2 Rĩm-dãmba 24 - SEBR SÕNGO

Zoakim naam Zɩɩda

¹ A Zoakim zamaanẽ, a Nabikodonozor, Babilon dĩma, yiisa tãpo; a Zoakim saka a noore, yʋʋm a tã, n yaool n wa yik n giri.

² Naaba-Wẽnd basame tɩ so-gɩtb sẽn yit Kalde, Aram, Moab la Amon wa tak zabr ne a Zoakim. Yaa Zɩɩda la b ra baood n na n wã wala Naaba-Wẽnd sẽn da wilg ne b bãngdba noore.

³ Rẽ fãa lʋɩɩ a Zɩɩda zugu, t'a Manase yel-wẽna kɩtame tɩ Soaala-Wẽnd yam lak tɩ b ra pa rat n le zĩnd ne bãmb ye.

⁴ Leb n yɩ-la a sẽn daag nin-sõma wã zɩɩm n pids Zerizalɛɛm la Naaba-Wẽnd pa tʋlg n kõ sugri.

⁵ Yɛl a taaba fãa a Zoakim sẽn maane, dẽ fãa pa gʋls a Zɩɩda dĩm dãmba kibara sebrẽ bɩ?

⁶ A Zoakim tɩ saka a saam-dãmba, t'a biiga a Zoakẽ led-a a zaoorẽ.

⁷ Ezipt dĩma pa le yi a soolmẽ ye, tɩ Babilon dĩma da reega a sẽn da so tẽns niynsa fãa n yãmbe, sẽn sɩng Ezipt kʋɩlga n tãag Efrat kʋɩlgã.

A Zoakẽ naam Zɩɩda

⁸ A Zoakẽ da tara yʋʋm piig la a nii a naama deegr wakato; a rɩɩ naam kiis a tã Zerizalɛɛm pʋgẽ; a ma yʋʋr da boondame t'a Newusta, a Elnatã biiga, a ba yir da yaa Zerizalɛɛm.

⁹ A maana sẽn pa ta Soaala-Wẽnd yam wala a ba sẽn da maane.

¹⁰ La wẽnd kãnga, Babilon dĩma, a Nabikodonozor, yiisa tãpo n na n pãb Zerizalɛɛm;

¹¹ la b sẽn gũgb tẽngã, n sege, Babilon dĩma, a Nabikodonozor wa a toore n na n kaoog zabrã.

¹² La Zɩɩda dĩma, a Zoakẽ, rɩka a meng n kɩs Babilon dĩma, yẽ ne a ma, a sõgen-kamba, a kombɛɛmba la a tãnsoaben-dãmba. A Zoakẽ lebg Zɩɩda rĩm tɩ yʋʋm niini la Babilon dĩma, a Nabikodonozor kẽes-a roogo.

¹³ Wala Naaba-Wẽnd sẽn da pĩnd n yeele, a Nabikodonozor wʋka wẽnd dooga arzɛgsa fãa, na-yir arzɛgsa fãa. A wãa sãnem lagda fãa, a Salomo, Israyɛl dĩma, sẽn da rõog wẽnd dooga yĩnga.

¹⁴ A wʋka Zerizalɛɛm tẽnga rãmba, sẽn so-b tʋʋma, tẽnga nin-bɛda, bãmb na ta tus piiga, n paas sẽn mi-b kut tʋʋma, n tõe n maan kʋɩlen-kuri la kʋɩlen-toore. Sẽn ka tar-b tʋʋmde la sẽn ka mi-b tʋʋmd buud ba a ye bal la a bas yã.

¹⁵ A peega a Zoakẽ n kẽng Babilon yembdo, ne naab-ma, na-pagba, sõgen-kamba, tãnsoaben-dãmba, la na-komsa fãa; a wʋk-b-la Zerizalɛɛm n loog yembdo Babilon.

¹⁶ Dakãagba fãa, bãmb tus a yopoe, la sãaba ne yõgsã fãa, bãmb tusri, la tãb-biisa sẽn tar sũuri, Babilon dĩma peeg-b lame n kẽng yembdo.

¹⁷ A Zoakẽ zĩigẽ, Babilon dĩma yãka a saam-bila, a Matãniya, t'a rɩ naam. A teema a yʋʋrã n pʋd-a Sedesiyas.

A Sedesiyas naam Zɩɩda

¹⁸ A Sedesiyas da tara yʋʋm pisi la a yembre a naam deegr wakato; a rɩɩ naam yʋʋm piig la a ye Zerizalɛɛm; a ma yʋʋr da boondame t'a Amutal, a Zeremi biiga, Libna tẽnga

¹⁹ a maana sẽn pa ta Soaala-Wẽnd yam, wala a Zoakim sẽn da maane.

²⁰ La yell bãmb fãa lʋɩɩ Zerizalɛɛm la Zɩɩda zugu, tɩ Soaala-Wẽnd sũur da puuga ne-ba al tɩ b rig-ba n yiis b taoore. A Sedesiyas me waa n yeelame t'a kõn le kẽ Babilon dĩma tãpẽ ye.