2 Rĩm-dãmba 9 - SEBR SÕNGO

A Zewu naam Israyɛl

¹ Bãngda a Elize boola bãngdba karen-biig a yembre n yeel: «Wudg n wa tɩ m tʋm-fo, reeg kaama ne tʋkã n kẽng Ramot-Galaad.

² Fo sã n ta, bɩ f bao a Zewu, a Zozafat biiga, a Nimsi yagenga; f sã n yãe-a, bɩ f yiis-a a tũud-n-taas sʋka, n peeg-a n kẽ roogẽ.

³ Fo na rɩk kaama tʋkã n pʋdg a zug n yetẽ: ‹Naaba-Wẽnd koɛɛg la woto: Mam pʋdgda f zug kaam tɩ f yɩ Israyɛl dĩma.› Dẽ poore, bɩ f pak kʋɩlenga n yɩ n zoe la f da yaas ye.»

⁴ Bãngdba karen-biiga kẽnga Ramot-Galaad, a tɩ mika tãnsoaben-dãmba tɩ b zĩ la a yeelame:

⁵ «M naaba, m tara koɛɛg ne yãmba.» A Zewu sokame: «Tõnd yaa wʋsg ka, f tara koɛɛg ne ãnda?» T'a leoke: «Ne yãmba, m naaba»

⁶ La a Zewu yik n kẽe roogẽ. Bãngda pʋdga a zug kaam n yetẽ: «Naaba-Wẽnde, a Israyɛl Wẽnnaama, koɛɛg la woto: ‹Mam pʋdgda f zug kaam tɩ f yɩ dĩma n soog Wẽnnaam buudu, a Israyɛl.

⁷ Fo na n pãba f zu-soaba a Akab roogo, la maam n na n sok a Zezabɛl samde, m tʋʋm-tʋmdba, m no-rɛɛsdba zɩɩma a sẽn daaga samde.

⁸ A Akab roog gilli na n wãame, rao fãa, yem-daoogo wala burkĩna, a Israyɛl pʋgẽ, na n kiime.

⁹ Mam na n sɩbga a Akab roogo, wẽnd m sẽn sɩbg a Zeroboam, a Nebat, biiga, wẽnd m sẽn sɩbg a Basa, a Ayiya biiga.

¹⁰ Baas na n wãba a Zezabɛl, Zizreyɛl pʋgẽ, la ned kõn mum-a yaoogẽ ye.› » La bãngdba karen-biig paka kʋɩlengã n yi n zoe, a sẽn gom n sɛ.

¹¹ A Zewu yii n bʋʋga a zu-soaba tãnsoaben-dãmb a taabã tɩ b sok-a: «Yaa noogo? Zu-lɛbga waa fo nengẽ, bõe yĩnga?» T'a Zewu leoke: «Y mii raoã ne a sẽn saad n gomd goam niynsã.»

¹² La b yeelame: «Zirẽ! Maneg n togs fãa.» La a Zewu yeel-b lame: «A goma ne maam woto, n le paas woto la baasgẽ a yeelame: ‹M na n pʋdga f zug kaam tɩ f yɩ Israyɛl dĩma.› »

¹³ La b wẽneg n pidga b koaba n yɛdg geera zugu t'a zĩndi, la b peeba baorgo la b kelennẽ: «A Zewu yaa dĩma!»

A Zoram kũum

¹⁴ Segame t'a Israyɛl tãb-biisa gilli da zabd n na n fãag Ramot Galaad Aram dĩm a Azayɛl nugẽ. Zabra sẽn waa n zabd ne a Azayɛl, Aram dãmba ra pogla dĩm a Zoram.

¹⁵ Woto a ra lebg n kẽe Zizreyɛl n na tɩp a menga. A sãmpogra ra paam n gãneg-a lame. A Zewu, a Zozafat biiga, a Nimsi yagenga, soos n zãmba a Zoram. A Zewu yeela tãnsoaben-dãmbã: «Y sã n lɛɛg n kẽeda mam tãpẽ, bɩ ned ba a ye da yi n kẽ Zizreyɛl tẽngã n togs yella sẽn maana ye.»

¹⁶ A Zewu kẽe bilim-bilm n kẽng Zizreyɛl. A Zoram bãaga da gãneg-a lame t'a Akaziyas, a Zɩɩda dĩma, wa n na n ges a gãaga.

¹⁷ Tãb-gũuda sẽn da gũud Zizreyɛl tẽnga zĩnda yĩngr n tees n yãend a Zewu ne a tãb-biisa sẽn wate, t'a yeele: «Mam nee tãb-biis kʋʋngo» T'a Zoram yeele: «Tʋm-y wed-dʋʋda t'a kẽng n tɩ n seg-ba n sok-b n gese yaa laafi yĩng la b wat bɩ.»

¹⁸ Wed-dʋʋda tɩ seg-b lame n sok-ba: «Naab tɩ b wa ges yaa laafi yĩng la y wat bɩ?» T'a Zewu leoke: «Sã n yaa laafi, bõe n ta foom. Loog n leb mam poorẽ!» Tãb-gũuda le togsame: «Ad-y y sẽn tʋm a soaba bʋʋg-b lame, la a pa lebg ye.»

¹⁹ Dĩma tʋma wed-dʋʋd a to tɩ yẽ me bʋʋg-ba n yeele: «Naaba tɩ m wa soke, yaa laafi?» A Zewu leokame: «Sã n yaa laafi bõe n ta foom? Loog n leb mam poorẽ!»

²⁰ Tɩ tãb-gũuda leb n yeele: «A bʋʋg-b lame la yẽ me pa lebg ye; la wa m sẽn ne: kẽndã yaa a Zewu, a Nimsi yagenga kẽnde, t'a zoeta tʋʋle wa gãeenga.»

²¹ A Zoram yeelame: «Bɩ y sog m bilim-bilma!» Tɩ b sog bilim-bilma. A Zoram, Israyɛl dĩma ne a Akaziyas, Zɩɩda dĩma, kẽng n na n tɩ sega a Zewu, ned kam fãa a bilim-bilm pʋga. B tɩ mik-a-la Zizreyɛl dao a Nabot pʋʋgẽ.

²² A Zoram sẽn yãee a Zewu bala a sokame: «Yaa laafi bɩ Zewu?» T'a Zewu leoke: «Laafi bee yɛ, tɩ f ma a Zezabɛl wẽn-naandsa pʋgb la a tɩta tar paasg n dabda?»

²³ A Zoram wẽnemda a salbre t'a na n zoe, n yeel a Akaziyas: «Zãmbo Akaziyas!»

²⁴ La a Zewu dɩka tãpo n tão a Zoram bãgdã sʋka, la pĩima sãaga a sũurã n yi, tɩ dĩma lʋɩ a bilim bilma pʋga.

²⁵ A Zewu yeela a wed-kɩɩm-naaba, a Bidkar: «Rɩk-a n lob Zizreyɛl dao a Nabot pʋʋgẽ. Tẽeg bala Soaala-Wẽnd sẽn yeel a ba wã poorẽ, dĩm a Akab poorẽ, daar ning maam ne foom la neb a taaba sẽn waa n yãag-a ne bilim-bilma.

²⁶ Soaala yeelame: ‹Maam a Wẽnde, m yãenda fãa, zaamẽ, f sẽn waa n kʋʋd a Nabot ne a kambã. Maam n wẽende, maam a Naaba-Wẽnde, tɩ m na sɩbg-f rẽnd yĩnga f pʋʋgẽ ka bala.› » Woto wã a Zewu paasame bala: «Bidkar, dɩk a Zoram n lob pʋ-kãnga, n zems wala Soaala sẽn da pĩnd n wilgi.»

²⁷ A Akaziyas, Zɩɩda dĩma, sẽn yãee woto, a rɩka Bɛt-Gã sor n zoetẽ, la a Zewu pʋg a poore n kõ noor kãnga: «Bɩ y tão yẽ me!» Tɩ b tão-a n pogl, a bilim bilma pʋga, Gur Kunkubrã zugu, sẽn be Yibleam sɛɛga, t'a zoe n tɩ kẽ Megido n ki be.

²⁸ A sõgen-kamba tall-a-la ne bilim-bilma n tɩ mum-a yaoogẽ, a Daviid na-tẽngẽ.

²⁹ Yɩ-la a Zoram, a Akab biiga, naam yʋʋmd piig la a yembr soaba, la a Akaziyas da lebg Zɩɩda dĩma.

A Zezabɛl kũum

³⁰ A Zewu da taa Zizreyɛl la bala la a Zezabɛl sẽn wʋm a waoongo. A baoo kɩrʋ n ning a nini, n pãnem a zuga neere, n lɩkd a roog võorẽ.

³¹ A Zewu sẽn gãndg tẽnga noore, a Zezabɛl yeelame: «Yaa laafi, dĩm-kʋʋd-taag wa a Zimri?»

³² A Zewu zẽk a nenga n ges võora sẽnẽ n yeele: «Ãnd n be mam poorẽ, ãnda?» Na-yir dãmb a yiib bɩ a tã n lɩke.

³³ T'a yeel-ba: «Bɩ y lob paga tẽnga» B tus a Zezabɛl n lub tẽnga t'a zɩɩm fẽeg lalgã la wiidã. T'a Zewu tab-a ne a bilim bilma n looge.

³⁴ La a Zewu kẽe rĩma zakẽ n kɩt tɩ b wa ne bũmb t'a rɩ la a yũ, n na n yaool n yeel a tũud-n-taasã: «Tɩ ges-y pʋg-kõb-wẽngã yelle, la y mum-a t'a yaa dĩm biiga.»

³⁵ B kẽngame tɩ b na n tɩ mum-a la b ka yãe bũmb sã n ka a zu-wanga, a karse la a nus-pʋs a yi.

³⁶ Tɩ b lɛɛg n wa togs a Zewu, t'a yeele: «Soaala-Wẽnd gomdã taasame, b sẽn kɩt t'a Eli, Tesbe daoã, yeele: ‹Zizreyɛl pʋʋgẽ, baas na n wãba a Zezabɛl nemdo.

³⁷ A Zezabɛl yĩnga na n lebga wa birga b sẽn birg pʋʋgo, b kõn tõog n yeele tɩ wã la a Zezabɛl ye.› »