2 Rĩm-dãmba 25 - SEBR SÕNGO

Zerizalɛɛm wãab a yiib soaba

¹ A Sedesiyas naama yʋʋmd a wɛ soaba, kiuug piig soaba, kiuuga piig daare, Babilon dĩma a Nabikodonozor, waa ne a tãb-biis fãa n kaoog zabre ne Zerizalɛɛm, a gãnega a tãpo tẽngã noore n tu boko n gũbg-a.

² A gũbga tẽnga n pãb-a tɩ ta a Sedesiyas naam yʋʋmd piig la a ye soaba.

³ Kiuug a naas soaba, a daar a wɛ soaba, kom sẽn wa n wɩng tẽnga fãa, tɩ neba da pa le tar dɩɩbo, b pooga lal-gũbra võore.

⁴ Dĩma yii yʋngo n zoe ne a tãb-biisa fãa, a tũu dagnoor ninga sẽn be lals a yiibã sʋka, naab zẽeda dignoore. Dẽ tɩ Kalde rãmba da gũbga tẽngã, la a rɩka Yamsem Mogra sore.

⁵ Kalde rãmba riga dĩma n paam-a Zeriko tẽn-nabrẽ wã t'a tãb-biisa fãa sẽeg n bas-a.

⁶ Kalde rãmba yõka rĩma n tall a n kẽng Ribla, Babilon dĩma nengẽ, la dĩma kɩtame tɩ b bʋ-a bʋʋdo.

⁷ A kɩtame tɩ b kood a Sedesiyas kamba, a nifẽ, t'a yaool n leo a Sedesiyas nini, n balg-a bãnga, n tall-a n kẽng Babilon.

Yembdo, Babilon tẽnga

⁸ Kiuug a nu soaba, daar a yopoe daare, a Nabikodonozor, Babilon dĩma, naama yʋʋmd piig la a wɛ soaba, a Nebuzaradã, tãnsoaba, la Babilon dĩma komber a yembre, kẽe Zerizalɛɛm.

⁹ A yõoga wẽnd dooga bugum ne na-yirã la Zerizalɛɛm dota fãa.

¹⁰ Kalde dãmba sẽn da be-b ne tãnsoabã, luba lalgã sẽn da gũbg Zerizalɛɛm.

¹¹ A Nebuzaradã wʋka neba b sẽn da bas Zerizalɛɛm tẽngã n loog yembdo ne neb niyns fãa sẽn da wa n nok Babilon dĩma la zãma wã sẽn da ketã.

¹² Tãnsoaba basa talsã kẽer bala, tɩ b send bugsuntung la b kooda.

¹³ Kalde rãmb wãa zũud da-lugã sẽn da be wẽnd dooga noore, ne sĩmsã la zũud ko-sĩngã sẽn da be wẽnd doog sɩmandẽ, la b wʋka zũudã n zɩ n loog Babilon.

¹⁴ La b wʋka lagdã sẽn da tar n ningd tompɛglma, kardã, sʋʋsã, laasã, la teeda fãa sẽn da yaa zũudu tɩ b da tar n maan maan-kʋʋr tʋʋma.

¹⁵ Gũudba naaba wʋka laasã sẽn da tar n wisd tɩdarã, la laas a taabã, la bũmb ning fãa sẽn da ya sãnem la wanzurf.

¹⁶ Sã n yaa zũud da-lugã ne ko-sĩngã la sĩmsã, a Salomo sẽn da maan wẽnd dooga yĩnga, b ka tõog n mag te-bãmb fãa zɩslem ye.

¹⁷ Da-luk a ye fãa woglem da yaa kãntɩɩs piig la a yopoe. B ra paasa b woglem na ta kãntɩɩs a tãabo ne zũudu la b paasa b neerma ne zũud gãmbre la tɩ-biis wa pooloomse sẽn dõog ne zũudu. Zũuda ra-luga ra wẽnda taaba, gãmbs a yiiba me ra wẽnda taaba.

¹⁸ Gũudba naaba yõka a Seraya, maan-kʋʋd kãsenga, n paas a Sefaniya kãsem-pʋgdgã ne zaka noor gũudba a tãabã.

¹⁹ Tẽnga pʋgẽ a yõka ned ninga sẽn da so tãb-biisa yɛla welgre, n paas neb a nu sẽn be dĩma zakẽ, n paas ned ninga sẽn geta tãb-biisa yãkre, n ya tãnsoaba, n paas Zɩɩda tẽnga kamb pisoobe; bãmb fãa da bee Zerizalɛɛm.

²⁰ A Nebuzaradã, gũudba naaba, yõga bãmb fãa n kẽng Ribla, Babilon dĩma nengẽ.

²¹ Yẽ kɩtame tɩ b kood b fãa Ribla, Amat tẽn-peelmẽ. Yɩɩ woto la b wʋk Zɩɩda n yiis a tẽngẽ n tall n kẽng yembdo.

Zɩɩda kombere, a Gedaliya

²² Neba sẽn pa-b tẽnga, Asiri dĩma sẽn bas b rãmba, a Nabikodonozor kõ-b-la a Gedaliya, a Ayikam biiga, a Safã yagenga, t'a yɩ kombere.

²³ Tãnsoaben-dãmba la neba fãa bãngame tɩ Babilon dĩma da yãka a Gedaliya t'a yɩ kombere, tɩ b waa a nengẽ, Mispa: yaa a Ismayɛl, a Netaniya biiga; a Zoana, a Karea biiga; a Seraya, a Tanewumɛt biiga, Netofɛt daoa; a Yazaniya, Maaka daoa.

²⁴ A Gedaliya wẽename n yeel-ba, bãmb ne b poorẽ dãmba: «Da maan-y rabeem ne Kalde rãmba ye. Pa-y tẽngã, sak-y Babilon dĩma, la bũmb kõn maan-y ye.»

²⁵ Kiuug a yopoe soaba sẽn ta, a Ismayɛl, a Netaniya biiga la a Elisama yagenga, na-koms buudu, wa n kʋ-la a Gedaliya n paas Zɩɩda la Kalde rãmba sẽn da be-b ne bãmb Mispa.

²⁶ Dẽ n so tɩ sẽn kell-ba fãa, bɛd woo, bõoneg woo, tãnsoab woo, bãmb fãa zoe Kalde dãmba dabeem n wudg n kẽng Ezipt.

A Zoakẽ yita roogo

²⁷ Zɩɩda dĩm a Zoakẽ sẽn kẽ yembdo tɩ yʋʋm pis-tã la a yopoe, kiuug piig la a yiib soaba, kiuuga rasem pisi la a yopoe daare, Babilon dĩma, a Evil Merodak, kũma dĩma nimbãanega n yiis-a roogo.

²⁸ A goma noog ne-a, n tol n kõt-a zĩig sẽn ya waoogr zĩiga n yɩɩd dĩm dãmb a taaba sẽn da be ne-yẽ Babilon.

²⁹ A Zoakẽ yeesa a yembd futu la a rɩɩ ne Babilon dĩma n tãag a yõor tɛka.

³⁰ Dĩma n ges a yelle wakat fãa, beoog sẽn vẽege, n tãag a kũum.