2 Rĩm-dãmba 7 - SEBR SÕNGO

A Elize fãagda Samari

¹ A Elize yeelame: «Kelg-y Soaala-Wẽnd gomde, Wẽnd koɛɛg la woto: ‹Beoog wakat kãnga, zom wamde na ra wakɩre, tɩ alkam kɛgeng wama a yi ra wakɩre, Samari tẽng noorẽ.› »

² La dĩma sẽn da tikd wed-kɩɩm ningã, yeelame: «Soaala-Wẽnd poog vẽya, saaga zug menga, tɩ kood rʋʋge, gomd kãnga na tõog n yɩ sɩda?» T'a Elize leok-a: «F nif na yãe, la f kõn dɩ-a ye»

³ Dap a naase da be tẽnga noorẽ; b da bẽeda yĩng bãaga, la b ra yeta taaba:

⁴ «Bõe yĩng tɩ tõnd zĩ ka n gũud kũum? Koma sẽn lʋɩ tẽngã, d sã n yeele: ‹D kẽ tẽnga pʋga,› d na n kiime. D pa ka me d na n kiime. Sẽn ya woto wã d loog n tɩ kẽ Siri rãmba nengẽ; b sã n ka kʋ-do, d na vɩɩnd, b sã n kʋ-do, rẽ la bala.»

⁵ Zĩig sẽn waa n sobgdẽ neb a naasa yik n dabda Aramsa tãb-sikẽ. Bãmb sẽn ta tãb-sika noorẽ, b pa mik ned ba a ye.

⁶ Soaala-Wẽnd da kɩtame tɩ bʋʋr wulumd Aramsa tãb-sikã: dag n yaa bilim-bilm la wed-dʋʋdb rãamde, tãb-biis zãma kẽeng rãamde, tɩ Aramsa yeel taaba: «Israyɛl dĩma, yaoo Ititsã nanamse la Ezipt nanamse n dɩk tãb-biisi tɩ b wat n na n kaoog zabre ne tõndo.»

⁷ Dɩlla zĩiga sẽn sobge, b zoeeme n bas b roto, b wiidi b bõeense, b tãb-sikã, wa a sẽn da ya-la, b zoeeme n na n fãag b yõore.

⁸ Woto wã bãad dãmba sẽn ta tãb-sikã, b kẽe roog a ye pʋga la b rɩɩme, la b yũume, la b rɩka ligd ne sãnem la futu n tɩ solge. B lɛɛg n wa kẽe roog a to la b sẽn yãend be wã me, b yãkame n tɩ solge.

⁹ Bãad dãmba waa n yeela taaba: «Tõnd sẽn maanda ka neer ye. Dũnna daarã, yaa kibar noog daare. Tõnd sĩnd d noor n gũ tɩ beoog vẽege, d kõn põs sɩbgre ning sẽn na n lʋɩ d zuga ye. Dẽ yĩnga wa-y tɩ d kẽ tẽngã, d kẽng na-yiri n tɩ togs kibar noogã.»

¹⁰ B waa n boola tẽnga noor gũudba n wilg-b woto: «Tõnd kẽe Aramsa tãb-sika la tõnd pa yãend ninsaala, d ka wʋm ninsaal koɛɛg ye. D sẽn yãend bala yaa wiidi sẽn za b baarẽ la bõeense, la ro-vɩɩdo.»

¹¹ Tẽnga noor-gũudb boola pʋgẽ n wilg dĩma zaka rãmba.

¹² Dĩma yika ne yʋngo n yeel a sõgen-kambã: «Bas-y tɩ m wilg-y Aramsa sẽn bilgd sɩlem ninga. B sẽn mi tɩ kom namsda tõndã, b yik n basa b tãb-sikã n tɩ soond weoogẽ, n yeel taaba: ‹D sẽn pag b rãmb b tẽngẽ wã ma n yi b tẽngã tɩ d kell n yõg-b vɩɩse la d na paam n soog tẽngã.› »

¹³ Dẽ me la sõgen a ye leok yã: «Bɩ d yiis wiidi a nu wã sẽn kellã, la sẽn na n ki, wa tẽnga rãmb fãa sẽn ka na n põsã. D tʋm-ba n gese.»

¹⁴ B yiisa bilim-bilm a yiibu tɩ dĩma tʋm-ba tɩ b rɩk Aramsa nao. A yeel-b lame: «Aya, bɩ y kẽng n tɩ gese!»

¹⁵ B rɩka Aramsa nao al n tɩ tãag Zʋrdẽ kʋɩlga, la sorã ra pida ne futu la teedo Aramsa sẽn da zoetẽ la b lobda. B sẽn tʋm b rãmba lebg n wa togsa dĩma.

¹⁶ Dẽ marsã la neba yii n tɩ zɛ Aramsã tãb-sikã. Dẽ me la alkam pɛɛlg zom bãaneg wamd koos wakɩre tɩ alkam kɛgeng wam a yi da raad wakɩre, wa Naaba-Wẽnd sẽn da pĩnd n togse.

¹⁷ Dĩma da kɩtame tɩ sõgen ninga a sẽn da tikd a soab n kẽnda tɩ yals n gũud tẽnga noor kʋɩlengã; la nebã tab-a lame n beds t'a ki, wa Wẽnnaam nedã sẽn da yeele. A Elize da wilga dĩma rẽnna a sẽn waa a nengẽ wã raare.

¹⁸ Sɩda, Wẽnnaam neda da waa n yeela rĩma: «Beoog yibeoog wakat kanga, Samari tẽnga rãmb raagẽ, alkam kɛgeng wam a yi na n daa wakɩre, tɩ zom pɛɛlg wamd a ye raad wakɩre.»

¹⁹ Wed-kɩɩma ra yaool n yeela a Elize: «Ba Soaala-Wẽnd yoog saaga vẽya, tɩ kood dʋʋge, gomd kãnga kõn taas ye.» T'a Elize ra yeele: «F na yãend ne f nifu la f kõn dɩ ye.»

²⁰ La yɩɩ boto. Neba tab-a-la tẽnga noore la a kiime.