2 Rĩm-dãmba 6 - SEBR SÕNGO

A Elize le maanda wẽnd-makre

¹ Bãngdba karen-biis yeela a Elize: «Ade, tõnd sẽn be zĩig ning ne yãmb ka wã yaa sẽk d yĩnga.

² Bas-y tɩ d kẽng Zʋrdẽ tɩ ned kam fãa tɩ wa ne raoog tɩ d tilg yiri n zĩndi.» T'a Elize leoke: «Aya bɩ y kẽnge!»

³ Tɩ ned a ye yeele: «D kotame tɩ y sak n yãag-do» T'a leoke: «M na yãag yã.»

⁴ La a yãag-b lame tɩ b kẽnge. B sẽn ta Zʋrdẽ, b kɛɛ raado.

⁵ La ned a ye waa n kɛɛgda da-bedre, t'a lar fʋrg n lʋɩ koomẽ t'a kelme: «M ba ye, mam da penga larã!»

⁶ Tɩ Wẽnnaam nedã sok-a: «A lʋɩ yɛ?» T'a wilg zĩiga

⁷ t'a Elize kɛɛg raoogo n lob zĩ-kãnga tɩ larã ruki. T'a yeele: «Rɩk-a!» T'a tẽeg a nug n dɩk-a.

A Elize fãagda a Israyɛl kamba

⁸ Siri dĩma da kaooga tãpo ne a Israyɛl. A sã n da maan yẽsgo ne a tãnsoaben-dãmba n yeel-ba: «Yãmb na n gãnega tãpo zĩ-kãnga la zĩ-kãnga,»

⁹ Wẽnnaam nedã ra tʋmdame tɩ b tɩ yeel a Israyɛl dĩma: «Maan-y gũusg zĩ-kãnga, tɩ Siri dãmba na n siga beene.»

¹⁰ A Israyɛl dĩma da tʋmda neb Wẽnnaam nedã sẽn wilg zĩig ningã, n maand gũusgu, la pa yɩ vugr bala, bɩ naoor a yi bal ye.

¹¹ Siri dĩma yam waa n yooda ne yell kãnga, t'a tigim a tãnsoaben-dãmba n yeel-ba: «Yãmb pa na n yaa n togs maam ned ninga sẽn be-a yãmb sʋka, n kẽnd n zãmbd tõndo Israyɛl dĩma nengẽ?»

¹² Tɩ ned a ye leoke: «D zu-soab la d dĩma, ad-y ka tõnd ned ba a ye. Yaa a Elize, bãngd ning sẽn be Israyɛl tẽngã. Yẽ tõeeme n togs Israyɛl dĩma gomd ning fãa yãmb sẽn gomd y roogẽ.»

¹³ Tɩ dĩma yeele: «Bɩ y kẽng n tɩ gese a be yɛ, tɩ m kɩt tɩ b yõk-a!» Tɩ b wa yeel-a: «Ade, a bee Dotã.»

¹⁴ Dĩma tʋma wiidi la bilim-bilm la tãb-biis wʋsgo tɩ b wa zembala n gũbg tẽnga ne yʋngo.

¹⁵ A Elize sõgna sẽn yi tõd-beoogo, a yãee tãb-biisi sẽn gũbg tẽngã ne wiidi la bilim-bilm. T'a sõgna sok-a: «M naaba, d na n maana wãna?»

¹⁶ T'a Elize leok-a: «Da zoe bũmb ye tɩ sẽn be-b ne tõnd yɩɩda sẽn be-b ne bãmba.»

¹⁷ A Elize pʋʋsame. A yeela woto: «Naaba-Wẽnde, puk-y m sõgna nini t'a yãe!» Soaala-Wẽnd puka a nini la a yãeeme: Ade, tãnga fãa da berga ne wiidi la bugum bilim-bilm sẽn gũbg a Elize.

¹⁸ Siri rãmba sẽn wa a nengẽ, a Elize pʋʋsa Wẽnd n yeele: «M kotame tɩ y lob nin-bãmba zondo.» La Soaala-Wẽnd lob-b-la zondo, wala a Elize sẽn kose.

¹⁹ La a Elize yeel-b lame: «Sor ka be ka ye, la yãmb sẽn baood a soaba ka kẽed tẽn-kãnga ye. Wa-y ka, pʋg-y maam tɩ m yãag y sẽn baood dao ninga nengẽ.» La a peeg-b lame n tɩ kẽes Samari.

²⁰ B sẽn kẽ Samari, a Elize yeelame: «Naaba-Wẽnde, puk-y nin-bãmba nini tɩ b yãe.» La Soaala-Wẽnd puka b nin la b yãeeme la ade, b ra bee Samari tẽnsʋka.

²¹ Israyɛl dĩma yãend-b lame n sok a Elize: «M ba, m kʋ-b bɩ?»

²² T'a Elize leoke: «Yãmb pa na n kʋ-b ye. Yãmb sẽn mi n gũbg b rãmb ne sʋʋs la tãbdo n yõg n kẽes yembdã, yãmb kʋʋd-b lame bɩ? Tẽgen-y dɩɩb la koom b taoore tɩ b rɩ la b yũ la b yaool n leb b zu-soaba nengẽ.»

²³ Dĩma kɩtame tɩ b segl dɩɩb n kõ-b tɩ b rɩ la b yũ, la a yaool n bas-b tɩ b leb b zu-soaba nengẽ. Dẽ tɛka Siri fãadba, pa le tag a Israyɛl soolmẽ ye.

A Elize fãagda Samari rãmb ne kom

²⁴ Dẽ loogr poore, a Ben-Adad, Siri dĩma, tigma a tãb-biis fãa n wa gũbg Samari.

²⁵ Kom kãseng lʋɩɩ Samari, tẽnga sẽn paga yĩnga. Bõang zug waa n daada wanzurf wakɩ koeems pis-nii, tɩ sũm ne wũmbl koosd wanzurf wakɩ koeems a nu.

²⁶ Israyɛl dĩma waa n loogda lalga zugu la pag a yembre kaasame n bool-a n yetẽ:

²⁷ «Sõng-y-m wɛ, m naaba la m dĩma!» Tɩ dĩma leok-a: «Soaala-Wẽnd pa sõng-fo, m na n sõng-f-la ne bõe? Ne kood sẽn dʋr zɛɛgẽ bɩ ne bugsuntung rãam?»

²⁸ La dĩma le paasame: «Bõe la f rata?» Tɩ pagã leoke: «Pʋg kãnga n yeel maam: ‹Wa ne f biigã tɩ d wãb-a rũnna tɩ beoogo d na wãb maam dẽnna.›

²⁹ Tɩ tõnd dʋg mam biigã n dɩ; vẽkembeoogo, mam sẽn yeel-a: ‹Wa ne f biigã tɩ d wãbe,› a solga a biiga.»

³⁰ Dĩma sẽn wʋm paga goama, a kẽesa a futu, la rẽ t'a ra loogda lalga zugu, la nebã yãeeme t'a yeelga sũ-pa-noang fuugu, a futã tẽngre.

³¹ Dĩma yeelame: «Soaala-Wẽnd na sɩbg ma, n le sɩbg n bãge, mam sã n ka rok a Safat biiga a Elize zug rũnna.»

³² A Elize da zĩi a roogẽ tɩ nin-kẽemsa da zĩ n yeg-a, la dĩma waa n tʋma ned a nengẽ. Sõgna ra nan ka paam n ta ye, la Elize zoe n yeela nin-kẽembã: «Yãmb ne-la, nin-kʋʋda biig tʋma ned t'a wa rok m zugu, bɩ y gũus t'a sẽn tʋm a soaba sã n wa bɩ y pag roogã la y ra bas-a t'a kẽ ye. La ade, sãnd ka a zu-soabã n pʋgd-a tɩ d wʋmd a kẽnd rãamda bɩ?»

³³ A sẽn da nan ket n gomd woto, la dĩma sẽn sig a yiri n yeel-a: «Ade, yel-beed kãnga fãa yita Naaba-Wẽnd nengẽ, m yɩta wãna n le maan teegre ne Soaala-Wẽnde?»