2 Rĩm-dãmba 20 - SEBR SÕNGO

A Ezekiyas bãaga

¹ Dasem kãense, a Ezekiyas lʋɩɩ bãag sẽn da tõe n yãk yõore. Bãngd a Izayi, a Amos biiga, tɩ yeel-a lame: «Naaba-Wẽnd koɛɛg la woto: ‹Bɩ y maneg y zak yɛla tɩ y na n kiime, y kõn le vɩɩnd ye.› »

² La a Ezekiyas, wẽnemdame n tees lalga n pʋʋs Naaba-Wẽnde n yetẽ:

³ «M yõkd y sɛɛga, tẽeg-y tɩ m kell n talla m menga, m manesem fãa pʋgẽ, ne zemsgo la pʋ-peelem, yãmb taoore, la m maana sẽn da noom y sũuri.» La a Ezekiyas kelmame t'a nintãm sodge.

⁴ La a Izayi da nan pa yi na-zaka pʋg ye, la Naaba-Wẽnd le taas-a-la gomd kãngã:

⁵ «Lebg n tɩ yeel woto a Ezekiyas, mam buuda naaba: ‹Ad Naaba-Wẽnd, f saamba a Daviid Wẽnda, gomde: M wʋma f pʋʋsgo; m yãenda f nintãm; mam na n sãoog-f lame, ka la dasem a tã fo na n kẽnga wẽnd doogẽ.

⁶ Mam na n le paasa f pʋlemd yʋʋm piig la a nu, mam na n fãaga-foo, foom ne f tẽngã, Asiri dĩma nugẽ; mam na n gũ tẽn-kãngã, mam maasem la m tʋʋm-tʋmd a Daviid maasem yĩnga.› »

⁷ A Izayi, yeelame: «Wã-y ne kankam miisgu.» Tɩ b wa ne, la b yãkame n bɛ naaba nodre, la naab sãoogame.

⁸ Dẽ t'a Ezekiyas da reng n soka a Izayi: «Bõe n na n yɩ makre tɩ m bãng tɩ Soaala-Wẽnd na n sãooga maam la ka ne dasem a tã m na n kẽnga wẽnd doogẽ?»

⁹ A Izayi leoka me: «Ad Soaala-Wẽnd sẽn yeel tɩ b kõ f makre ninga tɩ f bãng tɩ b na n pidsa b kãabgo: Fo ratame tɩ wĩndga maasem kẽng taoore bɩ a leb poorẽ nug yakem piiga!»

¹⁰ A Ezekiyas leokame: «Maasema kẽng taoore nug yakem piiga ka toog ye. Ayo! A leb poorẽ nug yakem piiga!»

¹¹ A Izayi pʋʋsa Soaala-Wẽnde, la bãmb kɩtame tɩ maasem woog n leb poorẽ nug yakem piiga a Akaz yĩngr dooga teedsa zugu.

A Merodak-Baladã

¹² Wẽnd kãnga, a Baladã biig a Merodak-Baladã, Babilon dĩma, tʋma sɛba ne kũuni tɩ b wa pʋʋs a Ezekiyas, t'a da wʋma a ka laafi wã kibare.

¹³ A Ezekiyas, sũur yɩɩ noogo, la a wilga b sẽn tʋʋm b rãmbã, doog ning a sẽn bĩngd a wanzurfã, a sãnema, a tɩdarã, a yũ-nood kaama, la zab teedã la a laoga fãa. Bũmb ka zĩnd na-yiri la a soolma pʋga a sẽn pa wilg-b ye.

¹⁴ La bãngda, a Izayi, waa dĩma nengẽ n sok-a: «Sãamba yeelame tɩ bõe la b yii yɛɛlẽ n wa f yiri?» T'a Ezekiyas leoke: «B yii tẽn-zãorgẽ, al Babilon.»

¹⁵ T'a Izayi le sok-a: «B yãee bõe fo zakẽ?» La a Ezekiyas leokame: «B yãee bũmb ning fãa sẽn be na-yiri, bũmb pa be m teeda rotẽ mam sẽn pa wilg-b ye.»

¹⁶ La a Izayi yeela a Ezekiyas: «Bɩ f kelg Soaala-Wẽnd gomde:

¹⁷ Ade, daar n wate, tɩ bũmb ning fãa sẽn be f zakẽ la f saam-dãmba sẽn bĩng laog ning fãa n ta rũnna, b na n wʋk-b lame n kẽng Babilon la b kõn bas bũmb ye. Soaala-Wẽnd n gomd boto.

¹⁸ B na n wʋka f kamb wʋsgo, kamb fo meng sẽn doge, n kẽng tẽn-zẽngẽ. B na n yãka kẽere n maan zu-soaben-dãmba, tɩ b zĩ Babilon dĩma zakẽ.»

¹⁹ A Ezekiyas yeela a Izayi: «Soaala-Wẽnd gomdã f sẽn togsã yaa sõmbo» A tagsa a sũurẽ: «Gomda yaa sõmbo tɩ m na n kell n yãee laafi la yĩn-maasem m vɩɩmẽ.»

²⁰ A Ezekiyas tʋʋm a taabã, a sẽn me ko-baoor la ko-sore n na n tak koom n wa tẽnga pʋgẽ, dẽ fãa pa gʋls a Zɩɩda dĩm dãmb kibara sebr pʋgẽ bɩ?

²¹ A Ezekiyas tɩ saka a saam-dãmba la a biiga a Manase n led-a a zaoorẽ.