2 Rĩm-dãmba 4 - SEBR SÕNGO

A Elize sẽn maane

¹ Daar a ye, bãngdba karen-biig a ye paga n wa n yõk a Elize sɛɛga n yetẽ: «Mam sɩda maana yõore la yãmb mi t'a ra zoeta Naaba-Wẽnde; la ade, a da rɩɩ ned samde t'a soaba wa n na n deeg m kamb a yi n maan a yemse.»

² T'a Elize leok-a: «Bõe la m tõe n maan n sõng-fo? Bɩ f wilg-ma f sẽn tar f zakẽ.» Tɩ paga leoke: «Mam ka tar bũmb m yir sã n ka yũ-noog kaam bilf bala m sẽn tar n zɛɛd m yĩnga.»

³ T'a Elize yeele: «Kẽng n tɩ peng f yags la-vɩɩdo, wa f sẽn tõe tɛka.

⁴ Dẽ poore, kẽ f roogẽ, foom ne f kamba, lɛɛg n pag roogã, la f pʋdg laasã fãa kaam tɩ pidi tɩ f bĩng kɛɛnga.»

⁵ Paga yi-la a Elize nengẽ. A sẽn ta yiri, a tɩ pag a meng ne a kamba roogẽ, tɩ kamba kɩt-a laasã t'a pʋdgd kaama.

⁶ Laasã wa n pidame t'a yeel a biiga: «Le wa ne a to!» Tɩ biiga leoke: «Laag ka ket vɩʋʋg ye!»

⁷ Wakat kãnga kaama yõkame. Paga tɩ togsa Wẽnnaam nedã, t a yeel-a: «Kẽng n tɩ koos kaama n yao f samdã, la foom ne f kamba rɩ ligda sẽn na n kellã.»

Sunamitga biig vʋʋgre

⁸ Daar a ye, a Elize waa n looda Sunem tẽnga. Pag a ye nug sẽn da zãad bool-a lame t'a wa rɩ. Rẽ tɛka a Elize sã n da tũud tẽnga fãa, be la a ra kẽnd n dɩtẽ.

⁹ Paga waa n yeela a sɩda: «Gese mam miime tɩ nin-kãnga sẽn tũud tõnd nengẽ daar fãa wã yaa Wẽnnaam nin-sõngo.

¹⁰ Wa tɩ d me ro-bil bɛoonga zug n kõ-a, la d ning rooga pʋga: gãaga, te-roagendga, goeele la fitila, t'a sã n mii n wat tõnd yiri bɩ a kẽed be.»

¹¹ Daar a ye, a Elize waa yirã n dʋ yĩngr doogã n gãande.

¹² A yeela a sõgna, a Geazi: «Bool Sunem pʋg-sõngã n kõ-ma.» Tɩ sõgna tɩ bool paga tɩ paga wa yals sõgna taoore.

¹³ A Elize yeela a sõgna: «Gom ne paga woto: Fo waooga tõnd ne bũmb wʋsgo, bõe la m tõe n maan f yĩnga? Koɛɛg be sẽn na leok dĩma bɩ tãnsoaba f yĩng bɩ?» La paga leokame: «Mam bee ne m buudu n vɩ bãane.»

¹⁴ T'a Elize le sok a rakõorã: «Bõe la d tõe n maan a yĩnga?» A Geazi leokame: «Ade, paga pa tar biig ye, la a sɩda kʋʋlame.»

¹⁵ A Elize yeelame: «Bool-a t'a wa ka!» Tɩ sõgna bool pagã t'a wa yals dignoorẽ.

¹⁶ T'a Elize yeele: «Vẽere, sasa kãnga, fo na n mobga biiga f nugẽ.» La paga yeelame: «Ayo! M naaba, ra belg-y yãmb yem-poakã n gom sẽn pa sɩd ye!»

¹⁷ Paga yaool n wa rɩka pʋga n dog bi-ribla, la yɩɩ sasa ning a Elize sẽn da wilgã.

A Elize vʋʋgda pʋg-sõnga biiga

¹⁸ Biiga tol n bɩɩme. Daar a ye, tigsg wakato, a babsa a ba pʋʋgẽ.

¹⁹ A waa n kelmame: «M zug wɛɛ, m zugu!» La biiga ba yeela a sõgne t'a tall-a n tɩ kɩs a ma.

²⁰ Tɩ sõgna tall biigã n kẽng a ma nengẽ; la biigã kell n paa a ma naoẽ tɩ ta wĩnto-sʋk t'a na n yaool n ki.

²¹ La a ma rʋ n gãneg-a-la Wẽnnaam neda gãag zugu n n lɛɛg n yi n pag roogo.

²² A bool a sɩda n yeele: «Tʋm-y sõgen t'a wa ne m bõn-yãanga tɩ m wudg ta Wẽnnaam neda nengẽ la m lebg n wa.»

²³ T'a sɩda sok-a: «Bõe tɩ f rat rũnna n ta a nengẽ? Ka ki-paalg kibsa, ka vʋʋsg raar me ye.» Dẽ la paga yeel yã: «Da-bʋ rẽ poorẽ ye!»

²⁴ A kɩtame tɩ b loe bõanga gaare, la a yeela sõgna: «Tall-ma, kẽne la ra tek n yaas sorẽ tɩ m pa kõ-f sor ye!»

²⁵ A rɩka sore, n tɩ ta Wẽnnaam neda nengẽ, Karmɛl tãnga. La Wẽnnaam neda yãee-a lame t'a nan ket yɩɩga, t'a yeel a sõgna Geazi: «Ad Sunem pagã,

²⁶ bɩ f zoe n tɩ seg-a, la f sok-a: ‹F bee laafi, f sɩd bee laafi, f biig bee laafi?› » La pagã leokame: «Laafi bala!»

²⁷ La a sẽn bʋʋg Wẽnnaam nedã, tãnga zugu, a gãda a karsã, t'a Geazi kolg n na n kɩt t'a serge. Tɩ Wẽnnaam neda yeel-a: «Bas-a t'a sɩɩga tara toogo; Soaala-Wẽnd solg-m-la rẽnna n pa togs-m ye.»

²⁸ Tɩ pagã na n yeele: «Maam n kos-y biiga bɩ, m naaba? Mam pa pĩnd n yeel yãmb tɩ y ra belg maam bɩ?»

²⁹ A Elize yeela a Geazi: «Yiki, deeg m dasaarã f nugẽ, n looge! F sã seg ned bɩ f da pʋʋs a ye, la ned pʋʋs-f bɩ f da leok-a ye. Dogl m dasaarã biiga nenga.»

³⁰ La biiga ma yeelame: «M wẽend ne Wẽnde la ne yãmb menga, tɩ mam kõn serg n bas yãmb ye!» La a Elize yik n pʋga pagã.

³¹ A Geazi da renga bãmb taoore, la a tɩ gãnega dasaarã biiga nenga, la wõo menga ka wʋm ye, la bũmb ka maan ye; t'a lɛɛg n wa bʋʋg a Elize n yeele: «Biiga pa nek ye.»

³² A Elize taa yiri, n mik tɩ biiga ra kiime n dig a meng gãagẽ.

³³ A Elize kẽeme n lɛɛg n pag yẽ ne biiga, roogẽ, n yõk Soaala-Wẽnd pʋʋsgo.

³⁴ A Elize dʋʋ gãaga zugu n gãand n bʋʋg biigã, n dɩk a noor n togle biiga noore, a nin n togl a nini, a nus n bogl a nusi, n tẽeg a meng n bʋʋg biigã la biiga yĩns wɩngame.

³⁵ A Elize sigame n kẽnd tẽnga, n gõod dooga pʋga, n pɩkd ka la ka, n le wa rʋ n gãand n bʋʋg biigã tɩ biiga tĩs naoor a yopoe, n puk a nini.

³⁶ La a Elize boola a Geazi n yeel-a: «Bool Sunem pʋg-sõngã.»

³⁷ T'a Geazi bool-a t'a wa sak a Elize. T'a Elize yeele: «Dɩk f biigã.» Pagã kẽeme n wõgemd a taoore n fõgneg a neng tẽnga n yaool n dɩk a biig n yi.

Zom sẽn kʋʋd zẽnem

³⁸ A Elize lɛɛg n waa Gilgal. Kom n da be tẽngã. Bãngdba karen-biis wa n zĩ-la a Elize taoore, t'a yeel a sõgna: «Bɩ f rʋgl rʋg-bedrã n dʋg zẽedo, bãndgba karen-biis yĩnga.»

³⁹ Bãmb nin-yend kẽnga we-kɛɛnga n tɩ bao zẽedo. La a yãee bũmb wa no-raoog-kʋmba t'a tõs n yondg a fuugu, n wa bog ba n dɩk n los zẽeda rʋkẽ. Ned ba a ye ra ka mi a sẽn wa ne bũmb ninga ye.

⁴⁰ B tẽgna neba zẽedã tɩ b yʋbe; b sẽn lem zẽedã b kelmame n yetẽ: «Wẽnnaam nedã, ad zẽnem n be rʋka pʋga!» La b ka tõog n dɩ ye.

⁴¹ T'a Elize yeele: «Tall-y zom n wa kõ-ma!» La a yãk n loba rʋkẽ wã n yeele: «Yãk-y n kõ nebã, tɩ b rɩ.» La zẽnem buud ka le kell rʋka pʋgẽ ye.

⁴² Dao a yembre n yi Baal-Salisa. A waa n kõo Wẽnnaam nedã korgo ne kood rẽems buri. Yaa alkam kɛgeng bur pisi sẽn wẽ ne zom paalga.

⁴³ T'a Elize yeel a sõgna: «Pʋɩ neba tɩ b wãbe!» La a sõgna leokame: «M na n yɩɩ wãna n pʋɩ woto neb sẽn ta koabga?» T'a Elize le paase: «Pʋɩ-b tɩ b wãbe! Naaba-Wẽnd koɛɛg la woto: ‹B na n dɩɩme la na n kellame.› »

⁴⁴ Sõgna pʋɩɩ nebã. B rɩɩme la kellame wala Soaala Wẽnd sẽn da yeele.