2 Rĩm-dãmba 8 - SEBR SÕNGO

Sunem paga zu-noogo

¹ A Elize da gomda ne pag ninga a sẽn da vʋʋga a soab biigã n yeel-a: «Yiki, foom ne f zak rãmba, n tɩ zĩnd f sẽn tõẽ tɩ Naaba-Wẽnd boola kom la a na n sɩbga tẽnga yʋʋm a yopoe.»

² Paga maana wa Wẽnnaam nedã sẽn yeele, n yik ne a yir dãmba n kẽng n tɩ zĩnd Filisti rãmba tẽngẽ yʋʋm a yopoe.

³ Yʋʋm a yopoe sẽn looge, pagã yii Filisti rãmba tẽnga n lebg n wa, la a tɩ yõka naab sɛɛga t'a lebs-a a yiri la a pʋʋgo.

⁴ Dĩma da sõsda ne a Geazi, Wẽnnaam nedã sõgne, la rĩma ra yetame: «Bɩ f maneg n togs maam tʋʋm kãsensa fãa, a Elize sẽn maana.»

⁵ A Geazi da togsda dĩma a Elize sẽn vʋʋg bi-kɩɩng a ye to-to. Mik a sẽn waa n gomdã, biig ning sẽn vuuga ma taame, n kudg naab kãntɩɩga t'a lebs-a a pʋʋgo la a yiri. T'a Geazi na n yeele: «M naaba, ad-y pagã, ne a biigã, a Elize sẽn vʋʋgã!»

⁶ Dĩma soka pagã t'a na n maneg n togs kibarã. La dĩma boola a tãnsoab a ye n kõ-a noor t'a ges paga yelle n yetẽ: «Sõng tɩ b lebs pagã a sẽn so zãnga, ne a pʋʋgã sẽn paam yõod ninga, paga sẽn yi tẽnga tɛka, n ta rũnna.»

A Azayɛl na n lebga Siri dĩma

⁷ A Elize kẽnga Damas. Segame tɩ Aram dĩma, a Ben-Adad, da ka laafi ye. B tɩ togs-a-la woto: Wẽnnaam nedã taa ka.

⁸ Tɩ dĩma yeel a Azayɛl: «Rɩk kũuni f nugẽ n tɩ seg Wẽnnaam nedã, la f bõs t'a pʋʋs Wẽnd n bãng m sã n na n tɩlga ne bã-kãnga.»

⁹ A Azayɛl kẽng n tɩ sega a Elize ne kũuni a sẽn zɩ, a yĩnga. A yãka bõn-yõod fãa sẽn be Damas n zɩlg yʋgma pis-naase. A taame n yals a Elize taoore n yeele: «Y biig a Ben-Adad n tʋm maam tɩ m wa sok yãmb woto: ‹M na n tɩlga ne m bãaga bɩ?› »

¹⁰ A Elize leok-a lame: «Kẽng n tɩ belg-a n yeel-a t'a sɩd na n tɩlgame, la Soaala-Wẽnd yaool n wilga maam t'a na n kiime.»

¹¹ La vugr bala Wẽnnaam neda waa n yɛsa sɩɩ t'a nina nood t'a get a Azayɛl n ka kamsdẽ la a yãbda.

¹² T'a Azayɛl sok-a: «Yaa bõe yĩnga tɩ mam zu-soaba yãbda?» A Elize leokame: «Yaa tɩ mam mii wẽng ning fo sẽn na n maan a Israyɛl kambã. Fo na n yõoga b tãnsoben-dota bugum, fo na n kooda b kom-bɩɩba ne sʋʋse; b kom-peelse, fo na n tag-b lame n bedse; b pagba sẽn tʋte, fo na n weed-b lame.»

¹³ La a Azayɛl leokame: «Yãmb yamba me zema bõe? Baag wa maama na n yɩɩ wãn n maan yɛl a woto?» T'a Elize leok-a: «Soaala-Wẽnd wilga maam, foo n na n lebg Aramsa dĩma.»

¹⁴ A Azayɛl basa a Elize n leb a zu-soaba nengẽ t'a sok-a: «A Elize yeelame tɩ bõe?» T'a leoke: «B yeela maam tɩ sɩd menga yãmb na n tɩlgame.»

¹⁵ Vẽkembeoogo, a Azayɛl rɩka fu-goabga n los koomẽ n yaag n pil dĩma nenga. A Ben-Adad kiime t'a Azayɛl led-a a zaoorẽ.

A Zoram naam Zɩɩda

¹⁶ A Akab biig a Zoram da rɩta naam Israyɛl. Dẽ tɩ yaa a Zozafat n da rɩt naam Zɩɩda. Yʋʋm sẽn maan a nu t'a Zozafat looge, yẽ me biig sẽn boond tɩ Zoram lebga Zɩɩda dĩma a ba zĩigẽ.

¹⁷ A Zoram, naama deegr wakato t'a da tara yʋʋm pis-tã la a yi. A rɩɩ naam Zerizalɛɛm yʋʋm a nii.

¹⁸ A rɩka a Israyɛl dĩm dãmba nao, wala a Akab roog rãmba sẽn tũ a soaba, t'a da peega a Akab bi-pugla n maan a paga. A maana wẽnga, Soaala-Wẽnd nifẽ.

¹⁹ La ne rẽ fãa, Naaba-Wẽnd pa sak n bas t'a Zɩɩda wã ye, b tʋʋm-tʋmda a Daviid maasem yĩnga. Bãmb n da kãabe tɩ b na kell n basa a roogẽ la a yagensa roogẽ, roagd a ye, fitil a ye, la a bugma na n wida yʋʋm sẽn kõn sɛ.

²⁰ Dĩm kãng zamaanẽ, la Edom zẽk a zug ne a Zɩɩda. Edom dãmba baoo dĩm n kõ b menga.

²¹ A Zoram yik n kẽnga Sayir ne bilim-bilma gilli. A ra yika ne yʋngo n zab ne Edom dãmba sẽn da gũbg-a, yẽ ne bilim-bilma nanamse, tɩ neba zoe n leb b rotẽ.

²² A Edom kell n zẽka a zug ne Zɩɩda rĩm n tãag rũnna. Yɩɩ wakat kãng me la Libna rãmb me zãgs t'a kõn dɩ naam b zug ye.

²³ A Zoram tʋʋm a taaba, a sẽn maan fãa, rẽ fãa sẽ pa gʋls a Zɩɩda dĩm dãmb sebra pʋgẽ bɩ?

²⁴ La a Zoram tɩ saka a saam-dãmba, tɩ b mum-a ne a saam-dãmba, a Daviid na-tẽngẽ, t'a biiga a Akaziyas led a zaoorẽ.

²⁵ A Zoram, a Akab biiga la Israyɛl dĩma naam yʋʋmd piig la a yi soaba, a Akaziyas, a Zoram biiga, n dʋ zaoor n lebg Zɩɩda dĩma.

²⁶ Ad-y rẽ t'a Akaziyas da tara yʋʋm pisi la a yi la a rɩɩ naam Zerizalɛɛm yʋʋmde. A ma yʋʋr da boondame t'a Atali, a Israyɛl dĩm, a Omri, bi-pugla.

²⁷ A rɩka a Akab roog rãmba nao la a maana sẽn ya wẽnga Naaba-Wẽnd nifẽ, wala a Akab roog rãmb sẽn maane, t'a da kĩi ne a Akab.

²⁸ A yãaga a Zoram, a Akab biiga, n tɩ zab ne Aram dĩma, a Azayɛl, Ramot-Galaad.

²⁹ Aramsa pogla a Zoram. Dĩma a Zoram lebg n waa Zizreyɛl n na n tɩbs Siri dãmba sẽn pogl-a poglg ningã Ramot, a sẽn da wa n zabd ne a Azayɛl, Aram dĩma. A Akaziyas, a Zoram biiga la Zɩɩda dĩma kẽnga Zizreyɛl n na n tɩ ges a Akab biiga a Zoram gãase, t'a ra pa keem ye.