2 Rĩm-dãmba 18 - SEBR SÕNGO

A Ezekiyas naam Zɩɩda

¹ Yaa a Ela biiga a Oze, Israyɛl dĩma, naama yʋʋmd a tãab soaba la a Ezekiyas, a Akaz biiga, lebg Zɩɩda dĩma.

² A naama sɩngrẽ t'a ra tara yʋʋm pisi la a nu; a rɩɩ naam yʋʋm pisi la a wɛ Zerizalɛɛm; a ma yʋʋr da boondame t'a Abi; a ra yaa a Zakari biiga.

³ A maana sẽn noom Soaala-Wẽnd sũuri, n togs a saamba, a Daviid, sẽn maane.

⁴ Yẽ m sãam pʋʋsga zĩisi, n wã tẽn-kuga fãa, la a kɛ da-peesdi wã fãa n kʋʋse, la a wã zũud waafã a Moyiiz sẽn da maana. Bãng-y tɩ Israyɛl kamba da yik n yõogda tɩdare, zũud waafa taoore, n ta a Akaz biiga waoongo la b da boond-a zũud waafa t'a Newustã.

⁵ Yaa Naaba-Wẽnd, a Israyɛl Wẽnnaam bala, la a Ezekiyas da teegre. Yẽ poore, dĩm a to ka zĩnd Zɩɩda pʋgẽ sẽn wẽneg a ye, la pa zĩnd pĩnd me ye.

⁶ A kẽe Soaala-Wẽnde, n pa tol n yi b poorẽ, abada.

⁷ A tũu noy-niyns fãa Soaala-Wẽnd sẽn da kõ a Moyiiz. Yaa rẽ n so tɩ Soaala-Wẽnd pa ne-a, daar fãa, al t'a sẽn maan fãa zĩnd barka. A zẽka a zug ne Asiri dĩma, a pa le sak-a ye.

⁸ Yẽ n pãb Filisti rãmba n tɩ tãag Gaza, n sãam b tẽngã, n lub tãb-gũudba roto la tãnsoben-doto.

⁹ A Ezekiyas naama dɩɩb yʋʋmd a naas soaba, a Ela biiga a Oze, a Israyɛl dĩma, sẽn sɩng a naama rɩɩbo tɩ yʋʋm maan a yopoe, a Salmanazar, Asiri dĩma, waa n kaooga zabre ne Samari, n gũbg-a n pãbe.

¹⁰ Yʋʋm a tã pʋgẽ la b tõog-a. A Ezekiyas sẽn deeg naam tɩ yʋʋm yoaablẽ, t'a Oze rɩt naam tɩ yʋʋm wɛɛlẽ la b tõog Samari.

¹¹ Asiri dĩma wʋka Israyɛl kamba n kẽng pa-weere, Asiri, n tɩ zĩndig-b Ala, Abor, Gozã kʋɩlga noore, la Mɛd rãmba tẽns pʋsẽ.

¹² La yaa bãmb sẽn pa sak Naaba-Wẽnd gomdã, bãmb Wẽnnaam gomdã, la zooda sẽn sãama. A Moyiiz, Wẽnd tʋʋm-tʋmda, sẽn da yeel bãmb bũmb ningã, b pa kelge, b pa tũ gomd ba a ye.

A Senakerib zaba

¹³ Dĩm a Ezekiyas naama piig la a naas yʋʋmde, a Senakerib, Asiri dĩma, taka zabre ne Zɩɩda tãnsoben-tẽnsã, n tõog-ba.

¹⁴ A Ezekiyas, Zɩɩda dĩma, tʋmame tɩ b yeel Asiri dĩma Lakis tẽnga: «Mam pa maan neer ye, m kotame tɩ y ra maam zabr ye; mam na n saka yãmb sẽn na n kõ-m noor ning fãa.» La Asiri dĩma kõ-la a Ezekiyas, Zɩɩda dĩma, noore t'a bao wanzurf sẽn ta neb kobs-naas la pis-nu zɩɩbo, la sãnem sẽn ta neb pis-naas la a nu zɩɩbo.

¹⁵ La a Ezekiyas kɩs-a-la ligd ning fãa sẽn da be wẽnd doogẽ, la naaba ligda kogendẽ.

¹⁶ Yaa wakat kãnga la a Ezekiyas lags sãnema dĩma a ye sẽn da tablg wẽnd doog kʋɩlensã n dɩk n kɩs Asiri dĩma.

A Senakerib rata Zerizalɛɛm

¹⁷ La Asiri dĩma zĩnda Lakis n tʋm a Ezekiyas nengẽ, a tãnsoaben kãsenga ne a pʋgdga la tãb-biis wʋsgo. B fãa waa Zerizalɛɛm, la b sẽn ta be, b yalsa ko-sor ning sẽn takd kooma n wat ko-baoor ning sẽn be fu-pɛgdba pʋʋga sora noorã.

¹⁸ B bolga dĩma, tɩ na-yiri sõgen-kãsenga, a Eliyakim, a Ilkiya biiga n paas seb gʋlsda a Sebna, la no-rɛɛs a Zoa, a Asaf biiga, yii n bʋʋg-ba.

¹⁹ La tãnsoab kãsenga yeel-b lame: «A Ezekiyas tog n bãngame tɩ dĩm kãsengã, Asiri dĩma, gomda woto: ‹Yaa bõe teegre la f teeg yã?

²⁰ Fo tẽedame tɩ noor gomd bal seka a kõ-f raoodo la sɩlem sẽn na n kiis zabr bɩ? Pʋs n yaa ãnd la f teeg yã n yik n zẽkd f zug ne maam?

²¹ Ad-fo teega Ezipt rudum kãoongã sẽn sorgd ned ning fãa nug sẽn tikd-a. Woto la Ezipt dĩma maand ne ned ning fãa sẽn teegd-a!

²² Daare, yãmb na n yeelame: Tõnd teega Naaba-Wẽnd, tõnd Wẽnnaam; la ka bãmb yẽne wẽnd doogo la foom a Ezekiyas sẽn lubã la f kõ Zerizalɛɛm la Zɩɩda rãmba noor tɩ b ra le waoog Naaba-Wẽnd sã n ka Zerizalɛɛm maan-kugra taoor bɩ?

²³ Be neere, bɩf maan sardo ne m zu-soaba, Asiri dĩma, mam na n kõ foom wiidi tus a yi, fo sã n tõe n yãe wed-dʋʋdba sẽn na n zomb-ba.

²⁴ Fo pãng bɛɛ tɩ f tõe n tus mam zu-soaba komber a ye, a sõgen bil a ye menga t'a serge. Bõe tɩ f teeg Ezipt dĩma, n gũud bilim-bilm la wed-dʋʋdba?

²⁵ La y tẽedame tɩ ka sẽn zems ne Naaba-Wẽnd daabo la m sẽn wa Zerizalɛɛm ka, n na n wã-a wã bɩ? Yaa Naaba-Wẽnd n yeele: kẽng n tɩ tak zabr ne tẽngã n sãam-a.› »

²⁶ A Ilkiya biig a Eliyakim, a Sebna la a Zoa yeela sõgen kãsenga: «Y kabre, gom-y ne yãmb tʋʋm-tʋmdba Aramde tɩ tõnd wʋmdame, la y da gom ne Ebre dãmba goam tɩ neba sẽn be lalga zugã kelgdame.»

²⁷ La sõgen kãsenga yeel-b lame «Fo tẽedame tɩ yaa foom bɩ f zu-soaba la b tʋm tɩ m wa togs-y gom kãensã? Ka yãmb bal ye, yaa nim bãmba sẽn zao lalga zugu, n ka le tar dabaar a to sã ka b rɩ b bĩndu la b yũ b rʋʋd kooma wala yãmbã?»

²⁸ Sõgen kãsenga yalsa lalga zugu n zẽk a koɛɛga n moon ne Ebre rãmb goama, la a yeela woto: «Kelg-y Asiri dĩma koɛɛga:

²⁹ A Ezekiyas da belg yãmb zaalem t'a kõn tõog n fãag yãmb mam nugẽ ye.

³⁰ A Ezekiyas da belg yã tɩ y maan tẽeb ne y Naaba-Wẽnd n yetẽ: ‹Sɩda Soaala-Wẽnd na n fãag-d lame, d tẽnga kõn lʋɩ Asiri dĩma nugẽ ye.›

³¹ Bɩ y da kelg a Ezekiyas ye tɩ Asiri dĩma koɛɛg la woto: ‹Bɩ y yẽs laafi yẽsgo ne maam. Rɩk-y y mense n kõ maam, la yãmb ned kam fãa na n rɩ a bugsuntund biisi, la a kankams kankama, la a yũu a ko-baoã koom,

³² n gũudẽ tɩ m wa peeg-y n kẽng tẽng a ye sẽn wẽnd yãmb tẽngã, alkam la rãam tẽngã, kaam la sɩɩd tẽnga, tɩ y vɩɩnde la y ra ki ye.› Da kelg-y dĩm, a Ezekiyas, t'a belga yãmb n yetẽ: ‹Naaba-Wẽnd na n fãaga tõndo!›

³³ M sok n gese: buud a taaba wẽnd dãmba tõoga da-bʋre n fãag b tẽngã Asiri dĩma nugẽ?

³⁴ Amat ne Arpad wẽnd dãmba maana a wãna? Sefarwayim la Ena la Iwa wẽnd dãmba maana a wãna? Samari tẽng wẽnd dãmba maana a wãna? Bãmb fãaga Samari mam nugẽ bɩ?

³⁵ Tẽnsa fãa wẽnd dãmb bʋse n fãag b tẽng mam nusẽ tɩ Naaba-Wẽnd na n tõog n fãag Zerizalɛɛm?»

³⁶ La neba sĩnda b noor n pa leok tɩ bũmb ye, tɩ naab da kõo noor tɩ b ra leok-a ye.

³⁷ Na-yir sõgen-kãseng a Eliakim, a Ilkiya biiga, n paas sɛb gʋlsda a Sebna, la no-rɛɛs a Zoa, a Asaf biigã, kẽnga a Ezekiyas nengẽ. B futã ra kẽesame la b togsa Asiri dĩma tãnsoaba sõgen-kãsenga goama fãa.