2 Sãmwɛlle 19 - SEBR SÕNGO

¹ Toog wẽnemda rĩma sũur a yãoogẽ, t'a rʋ yĩngr doogã, tẽnga kʋɩlensã sẽn lugl zĩig ningã, n tar yãbre. A ra kẽndame la a yetẽ: «Kato! M biiga Absalom! M biiga Absalom! Bõe tɩ mam pa reeg fo zĩig n ki? M biiga Absalom! M biiga Absalom!»

² B tɩ wilga a Zoab: «Ad-y dĩma kũmdame, b yãbda b biiga, a Absalom.»

³ La badaare, tãb-biisa sẽn tõog b bɛɛba n da zĩ ne sũ-noog ninga tekame n lebg kʋʋr sũ-sãanga, b fãa gill sẽn waa n wʋm woto: «Dĩma sũur sãama wʋsgo, b biiga kaalma yĩnga.»

⁴ Badaare, neba soos n kẽe tẽnga pʋga, wala neb sẽn kẽng zabre n zoe n lɛɛg n wa tɩ yãnd tar-ba.

⁵ Dĩma ra pĩ-la a neng ne a nugu la a ra tara yãb-toose: «M biiga Absalom! M bi-nongr a Absalom! M bi-nongre!»

⁶ A Zoab kẽnga dĩma nengẽ, a roogẽ, n yeel-a: «Rũndã, y ningda y neba fãa yãnde, bãmb fãa sẽn fãag y vɩɩm, y kom-dibli la y kom-gugli vɩɩm, y pagba ne b pʋg-taaba vɩɩm.

⁷ Yãmb nonga sẽn kis-b yãmba, la y kis sẽn nong-b yãmba. Yaa sɩda, yãmb wilga rũnna tɩ tãnsoaben-dãmba la tãb-biisa, fãa yaa zaalem yãmb yĩnga. Ade, mam miime marsã t'a Absalom sã n da vɩẽ tɩ tõnd fãa yaẽ kɩɩms rũnna, y yetẽ lame tɩ rẽ n zemsẽ.

⁸ Aya! M bõsd-y lame, yi-y n keng-y tãb-biisã pɛlga la m wẽend ne Wẽnde tɩ y sã n pa yi, ned ba a ye kõn pak yãmb yʋng kãnga ye, la rẽnda na yɩ yel-beedo n zʋʋg yel-beed niyns fãa yãmb sẽn seg al y yãadmẽ n tãag rũndã.»

⁹ Dĩma yikame n wa zĩnd tẽnga kʋɩlensa noore. B taasa kibarã tãb-biisã fãa gilli: «Ade, naab yiime n zĩ dignoorẽ.» La tãb-biisã fãa waa dĩma taoore. Wẽnd kãng t'a Israyɛl da zoeeme, tɩ ned kam fãa da leb a roogẽ.

A Daviid le rɩta naam Israyɛl

¹⁰ A Israyɛl sagsa fãa pʋgẽ, neba da gomdame n yetẽ: «Dĩma yiisa tõnd d bɛɛb nusẽ; yaa bãmb n fãag tõnd Filisti rãmba nusẽ; la b kong n zãaga tẽngã n na n põs a Absalom.

¹¹ Tõnd da pʋdga a Absalom zuga kaam t'a rɩ naam n soog-do, la a kii zabrẽ, bõe la d gũud marsã n na n kɩt tɩ dĩma le wa?»

¹² A Daviid me zĩnda a zĩigẽ n tʋm tɩ b yeel maan-kʋʋdba a Sadok la a Abiyatar: «Gom-y ne a Zɩɩda nin-kẽemba, la sok-y-ba: ‹Bõe yĩnga tɩ yãmb na n pa poorẽ, n kɩt tɩ rĩma le lɛɛg n wa a yiri; a Israyɛl zãng raab zoe n lʋɩɩ dĩma tʋbrẽ.

¹³ Yãmb yaa m saam-biisi, yãmb yaa m buudu, bõe yĩnga tɩ b na n deng yãmba n tɩ tall dĩma n wa?›

¹⁴ Y na yeela a Amasa: ‹Fo ka m buud laa? Soaala-Wẽnd sɩbg-ma la b sɩbg-m n bãge, f sã n ka reeg a Zoab zĩiga, n lebg m tãnsoaben-dãmba kãsma.› »

¹⁵ A Daviid tõogame tɩ Zɩɩda rãmb fãa yama lebg yam yɛnga. Woto Zɩɩda rãmb tʋmame tɩ b wa yeel dĩma: «Leb-y n wa yã, yãmb ne y sõgen-kamba fãa!»

A Daviid ne a Simeyi

¹⁶ Zɩɩda rãmba ra waa Gilgal n na n seg a Daviid la b sõng-a t'a rʋʋg kʋɩlgã.

¹⁷ La a Simeyi, a Gera biigã, a Bẽnzame roogẽ, Bawurim tẽnga, da siga ne yãgbo n tũ nebã n na n wa seg a Daviid.

¹⁸ A peega a Bẽnzame saka neb tusri tɩ b tũ-a. N paas a Siba, a Sol sõgen ne a zak rãmba, bãmb piig la a nu la a rakõap pisi. Bãmb n da tog n sõng dĩma t'a rʋʋg Zʋrdẽ kʋɩlgã.

¹⁹ Koom koglga sẽn zɩt dĩma zaka neb sã n wa n na n dʋʋg kʋɩlgã, bãmb n da na n kelg la b maan dĩma sẽn date. La dĩma sẽn dʋʋg kʋɩlgã, a Simeyi, a Gera biigã, wõgemda naab taoore.

²⁰ A yeela dĩma: «Bɩ m naaba da ning-m taale m beegra yĩng ye; b ra le tẽeg m sẽn paoog m dĩma la m zu-soaba, a sẽn wa n yit Zerizalɛɛma ye. M naaba da gãd rẽ a sũurẽ ye.

²¹ M bãngame tɩ m maana yel-wẽnde. La ade! A Zozɛf roogẽ wã, maam n yi n deng taoore n na n seg m dĩma la m zu-soaba, m denga nug goabg rãmba fãa n wa.»

²² A Seruya biiga, a Abisayi goma ne dĩma woto: «A Simeyi ka tog ne kũum bɩ? Ka yẽ n kãab kãab beedo Soaala sẽn kõ ned ninga naama laa?»

²³ A Daviid leoka a Abisayi: «Mam tara koɛɛg ne yãmb bɩ, Seruya kamba? La yaa bõe yĩng la yãmb wilgd dũnna tɩ yãmb yaa mam bɛɛba? Dũnna, b na kʋ ned Israyɛl pʋgẽ sɩda? Maam n ka mi tɩ rũnna mam dɩta naam a Israyɛl zug bɩ?»

²⁴ La dĩma yeela a Simeyi: «Fo kõn ki ye!» La dĩma wẽena rẽ.

A Mefibaal

²⁵ A Sol yagenga, a Mefibaal, da waame n na n seg dĩma, a ra pa tol n ges a nao wã yelle, a ra pa tol n põng a no-kõbdo, a ra pa tol n pek a futu, al dĩma yiib daare n tãag a sẽn lebg n wa ne laafi daar ye.

²⁶ A sẽn yi Zerizalɛɛm n ta dĩma taoore, dĩma sok-a lame: «Yaa bõe tɩ f pa tũ maam, Mefibaal?»

²⁷ A leokame: «M naab la m zu-soaba, yaa m sõgne n tudg maam. Yãmb yamba da yeel-a lame: ‹Ning m bõn-yãanga gaare, m na n zomb-a lame n paam dĩma.› Y mi tɩ y yamba yaa koamsa.

²⁸ M sõgna wa-la y nengẽ n rõd maam. La ade, m naaba, yãmb yaa wa Wẽnd malɛk m yĩnga, la b tõe n maana wala b sẽn date.

²⁹ M saamba zak gilli ra toga ne kũum bala, la ne rẽ fãa, yãmb sak n deega y yamba neb niyns sẽn dɩt-b ne yãmba sʋka. Bõe la m tõe n le saag n kos m dĩma?»

³⁰ Dĩma yeel-a lame: «Yaa bõe tɩ f ket n tar goama? Maam n dat tɩ foo ne a Siba pʋɩ taab pʋtã.»

³¹ A Mefibaal yeela dĩma: «A Siba tõe n deega fãa n sooge, sẽn noom maam n yɩɩd yaa dĩma le kẽ a zakẽ ne laafi la bãane.»

A Barzilayi

³² Galaad raoa, a Barzilayi, ra yii Rogelim. A rʋʋga kʋɩlga ne dĩma n yaool n lɛɛge.

³³ A Barzilayi da lebga nin-kẽema, a yʋʋm da taa pis-nii. Yẽnda n da ges naaba yelle b sẽn da wa n zĩnd Maanayim, t'a ra yaa arzɛk soaba.

³⁴ Dĩma yeela a Barzilayi: «Bɩ f kell n tũ maam tɩ m na ges f yelle, f kʋʋlem pʋgẽ, Zerizalɛɛm tẽnga.»

³⁵ La Barzilayi leoka dĩma: «Yʋʋm a wãna la m na n le paam n vɩɩnde, tɩ m na n tũ m dĩma n kẽng Zerizalɛɛm?

³⁶ Mam yʋʋm yaa pis-nii marsã: mam tõe n le bãnga sẽn be neere la sẽn ka neer sɩda? Yãmb yamba noor le mi noog la beedo n bak sɩda? Mam tõe n le wʋma yɩɩn-yɩɩndb koeese. Bõe tɩ y yamba na n le yɩ zɩɩbo, a soaala la a dĩma yĩnga?

³⁷ Y yamba yãaga dĩma n dʋʋg Zʋrdẽ kʋɩlgã, la rẽ n waa n sekd yaoodo?

³⁸ Kõ-y yamba sore t'a leb a poorẽ; m na n kii m ba yiri, m ba la m ma yaoog sɛɛgẽ. La ad-m biiga a Kimam, bɩ yẽ tũ d zu-soaba la d dĩma, la y maan ne-a y sẽn dat bũmb ning fãa.»

³⁹ La dĩma yeelame: «Bɩ a Kimam tũ maam, m na maan ne yẽnda fo sẽn date; fo sẽn na n kos maam bũmb ning fãa, m na maana a yĩnga.»

⁴⁰ Neba fãa gilli dʋʋga Zʋrdẽ kʋɩlga n looge, dĩma me loogame; a moka a Barzilayi n ning a barka. A paama sore n leb a yiri.

Israyɛl rĩung la Zɩɩda rĩungu

⁴¹ Dĩma teesa Gilgal la a Kimam tũ-a lame n kẽnge. Zɩɩda neba fãa gilli la Israyɛl neba pʋɩ-sʋka ra yãagda dĩma.

⁴² Israyɛl nug goabg rãmbã waa n yeela dĩma: «Yaa bõe yĩnga, tɩ tõnd saam-biisã, a Zɩɩda nebã, maan wa tõnd ka naag n ya yãmb neba n kaoog zãng n wa peeg yãmb tɩ y rʋʋg kʋɩlgã, yãmb ne y zak gilli, ne y tãb-biisa gilli? Y tãb-biisa gill da ka zoe n yãagd-y laa?»

⁴³ T'a Zɩɩda neba na n leok-ba: «Dĩma yaa rogem ne tõnd n yɩɩd yãmba! Yaa bõe tɩ y sũur pa noom ne d sẽn maana? Tõnd soola naaba maasem n paam dɩɩbo, bɩ tõnd deega a kũuni?»

⁴⁴ Israyɛl neba leoka Zɩɩda rãmba: «Tõnd tara bʋʋm naoor piiga, dĩma poorẽ, n tar bʋʋm naoor piig a Daviid meng poorẽ. Bõe tɩ y rat n bas-d kɛɛnga? Ka tõnd n deng n kos dĩma t'a leb a naama zaoorẽ laa?» La Zɩɩda leoka a Israyɛl ne gãgs la gãgse.