2 Rĩm-dãmba 23 - SEBR SÕNGO

A Zowas maneg sõngo

¹ Wẽnd kãnga, dĩm a Zoziyas kɩtame tɩ b bool Zɩɩda ne Zerizalɛɛm nin-kẽemba tɩ b wa sak-a.

² La dĩma kẽnga wẽnd doogẽ ne Zɩɩda la Zerizalɛɛm dãmba fãa, la buuda fãa, talga la na-koambga. Bãmb taoore a karma bũmb ning fãa sẽn da be zooda sebra pʋgẽ. Yaa sebr ning b sẽn yãend wẽnd doogẽ wã.

³ Dĩma da yɛsa yĩngri, geer zugu, Wẽnd taoore; a le kãaba zooda kãabgo, t'a na n tũu Soaala-Wẽnde, a na n saka b noya ne b zãmsga fãa la b saglsa fãa, ne a sũur fãa la a pãng fãa; a na n maana bũmb ning fãa sẽn gʋls sebrã pʋga. La zãma wã fãa wẽename tɩ b na n tũ zoodã kãabgo.

⁴ Dĩma kõ maan-kʋʋd kãsenga, a Ilkiya, ne kãsem-pʋgdgã la wẽnd doog dagno-gũudbã noore, tɩ b yiis wẽnd dooga pʋga teed fãa b sẽn da rõog n na n waoog a Baal, la a Asera, la yĩngri bõn-naands fãa; a yiis-b-la Zerizalɛɛm n yõog-ba Sedrõ longẽ, n wʋk b tompɛglma n tɩ rʋʋg Betɛl.

⁵ A riga maan-kʋʋdba dĩm dãmba sẽn da zĩndig tɩ b kʋʋd maand pʋʋsga zĩisẽ, la Zɩɩda tẽnsẽ la Zerizalɛɛm tẽn-kɩremsã la a riga sẽn da kʋʋd-b maando n kõt a Baal, n kõt wĩndgã, kiuugã, ãdsã la yĩngri teeda fãa.

⁶ A yiisa a Asera ra-peesma wẽnd doogẽ la Zerizalɛɛm pʋgẽ, n tall-a n kẽng Sedrõ longẽ wã, la a yõog-a-la bugum be;

⁷ a Kɩtame t'a lebg tompɛglem, t'a lob tompɛglma talsa yaadẽ; a luba yoaadba rotã sẽn da be wẽnd dooga pʋgã tɩ pagba da wʋgd pɛɛl beene, a Asera yĩngã.

⁸ A boola maan-kʋʋdba fãa sẽn da be Zɩɩda tẽnsa pʋgẽ tɩ b wa, la a sãama zĩisa fãa, maanda sẽn da kʋʋdẽ wã, sẽn sɩng Geba n tɩ tãag Beerseba. Zerizalɛɛm pʋgẽ, a luba maan-kug niyns sẽn da pẽ-b tẽnga kʋɩlensã, bũmb zãnga sẽn da pẽ-b kombere a Zozuwe rẽnna. F sã n kẽedẽ, yaa nug goabga.

⁹ Maan-kʋʋdba sẽn da be pʋʋsga zĩisẽ wã, da pa tar sor n wa kʋ maoong Zerizalɛɛm maan-kugra zug ye, la b da naagda b saam-biisã n dɩt bur sẽn pa ning bɩllã.

¹⁰ A Zoziyas gɩdga sagda yõogr Tofɛt boka sẽn da be Ben-Inom tãn-longã pʋga, woto ned ba a ye ka le yõog a bi-ribla bɩ a bi-pugl bugum, n waoog a Molok ye.

¹¹ A yiisa wiidi wã dĩm dãmba sẽn da gʋʋnd wĩntooga waoogr yĩnga. Wed bãmb ra bee wẽnd dooga dagnoorẽ, zu-soaba a Netã-Melɛk dooga sɛɛga, dĩma zakẽ; a yõoga bugum bilim-bilm niyns sẽn da rɩk n kõ wĩndgã.

¹² Dĩma wãa maan-kug niyns sẽn da be a Akaz bɛongã zugu. Zɩɩda dĩm dãmbã n da me-ba. A wãa a Manase sẽn da me b rãmba wẽnd dooga zãong a yiiba pʋsẽ. Dĩma tus-b lame n lubi, n wã-ba, n wʋk b toma n tɩ lob Sedrõ tãn-longa pʋga.

¹³ A Zoziyas sãama pʋʋsga rotã sẽn da tot ne Zerizalɛɛm, n be Oliviye tãnga nug rɩtgo, Israyɛl dĩma a Salomo sẽn da me n na n waoog wẽn-poak a Astarte, Sidõ kẽedba wɩɩbdã, a Kemos, Moabitsa yel-yoogã, la a Milkom, Amonitsa bõn-dẽgdã.

¹⁴ A Zoziyas wãa kug-peesma, n kʋʋs ra-peesdi wã, n wʋk ninsaalba kõaba n bus b zĩigẽ.

Samari manegre

¹⁵ A Zoziyas le sãama maan-kugr ning sẽn be Betɛl, A Nebat biig a Zeroboam, sẽn me a soaba n lub a Israyɛl yel-wẽnd pʋgẽ wã. A sãam-a lame, n wã kugã, n wer-b tɩ b lebg zom, la a yõoga ra-peesma bugum.

¹⁶ A Zoziyas waa n wẽnemda a nenga n yãe yaadã sẽn da be tãnga zugu la a tʋmame tɩ b tɩ wʋk yaada kõaba n wa yõog-b maan-kugra zugu. A mana woto n dẽgem maan-kugrã la woto a taasa bãngd a ye sẽn da pĩnd n togse.

¹⁷ A Zoziyas le sokame: «Yaa ãnda yaoog kugr n tond tɩ m neẽ wã?» Tɩ tẽnga neb na n yeele: «Yaa bãngd a ye sẽn yi Zɩɩda tẽng yaoogo la bãngd kãng n da pĩnd n togs fo sẽn maan mars-marsã kaalẽ, maan-kugra poorẽ wã.»

¹⁸ T'a Zoziyas na n yeele: «Bas-y yao kãnga, bɩ ned ba a ye da sɩɩs bãngda kõab ye!» La woto b pa sɩɩs a kõaba wala b sẽn pa sɩɩs Samari bãngda me kõabã.

¹⁹ A Zoziyas kɩtame tɩ b sãam wẽnd dota fãa, a Israyɛl kamba sẽn da me Samari tẽns pʋsẽ n puug Naaba-Wẽnd sũurã; a maana ne bãmba, wa a sẽn maan Betɛl.

²⁰ A Zoziyas kooda maan-kʋʋdba sẽn da be pʋʋsga rotẽ wã, la a yõoga ninsaalb kõaba maan-kuga zutu. A lɛɛg n waa Zerizalɛɛm.

²¹ Dĩma kõo neba fãa noor kãnga: «Maan-y pak kibsa Soaala-Wẽnd waoogr yĩnga, wala b sẽn gʋls tɩ b maan bũmb ninga zood sebra pʋgẽ.»

²² B ra pa le maan pak kibs a woto buudu al bʋ-kaoodba zamaanẽ ye.

²³ Yaa a Zoziyas naam yʋʋmd piig la a nii soaba bala la b maan pak kãnga buudu n waoog Naaba-Wẽnd, Zerizalɛɛm.

²⁴ N paas me, sẽn boond b kɩɩmse, bagba, la tɩto, la tẽn-kuga, la yel-yoodã fãa b sẽn da tõe n yãend Zɩɩda soolmẽ la Zerizalɛɛm pʋgẽ, a Zoziyas yiisa bãmb fãa, n na n tũ Noora goama sẽn gʋls sebra pʋgã, sebr ninga maan-kʋʋd a Ilkiya sẽn yãend wẽnd dooga pʋgã.

²⁵ Dĩm ba a ye pa reng n zĩnd pĩnda sẽn tũ Soaala-Wẽnd ne a sũur fãa la a pãng fãa la a sak a Moyiiz Noor ne pʋ-peelem wa a Zoziyas ye, la yẽ poore, a to pa zĩnd sẽn wẽneg-a ye.

²⁶ La ne rẽ fãa, Soaala-Wẽnd sũ-puur kãsengã da ket n yãnga ne Zɩɩda tʋʋm yoodã a Manase sẽn maan n bao b noorã. B sũura pa sig ye.

²⁷ Soaala-Wẽnd yeelame: «Mam na n yiisa Zɩɩda m taoore, wala m sẽn yiis Israyɛl, mam na n daaga tẽngã mam sẽn da tũus a soabã n base, n bas Zerizalɛɛm ne wẽnd doog ning mam sẽn da yeel tɩ na n yɩɩ m naam la m waoogr zĩiga.»

²⁸ A Zoziyas sẽn maan fãa, rẽ fãa pa gʋls dĩm dãmba kibar sebr pʋgẽ bɩ?

²⁹ A Zoziyas zamaanẽ, A Nekao, Ezipt dĩma, kẽng n na n tɩ sega Asiri dĩma, Efrat kʋɩlga sẽnẽ. Dĩma a Zoziyas yika zabr ne-a, a tʋlgame n gɩdg-a, la Nekao kʋ-la a Zoziyas, Megido tẽnga.

³⁰ A sõgen-kamba rɩka a yĩnga ne bilim-bilm, Megido, n le tall-a n wa Zerizalɛɛm, n mum-a yaoogẽ, la tẽnga rãmba rɩka a Zoziyas biiga, a Zoakaz, n pʋdg a zug naam kaam, t'a rɩ naam a ba zaoorẽ.

A Zoakaz naam Zɩɩda

³¹ A Zoakaz da tara yʋʋm piig la a tã, a naam deegr wakato; a rɩɩ naam kiis a tã, Zerizalɛɛm, a ma yʋʋr da boondame t'a Amutal, a Zeremi bi-pugla, a ba yir da yaa Libna.

³² A maana sẽn pa ta Soaala-Wẽnd yam ba bilfu, wala a saam-dãmba sẽn da maane.

³³ A Nekao yõk-a lame n balg-a bãeense, Ribla, Amat tẽn-peelmẽ, la a saaga a tẽnga yaoodo, wanzurf sẽn ta neb koabg la pis nu zɩɩbo, la sãnem sẽn ta neb piig la a nu zɩɩbo.

³⁴ A Nekao zĩndiga a Eliyakim, a Zoziyas biiga, t'a rɩ naam a ba zaoorẽ la a teka a yʋʋr n pʋd t'a Zoakim, la a Zoakaz tall-a lame n kẽng Ezipt t'a tɩ ki beenẽ.

³⁵ A Zoakim yaoo Ezipt dĩma wanzurfa la sãnema; la sẽn na n yɩ-la n paam ligdã n kɩse, a kong n saaga a tẽnga rãmb yaoodo. Ned kam fãa ra kɩta a sẽn tare, wanzurf bɩ sãnem, t'a reeg n kɩs a Nekao.

³⁶ A Zoakim da tara yʋʋm pisi a naam deegr wakato; a rɩɩ naam yʋʋm piig la a yembre, Zerizalɛɛm, a ma yʋʋr da boondame t'a Zebuda, a Pedaya biiga, a ba yir da yaa Ruma.

³⁷ A maana sẽn pa neer Soaala-Wẽnd nifẽ, wala a saam-dãmba sẽn da maane.