2 Sãmwɛlle 11 - SEBR SÕNGO

A Daviid ne a Batseba

¹ Yʋʋmd sẽn vẽke tɩ dĩm dãmb le sɩng b zaba, a Daviid tʋma a tãnsoaba a Zoab ne a neba, ne a Israyɛl fãa, tɩ b tɩ sãam a Amon yagense la b tɩ gãneg tãpo n gũbg Raba, b na-tẽngã. Dĩma a Daviid paa Zerizalɛɛm.

² Daar a ye, zĩ-sobdo, dĩma a Daviid yika a gãagẽ, n gõod na-yir bɛonga zugu la a zĩnda bɛonga zugu n yãe pag a ye sẽn sood koom: la pagã da yaa neer al wʋsgo.

³ La a Daviid kɩtame tɩ b sok n bãng sẽn yaa a soaba. B waa n leokame: «Yaa a Batseba, a Eliyam biiga, la Ititga, a Uri, paga.»

⁴ A Daviid tʋma neda tɩ b tɩ wa ne pagã. La dĩma gãanda ne-a. Paga ra nan yɩlga paalem. Paga leba a yiri.

⁵ Paga rɩka pʋga, n tʋm tɩ b tɩ yeel a Daviid: «Mam tara pʋga!»

⁶ A Daviid toola sebre a tãnsoaba a Zoab n yeel-a: «Tʋm Ititga Uri t'a wa sak maam.» A Zoab tʋma a Uri a Daviid nengẽ.

⁷ A Uri sẽn ta a Daviid nengẽ, a sok-a-la a Zoab ne a tãb-biisã la zabrã sẽn yaa a soaba.

⁸ A Daviid yaool n yeela a Uri: «Bɩ f kul yir n tɩ waas f nao.» La a Uri yii na-yirã ne dĩma kũuni.

⁹ La a Uri zãgsa kulbu, n gãand dĩma sɩmandẽ, ne a zu-soaba sõgen-kamba.

¹⁰ B tɩ yeela a Daviid: «A Uri pa kul a yir ye.» T'a Daviid sok a Uri: «Fo pa yi so-toak n wa laa? Bõe yĩnga tɩ fo pa kul f yiri?»

¹¹ A Uri leoka a Daviid: «Kuga walsa koglga, a Israyɛl ne a Zɩɩda tãb-biisa gãee zãnd tẽngre; y tãnsoaben-kãseng a Zoab la a tãnsoaben-taasa gãee tãb-sikẽ. Woto wã marsã, m maanda a wãna n tɩ kẽ m zakẽ, n dɩtẽ, n yũuda la m gãe ne m paga? M kõ maan yell a woto buud ye, m wẽenda!»

¹² A Daviid yeela a Uri: «Bɩ f yaas ka rũnna, tɩ beoogo m na bas-f tɩ f lebe.» La a Uri paa Zerizalɛɛm badaare.

¹³ La dĩma bool-a lame t'a wa rɩ ne bãmba, n kõ a rãam ali t'a yũ n gãeeme. La zĩ-sobdo a Uri sẽn yi naaba zakẽ, a pa kul a meng yir ye, a kell n paa ne tãb-biis niyns sẽn gũud-b dĩma.

¹⁴ Vẽkembeoogo, a Daviid gʋlsa a Zoab sebre, t'a Uri tall n tɩ kɩs-a.

¹⁵ A gʋlsa woto sebra zugu: «Bɩ f ning a Uri zĩig ning zabrã sẽn ya toogã, la y yi a poorẽ, n bas tɩ b tão-a n kʋ.»

¹⁶ A Zoab sẽn da gũbg tẽngã n mi zabra nengã, tɩ ninga a Uri, n togl bɛɛba gãndaada sẽn da ya wʋsg zĩig ningã.

¹⁷ Tẽnga rãmba yiime n sɩng zabre, la b kʋ-la a Daviid tãb-biisa la a tãnsoaben-dãmba kẽere. Ititga a Uri me kiime.

¹⁸ A Zoab tʋma neda t'a wa togs a Daviid zabra kibar fãa.

¹⁹ A kõ-la a sẽn tʋm a soaba noor kãnga: «Fo sã n togs dĩma zabra yelle n sɛ,

²⁰ tõe tɩ dĩma puug a sũur n sok-fo: ‹Yaa bõe yĩnga, la yãmb pẽneg tẽngã n kaoog zabre? Yãmb ka mi tɩ b tõe n yalsa lalsa zut n tão yãmb pɛɛm laa?

²¹ Ãnna n kʋ a Abimelɛk, a Yerubaal biigã? Ka pag n yals lalg zugu n lobg-a ne neer laa? La a ka ki Tebɛs bɩ? Bõe n maan tɩ yãmb pẽneg lalgã?› Dĩma sã n gom-f boto bɩ f yeel-ba: ‹Yãmb tãnsoaba, Ititga a Uri, me kiime.› »

²² Sẽn tʋm a soaba loogame, la a sẽn ta, a goma ne a Daviid wala a Zoab sẽn da ratã.

²³ A yeela a Daviid: «Neba tõoga tõndo; b yii n zaba ne tõnd pʋtẽ, tɩ tõnd lɛɛg dig ba n tɩ ta tẽnga noorẽ.

²⁴ Tãoodba zĩnda lalga zugu n tão yãmb tãb-biisã, m naaba, la b kʋʋ yãmb neb wʋsgo, la yãmb sõgna, Ititga Uri, me kiime.»

²⁵ A Daviid yeela raoã: «Tɩ yeel a Zoab woto: ‹Da sãam f sũur tɩ loog, yell kãnga yĩng ye, tɩ sʋʋg rɩta yaare, rũnna yaa ka, beoog ka sẽnẽ. Aya! Ning pãng n zab ne tẽngã n lub-a. Modg n keng f pɛlga!› »

²⁶ A Uri paga wʋmame t'a sɩd kiime; la a yãba a sɩda.

²⁷ A Batseba sẽn dɩ a sɩd kʋʋr n sɛ, a Daviid tʋmame tɩ b tɩ peeg-a n wa t'a reeg-a a yiri. A Batseba lebga a Daviid paga, n dog a biiga. A Daviid sẽn maan bũmb ningã pa ta Soaala-Wẽnd yam ba bilfu.