2 Sãmwɛlle 1 - SEBR SÕNGO

DĨMA A DAVIID DƖTA NAAM A Sol ne a Biig kũum

¹ A Sol kũuma poore, a Daviid tõoga Amalesitsã, n lɛɛg n wa Siklag. A paa be rasem a yiibu.

² Da-yɩten-daara la rao a ye n yii a Sol tãb-sikã n wa. A futã ra kẽesame, t'a zug ra yug tom. A sẽn ta a Daviid taoore, a lʋɩɩ tẽnga n wõgemde.

³ T'a Daviid sok-a: «Fo yita yɛ?» T'a leoke: «M yi-la a Israyɛl tãb-sikã n zoe n põse.»

⁴ T'a Daviid sok-a: «Bõe n maam be? Bɩ f togs ma!» Daoã leokame: «Neba kong n zoeeme, neb wʋsg paa tãpẽ. A Sol meng ne a Zonatã maana yõore.»

⁵ A Daviid soka bi-bɩɩga sẽn waa ne kibarã: «F yɩɩ wãn n bãng t'a Sol la a biig a Zonatã maana yõore?»

⁶ Daoã sẽn waa ne kibarã leokame: «Segame tɩ m da bee Gilboa tãnga zugu; la m yãee a Sol sẽn tik a kãnde, n yɛsẽ, tɩ bilim-bilm la wed-dʋʋdb gũbg-a n sege.

⁷ Dĩma sẽn wẽnemd n yãend-ma, b bool-m lame tɩ m leoke: ‹M Naaba!›

⁸ Tɩ b soke: ‹Fo yaa ãnna?› Tɩ m yeele: ‹M yaa Amalesitga.›

⁹ Tɩ b yeel maam: ‹Kolg-la f kʋ-ma. M ket n mi m nenga, la m gãba paooda.›

¹⁰ La mam kolgame, n kʋ-ba tɩ m da miime tɩ b kõn põs bɛɛba ye. M fõka b naam pugla b zugu, n pidg zũurã b sẽn da ning b kanga. M waa ne-ba n na n kõ yãmba, m dĩma.»

¹¹ A sẽn wʋm woto, a Daviid taka a futu n kẽese, la neba fãa sẽn da be-b ne-yẽ wã me kẽesa b futu.

¹² B pogla kʋʋre, n yãb n yãbe, n zãgs rɩɩbo al tɩ ta zĩ-sobdo. B maana rẽ a Sol ne a biiga, a Zonatã, yĩnga, la Wẽnd buudu, a Israyɛl kamba, sʋʋga sẽn kooda yĩnga.

¹³ A Daviid yeela bi-bɩɩga sẽn wa ne kibarã: «Fo yita yɛ?» T'a leoke: «M ba yaa noaka, a yaa Amalesitga.»

¹⁴ A Daviid yeel-a lame: «Fo yɩɩ wãna n pa zoe rabeem n sak n zẽk f nugu n kʋ Soaala-Wẽnd sẽn kõ a soab naama?»

¹⁵ La a Daviid boola ned a yembre n yeel-a: «Kolg n wẽ-a!» T'a sɩd wẽ-a n lubi.

¹⁶ A Daviid yeelame: «Yaa fo meng n bao f kũum n saag n yiis f noorẽ tɩ foo n kʋ Soaala-Wẽnd sẽn kõ a soab naama.»

Dĩma Daviid yãbda a Sol la a Zonatã

¹⁷ Yɩɩn-kãnga la a Daviid pʋd yã n na n yãb a Sol ne a biiga, a Zonatã, kʋʋre.

¹⁸ Tãp yɩɩlle, Zɩɩda kamba sẽn tog n zãmse, la sẽn gʋls Nin-sõngã sebr pʋga. A Daviid yɩɩla woto:

¹⁹ A Israyɛl zu-zẽkra paa tãng zugu, gãndaada lʋɩ-la b lʋɩɩse!

²⁰ Da togs-y rẽ Gat tẽng ye, da moon-y kibarã Askalõ tɩ Filisti kom-pugli wã wa noogd b sũur ye, tɩ nin-dẽgda kamb wa kɩdemd n langdẽ ye.

²¹ Gilboa tãmse! Bɩ meenem la sa-koom da le rʋʋg y zug ye! Bɩ pʋt da le pelg kood y pennẽ ye! Yaa yãmb zutu la rẽgd bol gãndaada gãndo. Be la a Sol gãonga rẽgem yã; a Sol gãonga kõn le sõ kaam ye

²² A Zonatã tãpa yaool n zɩ n tare tɩ bɛɛbã n pid ne pãng ye. A Sol sʋʋga sẽn da tar vargr la a sẽn tare.

²³ A Sol ne a Zonatã yam kẽe taaba b vɩɩma fãa pʋgẽ, la ka kũuma n waa n welg-b ne taab ye. B tʋʋlem da yɩɩda sɩls tʋʋlem, b sũ-keelem yɩɩga bõnyẽes sũ-keelem!

²⁴ Israyɛl kom-pugli, ning-y nintãm n yãb a Sol! A ra yeelgda yãmb ne nufa, a ra zam-y-la ne fan teedo. Y futa ra tisa ne sãnem n tar yãgbo.

²⁵ Zabra sẽn waa n kɛɛd wa bẽere, wakat kãng la gãndaada lʋɩ yã, tãmsa zut la a Zonatã gãand yã! Zonatã, m yao sõngo, ges m sũ-sãanga!

²⁶ Ges m sẽn da nong-f ne nonglem ninga! Fo nonglma la m da pẽgd n yɩɩd fãa, n pẽgd-a n yɩɩd rao ne pag nonglem.

²⁷ Bõe tɩ gãndaada lʋɩ b lʋɩɩse? Bõe tɩ bãmb ne b zab teeda pa tãpẽ?