2 Rĩm-dãmba 21 - SEBR SÕNGO

A Manase naam Zɩɩda

¹ A Manase da tara yʋʋm piig la a yi a naam deegr wakato la a rɩɩ naam yʋʋm pis-nu la a nu Zerizalɛɛm. A ma ra boondame t'a Efsi-Ba.

² A maana sẽn pa sõmb Naaba-Wẽnd nifẽ, a togsa bu-zẽmba tʋʋm yooda fãa, bu-zẽn niyns Soaala-Wẽnd sẽn da rig b rãmba n zãag a Israyɛl taoore.

³ A le mee pʋʋsg rot niynsi a ba a Ezekiyas sẽn da lub b rãmbã la a lugla maan-kugri a Baal yĩnga, la a sela da-peesdi, wala Israyɛl dĩma, a Akab. A wõgemdame la a waooga yĩngr ãdsã.

⁴ A mee maan-kug wẽnd doogẽ wã, la Soaala-Wẽnd da yaool n yeelame: «Yaa Zerizalɛɛm la m maand m belem la m waoogr zĩiga.»

⁵ A mee maan-kuga, yĩngri teedã fãa waoogr yĩnga, wẽnd dooga zags a yiiba pʋsẽ.

⁶ A kɩtame t'a biig a ye pɩʋʋg bugum, a boola zĩn dãmba, a kẽe tẽn-kuga, a zĩndga neb sẽn sogsd kɩɩms la bagba. A sãama Soaala-Wẽnd sũuri ne a manes yoodã.

⁷ A ninga a Asera nin-naand a meng sẽn kɩt tɩ b rõoge la a ning-a-la wẽnd doogẽ wã. Soaala-Wẽnd da yaool n yeela a Daviid ne a biiga a Salomo woto: «Yaa wẽnd doogã la yaa Zerizalɛɛm la m yãk Israyɛl tẽnsa fãa sʋka, n maan m belem la m waoogr zĩiga, zamaan woo zamaana.

⁸ Woto m kõn le tall a kambã n zãag ne tẽng ning m sẽn kõ b ba rãmba ye. La rẽnd bãmb me modg n maan m sẽn yeel bũmb ninga fãa, n tũ noor ning m sẽn kõ m sõgen a Moyiiz.

⁹ La bãmb pa sak ye, a Manase kẽes-b-la weoogo, al tɩ b maan wẽnga n yɩɩg bu-zẽn niynsi Naaba-Wẽnd sẽn menes a Israyɛl taoore.»

¹⁰ Naaba-Wẽnd goma ne bãmba ne b sõgen-kamba la bãngdba noore n yetẽ:

¹¹ «Zɩɩda dĩm a Manase sẽn tʋm tʋm yood yĩnga, n maan wẽng n yɩɩg Amonitsa sẽn deng b yẽ wã, la a tus a Zɩɩda me t'a naag yẽnda n maan yel-wẽnde ne a wẽn-naandsã,

¹² Naaba-Wẽnde, a Israyɛl Wẽnnaam, koɛɛg la woto: ‹Mam na n waa ne a Zɩɩda la Zerizalɛɛm zugu yel-beed a ye, ali tɩ ned ning fãa sẽn na n wʋm-a bɩ a tʋb a yiiba fãa naag n kʋre.

¹³ Mam na n wãa Zerizalɛɛm wa m sẽn wã Samari. M na n sarma Zerizalɛɛm wala m sẽn sarem a Akab roogo. M na nedg Zerizalɛɛm wala b sẽn nedg lengr pʋg la a poore.

¹⁴ Mam na n daaga a neb sẽn kellã n base; mam na n yõk-b lame n ning b bɛɛba nugẽ, bãmb na n yɩɩ b bɛɛb mogbo la b dɩɩbo,

¹⁵ la rẽ yaa b sẽn maan tɩ pa ta m yam, la b kɩt tɩ m sũur puugi, sẽn sɩng b saamb dãmb sẽn yi Ezipt tẽnga n tãag dũnna.› »

¹⁶ A Manase naagame n daag zɩɩm, neb sẽn ka tar b toorẽ yell zɩɩm, al n pid Zerizalɛɛm zãnga, tɩ b pa gomd a sẽn kɩt t'a Zɩɩda maan sẽn ya wẽng woo wẽnga, Naaba-Wẽnd taoore.

¹⁷ A Manase sẽn maana fãa, rẽ fãa pa gʋls Zɩɩda dĩm dãmba kibar sebr pʋgẽ bɩ?

¹⁸ A Manase tɩ saka a saam-dãmba, b mum-a-la zẽed sẽn da be a zaka pʋgẽ, a Uza zẽedẽ wã, a biiga Amon n led-a a zaoorẽ.

A Amon naam Zɩɩda

¹⁹ A Amon da tara yʋʋm pisi la a yi, a naam deegr wakato, la a rɩɩ naam yʋʋm a yiib Zerizalɛɛm, a ma yʋʋr da boondame t'a Mesullemet, a Arus biiga, a ba yir da yaa Yotba.

²⁰ A maana sẽn pa ta Soaala-Wẽnd yam, wala a ba, a Manase, sẽn maane.

²¹ A togsa a ba a Manase n waoog wẽn-naandse la a wõgemda bãmb taoore.

²² A basa Naaba-Wẽnd, a saam-dãmba Wẽnnaam, la a pa tũ b sor ye.

²³ A Amon poorẽ dãmba yẽsa ne taaba n na n lub-a, la b kʋʋ dĩma, a zakẽ.

²⁴ La tẽnga rãmb kʋʋ neb niyns fãa sẽn da yẽs-b ne taaba n na lub dĩma la b kɩtame t'a biiga a Zoziyas rɩ naam a zaoorẽ.

²⁵ Tʋʋm a taabã a sẽn maana, dẽ fãa pa gʋls Zɩɩda dĩm dãmba kibar sebr pʋgẽ bɩ?

²⁶ B mum-a-la a ba yaoogẽ, a Uza zẽedẽ wã la a biiga a Zoziyas n led-a a zaoorẽ.