋɩ-la b tʋbrẽ.

⁸ Tẽnga yɛɛsame n sɩng miuungu; Soaala basa b sũura t'a yiki la ba yĩngr teeda kẽna lɛbla.

⁹ Bug-zõos n yi b yõorẽ tɩ bug-walem yi b noorẽ, n paas bug-saan-moama.

¹⁰ B laka yĩngri n ges b sẽn na n sigẽ. B sẽn tabg sawadg taoko,

¹¹ malɛk la b zomb n yɩke, bãmb yĩnga sobga yɛdga a pɩgsa.

¹² Lik la b rɩk n gũbg b menga, wa roogo, n yit sawadgo n kẽed sawadg taokẽ.

¹³ Vẽenem n yãg b taoore, bug-saala bugum yãngame.

¹⁴ Yĩngr-Soaala zĩnda b zĩigẽ n tãse, yaa al yĩngri la b koɛɛga sãd yã.

¹⁵ B pɛɛma tãooda wɛɛla, saaga yãgdame n sẽegd-b.

¹⁶ Mogra gãag pukdame n dɩga, dũni wã sẽn zao bũmb ninga zuga likda vẽenemẽ, Soaala sã n tãs b tãsgã, b sã n tĩs tɩ pemsma yi b yõorẽ.

¹⁷ Bãmb n zĩnd yĩngri n tʋm tɩ b yaag-ma, n yaag-m ko fõtmẽ wã.

¹⁸ B fãag-m-la m bɛ-gãndaooga nusẽ, b fãag-m-la pãng sẽn yɩɩd maama soab nusẽ.

¹⁹ Bɛɛba pʋg-m-la m zu-beed daare, la Soaala yɩ-la m teegre.

²⁰ B wa n gaag-m lame n yiis tɩ pemsem wẽed-m; b fãag-m lame tɩ b nong-m lame.

²¹ Soaala geta m sõmblem, b geta m pʋ-peelma n dond-ma.

²² M pa zãag ne m Soaala sor ye, m ka yɛ ne Soaala pʋgb ye.

²³ B noya ka yi m pʋtẽerẽ ye, m pa kẽn n kẽ moog ye.

²⁴ M wa-la b taoor ne m pʋ-peelma zãnga, m zãaga m meng ne wẽng la beegr buud fãa.

²⁵ Soaala dol-m-la m sõmblem wala b nif sẽn yãende.

²⁶ Ned sã n ka bas Soaala, bãmb me ka basd a soab ye. Taal sã n ka f zugu, bãmb me kõn ning-f taal ye.

²⁷ Bãmb n dond pʋ-peelem, la b demsd sẽn kedbe.

²⁸ Buud ning sẽn da kong pãngã n maand raoodo. Yãmb getame la y sãbsd zẽk-m-meng soaba.

²⁹ Yãmb la m fitila, Soaala, yãmb n vẽnegd m lika.

³⁰ Y sõng-m lame tɩ m gãndg bog zulunga, n sõng-m tɩ m kal lalg sẽn zãnde.

³¹ Soaala sor ka tar goaleng ye, Soaala ka gomd tɩ ka pids ye, sẽn teega bãmb paama a gãongo.

³² Ãnda la Wẽnde, sã n ka Soaala, ãnda la pĩiga, sã n ka tõnd Wẽndã?

³³ Bãmb la m tãnsoaben-doogo bãmb n kɩt tɩ m vɩɩm ka tar kegre ye.

³⁴ B kõ-m-la wals karse b kõ-m-la nao sẽn gãensd pĩisi.

³⁵ Bãmb n wilg m nuga sʋʋg zãabo, bãmb n kõ m kang pãnga t'a rõosd kut tãpo.

³⁶ Bãmb n kõ maam b fãagre gãongo, b nonglma ne maam zẽkda m zugu.

³⁷ M kẽnd pa tadgd ye, m nao ka mi yaams ye.

³⁸ M pʋga m bɛɛba n kʋ-ba a yeyn-ye, m pa lebd m poorẽ tɩ m ka baas-b zãng ye.

³⁹ M baas-b lame, m beds-b lame la b kõn le yik ye, b fãa gill lʋɩɩ sasa, ba a ye kõn le yiki tɩ m naoor tabga b sʋka.

⁴⁰ Y kõ-m-la zabr pãnga, m zabd-n-taasa fãa sura m taoore.

⁴¹ Y tẽega m nug tɩ m gãd b kãare, m menes-b-la zãnga.

⁴² B kelemdame, la fãagd ka ye. B bõsda Soaala la leokr ka ye,

⁴³ tɩ m na neem-ba wala tom, m fẽt-b-la wala b sẽn fẽt begdo.

⁴⁴ Y fãag-m-la ne m tẽnga rãmb zaba, y lʋɩɩs-m-la bu-zẽmba taoore, m sẽn da ka mi buud ninga lebga m yamba.

⁴⁵ Sãamb wat n baooda m yel-sõmde. M sẽn yaag m noor bal la b sẽn gõmsde.

⁴⁶ Bu-zẽna konga pãng n dʋʋgdẽ; b yi-la b roogẽ tɩ b wẽneg n dig-b n yõge.

⁴⁷ Bɩ Soaala-Wẽnd kell n soog pẽgre! B yʋʋr paam pẽgre! M pĩiga sõng-m lame tɩ m maan raoodo.

⁴⁸ Bãmb n sõngd-m tɩ m dokd m sũuri, bãmb n sulgd m bɛɛba m taoore.

⁴⁹ Bãmb n fãagd-m m bɛɛba nusẽ, bãmb n kõt-m pãnga, tɩ m maand daood ne m bɛɛba bãmb n deegd-m nin-toosa nusẽ.

⁵⁰ Dẽ me la m pẽgd Soaala, Adem biisa sʋka! Ad-m sẽn yɩɩn n pẽgd b yʋʋre.

⁵¹ Bãmb maasem yĩnga, dĩma tara a bɛɛba nombo, Soaala pa yi b sẽn kõ a soab naama poorẽ ye, b bee ne a Daviid, ne a yagensã, zamaan ne zamaana!