2 Rĩm-dãmba 19 - SEBR SÕNGO

A Ezekiyas teegre

¹ Dĩma a Ezekiyas sẽn wʋm woto, a kẽesa a futu, n yeelg sũ-pa-noang futu n kẽng wẽnd doogẽ,

² la a tʋma sõgen-kãsenga a Eliakim, la sɛb-gʋlsda a Sebna la maan-kʋʋdba kãsem-dãmba tɩ bãmb me yeelg sũ-pa-noang futu n kẽng bãngd a Izayi, a Amos biiga nengẽ.

³ A yeelame: «A Ezekiyas koɛɛg la woto: Dũnna yaa sũ-sãang daare, sɩbgre la yãnd daare. A Israyɛl kamba kũmda rogem, la pãng ka n na n dog ye.

⁴ Wẽnd na kɩt tɩ Naaba-Wẽnd, fo Wẽnnaam wʋm sõgen-kãsenga goama, Asiri dĩma sẽn tʋm a soab t'a wa tʋʋs Soaala-Wẽnde. Wẽnd na kɩt tɩ gom-bãmba paam b sɩbgre. Maan pʋʋsgo n kõ a Israyɛl kamba sẽn ket-bã.»

⁵ Dĩma Ezekiyas na-yir dãmba sẽn ta a Izayi nengẽ,

⁶ a yeel-b lame: «Tɩ yeel-y yãmb zu-soaba: Wẽnd koɛɛg la woto: ‹Da zoe-y goama y sẽn wʋma dabeem ye, ne tʋya fãa Asiri sõgen-kãsenga sẽn tʋ maama dabeem ye.

⁷ Dĩma na n wʋma kibare, tɩ leb yiri n tɩ ges bõe n be, waa a yamẽ; la be, a soolmẽ, sʋʋg n na kodg-a.› »

⁸ Tãnsoaba sõgen-kãsenga wʋmame tɩ Asiri dĩma da yii Lakis n looge. Dẽ la a bʋʋg-a Libna, a sẽn tɩ zabd zĩig ningã.

⁹ Kibar ninga a sẽn da wʋm Kus dĩma, a Tiraka, poorẽ da yaa woto: A Tiraka wat n na n zaba ne foo. A Senakerib le tʋma neba tɩ b wa a Ezekiyas nengẽ la woto la a gom ne a sẽn tʋm b rãmbã: «Tɩ gom-y ne a Ezekiyas, Zɩɩda dĩma, woto:

¹⁰ Bɩ f Wẽnnaam, fo sẽn teeg a soaba da belg-fo, n yet tɩ Zerizalɛɛm kõn lʋɩ Asiri dĩma nugẽ ye.

¹¹ Fo wʋma Asiri dĩm dãmba sẽn maan tẽnsa fãa bũmb ninga, n kãab b fãa beedo, tɩ fo yẽ tẽed tɩ f na põse?

¹² Mam saam-dãmb sẽn sãam soolem niynsã, bãmb wẽnd dãmba sõng-b-la wãn wãna? Gozã, Arã, Resɛf, Edenitsa sẽn da be-b Telasar,

¹³ Amat dĩma, Arpad, Layir, Sefarwayim, Ena la Iwa dĩm dãmba bɛɛ?»

¹⁴ A Ezekiyas reega sebrã b sẽn tʋm b rãmba nugẽ n karem. A dʋʋ wẽnd dooga sẽn be zĩig ningã n lak sebrã n dɩgl Naaba-Wẽnd taoore.

¹⁵ A Ezekiyas maana pʋʋsg kãnga: «Israyɛl Wẽnnaam sẽn zao sa-gãnẽ, yaa yãmb bal la tẽng zug dĩm dãmba fãa Wẽnnaam. Yãmb n naan saaga la tẽnga.

¹⁶ Yoog-y y tʋbre n kelge, Soaala-Wẽnde, la y puk-y y nini n gese. Naaba-Wẽnde, kelg-y dĩm a Senakerib goama, a tʋmame tɩ b wa tʋʋs yãmba, sẽn vɩ-ba fãa Wẽnnaam!

¹⁷ Naaba-Wẽnde, Asiri dĩm dãmba menesa ninsaalb buudu wʋsgo, yaa sɩda,

¹⁸ b yõoga b wẽn-naandsa bugum, tɩ b da ka Wẽnd ye, da yaa ninsaalb nus tʋʋmde, daoog bɩ kugri, yaa rẽ yĩnga la Asiri dĩm dãmb tõog n wã-ba.

¹⁹ La marsã, Naaba-Wẽnde, fãag-y tõnd a nusẽ; m yõkd y sɛɛga, bɩ y fãag tõnd a Senakerib nugẽ tɩ tẽng zug dĩm dãmba bãng tɩ yãmb bal la Wẽnnaam.»

A Izayi leokre

²⁰ Wakat kãnga, a Izayi, a Amos biiga, tʋmame tɩ b tɩ yeel a Ezekiyas: «Naaba-Wẽnde, a Israyɛl Wẽnnaam, koɛɛg la woto: Mam wʋma f pʋʋsgã f sẽn taas maama, Asiri dĩm, a Senakerib poorẽ wã.

²¹ Ad koe-beed ning Soaala-Wẽnd me sẽn leokd-a: Ad bi-puglã, a Siõ bi-pugla laada foom, a toog ka be ne f ye. Wẽnemd f poor n ges a sẽn yĩgsd foom, ges Zerizalɛɛm pa-kula sẽn laad foom.

²² Yaa ãnda la f tʋʋs yã, ãnda la f paoog yã? F zẽka f koɛɛga ne ãnda, ãnda la f get la f sãbsdẽ? Yaa a Israyɛl Wẽnnaama, yaa mam menga la f tʋʋsyã.

²³ Ne f sẽn tʋʋm b rãmba noore la f tʋʋs Soaala-Wẽnde. Fo yeelame: ‹M bilim-bilma tĩig rʋʋs-m-la yĩngri, maam a Senakerib dʋ tãmse, m kẽe Libã tẽnsʋka n tɩ kɛɛ a tɩ-wogdã, n lub a tɩɩsã sẽn lugã, m saaga a tãmsa fãa, m saaga a tʋgra fãa.

²⁴ Mam tuu bulsi n yũ bu-zẽn koom, m tabame n kʋɩɩs ne m nao Ezipt ko-soya fãa.›

²⁵ Fo ka mi-la, Senakerib, tɩ yaa al daar zãra, la maam a Naaba-Wẽnd sed m sɛdga, la m sẽn seda la m pidsd dũnna. M da bĩnga foo tɩ f wa sarem tẽnse, tẽns sẽn me lals n gũbgi.

²⁶ Tẽnga rãmb nus ka pãng ye, b komsame n zĩ ne yãnde, b lebga wa pʋt moodo, b lebga wa luiili-saase, n lebg kar-kar wa gaosg zug moogo, n lebg wa wãoong sẽn dɩ kood niynsi tɩ b nan ka paam n bɩ zãngã.

²⁷ Bãng tɩ m mi-f-la zãnga. Bãng tɩ f zĩ, bɩ f yit la f kẽedẽ, f sã n zĩi n digd la f yãbd sũ-toogo m mii fãa.

²⁸ Ade, fo yik n zabda ne maam m wʋma f sẽn tãoosd raoodã, m yãenda f sẽn maan tɩtaama. Dẽ me la m na n yõg-f wa weefo n vʋdg f yõore n sog bãnga, n yaag f noor n ning salbre. Woto f sẽn tũ sor ning n wa wã so-kãng la f na n tũ n lebe.

²⁹ Ade woto n na n yɩ makre n yɩ makr fo yĩnga, Ezekiyas: Doanna, yãmb na n dɩɩ koodo, kood sẽn yi a toore. Vẽer me na n yɩɩ boto. Yʋʋmd ninga sẽn pʋgdã, y na bʋde la y kẽeb y koodo, n sel y bugsuntundu n dɩ b biisi.

³⁰ La sẽn kell Zɩɩda roogẽ, sẽn põs fãa na n kɩɩ yẽgna, n kɩ yẽgen tẽngre, wa tɩɩga, la b wila na n woma biisi.

³¹ Zerizalɛɛm pʋgẽ, kelle n na n keese, la Siõ tãnga zugu põasg n na n põse. Wẽnd pãngã n na n tʋm dẽnna.

³² Sã n ya Asiri dĩma poorẽ woto la Soaala yeta: A kõn kẽ tẽn kãnga ye. A kõn tão pĩim ye. A kõn zẽk a gãong ye. A kõn sam tãndo m paam n kẽ ye.

³³ A sẽn tũ sor ning n wa, so-kãng la a na n le tũ n kuli. Soaala-Wẽnd n yeele: A kõn kẽ tẽn-kãnga ye, m sẽn nong a Daviid yĩnga.

³⁴ Mam na n gũu tẽngã, la m na fãag Zerizalɛɛm, tɩ maam la Naaba-Wẽnde!»

A Senakerib kũum

³⁵ La yʋn-kãng bala, Wẽnd malɛka yiime, la a wẽ Asiri dãmba tãb-sika; la a pʋgẽ, neb tus koabga la pis-nii la a nu n ki. Beoog sẽn vẽege, da yaa kũum ne kũum n diga.

³⁶ A Senakerib kɩtame t'a tãb-biis yiki la a kulame. A leba Niniv n tɩ pa beene.

³⁷ La daar a ye, a da wõga a wẽnd, a Nisrok, roogẽ t'a meng kom-dibli a yi, a Adramelɛk la a Sarezɛr, kɛ-a ne sʋʋga n yi n zoe n kẽng Ararat tẽnga, t'a biiga a Asaradõ led-a a zaoorẽ.