2 Sãmwɛlle 20 - SEBR SÕNGO

A Seba zẽkda a zugu

¹ Nin-yaalg a ye n da be n yaa a Bẽnzame roog neda. Yaa a Bikri biiga, a Seba. A waa n peeba baorgo n yeele: «Tõnd pa tar pʋɩɩr ne a Daviid ye, tõnd ka tar bũmbu a Zese biiga nengẽ ye! Bɩ Israyɛl biig fãa leba a roogẽ!»

² Israyɛl neba fãa basa a Daviid, n pʋg a Bikri biiga, a Seba. Zɩɩda neba bala n pʋg b dĩma, a Daviid, n yãag-a Zʋrdẽ kʋɩlga n tãag Zerizalɛɛm.

³ A Daviid lebg n kula a yir, Zerizalɛɛm. Dĩma ra basa b pagb piig tɩ b gũ na-yirã. A kɩtame tɩ b peeg-ba n tɩ ning zak sẽn tar gũuda. A kɩtame tɩ b ges b yelle, la a pa tol n le kolg-b ye. N tãag b yõor tɛka, b paa wala pʋg-kõapa, tɩ b sɩd yaool n ket n vɩ.

A Zoab kʋʋda a Amasa

⁴ Dĩma yeela a Amasa: «Bool Zɩɩda tãb-biisa fãa; la m gũud-y-la ka ne ra-tãta.»

⁵ A Amasa rɩka sore n na n saa n bool Zɩɩda tãb-biisã la a kaoosame n loog a Daviid sẽn da kõ-a daar ningã.

⁶ Dẽ la a Daviid yeel a Abisayi: «Marsã wã a Bikri biiga a Seba wẽnem ne tõnd yɩɩda a Absalom. Bɩ f yiis tãb-biis niyns sẽn gũud f zu-soaba yõorã tɩ y gɩdg-a t'a ra wa paam n ta tẽn-bɛdã sẽn me lals n gũbgã, n paam n põs ye.»

⁷ A Zoab ne Krɛt rãmba, Pelɛt rãmba ne gãndaada fãa yik n pʋga a Abisayi n na n kẽng zabrã. B yii Zerizalɛɛm n na n babs a Bikri biiga, a Seba.

⁸ B sẽn wa n kolg Gabaõ pĩ-kẽengã, la a Amasa paam n naag bãmba. A Zoab da yera a tãnsoben-futu, n sẽbg sʋʋga a sɛɛgẽ. Sʋʋga wõog n lʋɩɩme, t'a sulg n dɩk-a ne a goabga.

⁹ A Zoab soka a Amasa: «F keemame, m saam-biiga!» La ne a rɩtgo, a gãda a Amasa toɛɛnga n na n mok-a.

¹⁰ A Amasa pa maan gũusgu ne sʋʋgã a Zoab sẽn da zãad a nugẽ wã ye. A Zoab kõsa a Amasa pʋgã, t'a yãada yʋʋl tẽnga. A pa yãee n kõs n yɩlme la a Amasa kiime. Dẽ poore a Zoab ne a yao, a Abisayi, kell n diga a Bikri biiga a Seba.

¹¹ A Zoab tãb-biig a ye ra yɛsa a Amasa sɛɛgẽ la a yetẽ: «Ned ning sẽn nonga a Zoab la a be a Daviid poorẽ fãa, bɩ a pʋg a Zoab.»

¹² A Amasa ra bilma a meng a zɩɩmẽ sora pʋga. Daoa sẽn yãe tɩ neba fãa sã n ta a sɛɛgẽ, b ra yalsdame wã, vuug-a lame n kẽes pʋʋgẽ n bas sorã la pil-a-la fuugu.

¹³ A sẽn yiis a Amasa sora zugu n sɛ tɛka, neba pʋga a Zoab n na n dig a Bikri biiga, a Seba.

¹⁴ A Zoab zoe n saaga Israyɛl rooga sak-saka al n ta Abɛl Bɛt-Maaka ne a tẽn-toose. Berit dãmba sũu taaba n kẽ a Zoab tãpẽ.

¹⁵ A Zoab ne a tãb-biisa yẽda a Seba tẽn-kãng pʋga. B wa n zãma tãnd wa lalga n gũbg Abɛl Bɛt-Maaka tẽnga n paam n kolg lalgã n paam n sʋg-a n tus n lubi.

¹⁶ Pʋg-yẽesenga a yembre zĩnda tẽnga pʋgẽ lalga sɛɛgẽ, n zẽk a koɛɛga n yeele: «Kelg-y yã, kelg-y yã! Bɩ y yeel a Zoab: Kolg ka tɩ m dat n goma ne foo.»

¹⁷ A kolgame tɩ paga sok-a: «Yaa foo la a Zoab bɩ?» T'a yeele: «Yaa maam!» Tɩ paga yeele: «Kelg-y m gomde.» T'a leoke: «M kelgdame!»

¹⁸ Paga goma woto: «Pĩnd rãmb ra mi n yetame: ‹Koɛɛg ta Abɛl a ta-la a tɛka!›

¹⁹ Israyɛl ka, ned ka be n pʋgd laafi la sɩd wa maam ye. Fo yẽ sẽn baoode yaa tẽn-tõr wãabo, Israyɛl na-tẽng wãabo. Yaa bõe tɩ yãmb rat n menes Soaala-Wẽnd sẽn kõ tõnd d pʋɩɩre?»

²⁰ A Zoab leokame: «Abada ne abada bila! M pa rat n menese bɩ n sarem ye.

²¹ Pa rẽ gomd ye, yaa Efrayim tẽng daoa a Bikri biiga, a Seba, n yik n yet tɩ yẽ pa le pʋgd dĩma ye, t'a pa le pʋgd a Daviid ye. Yãmb sã n kõ tõnd yẽnda bala mam kɩtdame tɩ d yik n bas y tẽnga wãabo.» Paga yeela a Zoab: «Sã ya rẽ, d na gãndg lalgã n lobg foom a zugu.»

²² Pagã kẽnga tẽnga pʋgẽ n tɩ gom ne buuda fãa wala sẽn zemsde: b fiuuga a Bikri biiga, a Seba, zug n lob a Zoab. A Zoab kɩtame tɩ b peeb baorgo, tɩ b zãag ne tẽngã, ned fãa rɩka a yir sore. Sã n yaa ne a Zoab, a kell n leba Zerizalɛɛm, dĩma mengẽ.

A Daviid na-yir dãmba

²³ A Zoab n da yaa Israyɛl gill tãnsoaba, a Yeoyada biiga, a Benaya, n da ya Krɛt la Pelɛt rãmba tãnsoaba.

²⁴ A Adoram n da ya tʋʋma pʋɩta. A Ayilud biiga, a Zozafat n da so dĩma koeesa moonego.

²⁵ A Seva n da ya sɛba gʋlsda, t'a Sadok ne a Abiyatar ya maan-kʋʋdba.

²⁶ N paas a Ira, Yayir neda, yẽ n da yaa a Daviid maan-kʋʋda.