2 Sãmwɛlle 21 - SEBR SÕNGO

A Sol roog wãabo

¹ A Daviid zamaanẽ, kom n zĩndi, n kaoos yʋʋma a tã. T'a Daviid ta Naaba-Wẽnd taoore n soke. Tɩ b leok-a: «Yaa a Sol ne a roog rãmba n wa ne yellã, bãmb sẽn kɩt tɩ b kʋ Gabaõ neba n dɩt b zɩɩma raagr taale.»

² Dĩma boola Gabaõ rãmba n gom ne-ba. Gabaõ rãmba da ka a Israyɛl buud ye, bãmb da yaa Amoritsa yagense. A Israyɛl ra kãabame t'a na maan zood ne bãmba. Ne rẽ fãa, a Sol wa n yik n dat n menes-b-la Israyɛl la Zɩɩda sʋka.

³ A Daviid soka Gabaõ rãmba, «Bõe la d tõe n maan yãmb yĩnga? La bõe la d dɩkd n kos sugri, n paam tɩ yel-beeda zãag ne Soaala-Wẽnd buudã?»

⁴ Gabaõ rãmb leokame: «Tõnd ne a Sol sʋka, la a buuda sʋka, ka ligdi, ka sãnem bɩ wanzurf yell ye; ka yõor yiisg Israyɛl pʋgẽ yell ye.»

⁵ La dĩma sok-b lame: «Bõe la y rata tɩ m maan yãmb yĩnga?» Tɩ b leok dĩma: «A Sol yũu tõnd zɩɩm la a da ratame n sãam la a menes tõnd, a Israyɛl soolma fãa pʋgẽ.

⁶ Woto wã bɩ y yãk neb a yopoe, a kamba sʋka n kõ-do, tɩ d luul-b Soaala-Wẽnd taoore Gibea, Naaba-Wẽnd sẽn da tũus a soaba tẽngẽ.» Tɩ dĩma yeel ba: «M na bao-ba n ning y nugẽ.»

⁷ Dĩma pa kɩs a Sol yagenga, a Zonatã biiga a Mefibaal ye, a Daviid ne a Zonatã sẽn da yõg zood ne taaba yĩnga.

⁸ La dĩma reega a Sol kamb a yiibu, a Armoni la a Mefibosɛt. Bãmb ma la a Sol pag a Rispa, a Aya biiga. Le paasa a Mikal kamb a nu. A Mikal yaa a Sol bi-pugla, la kamb a nu wã ba yaa a Adriyɛl, a Barzilayi biiga, Abɛl-Meola raoa.

⁹ A Daviid ning-b-la Gabaõ kamba nugẽ, tɩ b reeg-ba, n tɩ luul-b tãnga zugu, Soaala-Wẽnd taoore. B naaga taab bãmb b yopoe wã fãa n ki. Yɩɩ alkam kɛgenga wʋrb sɩngr daare, a pipi raare, la b kʋ-ba.

¹⁰ A Rispa, a Aya bi-pugla, rɩka sũ-pa-noang fuugu, n lud-b pĩiga zugu, tigsgu sɩngre wakato al tɩ ta saag niibu la a riga yĩngri luiili wĩntoogo, tɩ b ra pẽneg kũuma ye; a diga we-rũmsã me yʋngo.

¹¹ B tɩ togsa a Daviid a Sol paga a Rispa, a Aya biiga, sẽn maan bũmb ningã.

¹² A Daviid tɩ reega a Sol ne a biiga a Zonatã kõaba, Yabɛs-Galaad neba nengẽ, tɩ bãmb n da tɩ zu-ba, Bɛt-Seã tẽnga, Filisti rãmba sẽn da tall-ba n tɩ luul zĩig ningã, bãmb sẽn wa n tõog a Sol ne a Zonatã, Gilboa tãmsẽ.

¹³ Dĩma tɩ rɩka a Sol kõaba beenẽ, n paas a Zonatã kõaba, la b wʋka sẽn da luul b rãmba me yĩnsi.

¹⁴ B muma a Sol ne a biiga a Zonatã kõaba, Sela tẽnga, a Bẽnzame tẽn-peelmẽ. Yɩ-la a Sol ba, a Kis, yaoogẽ. La b maana dĩma sẽn da kõ noor tɩ b maana fãa. Dẽ poore, Soaala-Wẽnd sũur maaga ne tẽngã.

Zabr ne Filisti rãmba

¹⁵ Zabra a yembre n le yiki Filisti rãmba ne Israyɛl sʋka. A Daviid tik n yika ne a tãb-biisi n tɩ zab ne Filisti rãmba. A Daviid waa n yɛɛme.

¹⁶ La wakat kãng la a Isebi-Benob, a Arafa yagenga, yik n baood n na n kʋ a Daviid. A zab-teeda fãa ra yaa paala. A kãnda zũuda zɩslma taa tor-bila.

¹⁷ La a Seruya biiga, a Abisayi wudg n wa-la a Daviid sõngre. A wẽe Filisti raoã n kʋ. La a Daviid neba zemsa taaba n na n yeele: «Daviid, fo pa na n le tũ tõnd n kẽng zabr ye, t'a Israyɛl fitila bugum na n wa kii zãnga.»

¹⁸ Rẽnda loogre poore, zabr n le yik Gob tẽng ne Filisti rãmba la yaa be me la Usa rao a Sibkayi kʋ a Saf, a Arafa yagenga.

¹⁹ Zabre le yika Gob tẽng yɛsa ne Filisti rãmba, la be, Bɛtelyɛɛm dao a Yari biig a Elana kʋʋ Gat dao a Goliyat. Nin-kãng kãnda raoog da zema koeer-bõanga.

²⁰ Zabra a to n le zĩnd Gat tẽnga, tɩ nin-wobg a ye zĩnd be, t'a nug fãa ra yaa nus-bi a yoobe la a naoor fãa da tara nao-bi a yoobe. Sẽn naag taaba, nus-bi la nao-bi yaa pisi la a naase. Yẽnda me ra yaa a Arafa yagenga.

²¹ A sẽn da baood Israyɛl noor yĩnga, a Zonatã, kʋ-a lame. A Zonatã ba la a Sama la a Sama yaa a Daviid ba-biiga.

²² Nin-daad a naasa fãa yaa a Arafa yagens sẽn dog Gat, la b fãa ki-la a Daviid ne a tãb-biisa nugẽ.