2 Rĩm-dãmba 16 - SEBR SÕNGO

A Akaz naam Zɩɩda

¹ A Peka, a Remaliya biiga, naam piig la a yopoe yʋʋmde, Zɩɩda dĩma a Zotam biiga, a Akaz, lebga dĩma.

² A Akaz yʋʋma da taa pisi a naam deegr wakato, la a rɩɩ naam Zerizalɛɛm, yʋʋm piig la a yoobe. A pa maan sẽn ya tɩrg Naaba-Wẽnd nifẽ wala a saamba a Daviid ye.

³ A rɩka Israyɛl dĩm dãmba nao, n tol n kɩt t'a biig pɩʋʋg bugum wa bu-zẽmba sẽn da maand yel-yood niynsã tɩ Soaala-Wẽnd rig-b Israyɛl kamba taoore.

⁴ A kʋʋ maando, n yõog tɩdare, tãmsã zutu la tɩɩg sẽn tobd maasem wʋsg fãa tẽngre.

⁵ Wakat kãnga, a Resẽ, Aram dĩma, ne a Peka, a Remaliya biiga la Israyɛl dĩma, yiisa tãpo n na n tak zabre Zerizalɛɛm. B gũbga a Akaz la b pa tõog n tak zabr ne-a ye.

⁶ Yaa wakat kãng me la a Resẽ, Aram dĩma, dig Zɩɩda rãmba n yiis Elat tɩ Edomitsa paam n kẽ be, la b kell n paa tẽng kãnga tɩ tãag rũnna.

⁷ A Akaz tʋma neba tɩ b tɩ yeel a Teglat-Falasar, Asiri dĩma, woto: «Mam yaa yãmb yamba la y biiga. Wa-y n fãag-y-ma, Siri dãmba la a Israyɛl dĩma nusẽ tɩ b yika zabr ne maam»

⁸ A Akaz wʋka wanzurf la sãnem fãa sẽn da be wẽnd doogẽ la dĩma ligda koglgẽ, la a tʋmame tɩ b tɩ pʋʋs Asiri dĩma.

⁹ Asiri dĩma kelga a koɛɛga; Asiri kẽng n tɩ pãba Damas n sooge. A wʋka a nebã n kẽng yembdo al Kir la a kʋ-la a Resẽ.

¹⁰ Dĩma Akaz tɩ sega a Teglat-Falasar, Asiri dĩma, Damas tẽnga. A yãee maan-kugr ninga sẽn da be Damas. La dĩma Akaz maga maan-kugrã, a woglem, a yalem, a zãndlem n tool a Uriya, maan-kʋʋdã.

¹¹ Dĩma a Akaz sẽn zĩnd Damas n tool tɩ b maan bũmb ningã, maan-kʋʋd, a Uriya, tũu fãa kɛpi tɩ dĩma Akaz nan pa yi Damas n wa ye.

¹² Dĩma sẽn yi Damas n wa, a yãee maan-kugrã, a kolga maan-kugrã n dʋ-a.

¹³ A menga toor kʋʋ yũ-noog maoongo n tũnug ne zom la rãam n le paas laafi kosg maoongo, n dɩk zɩɩma n daag maan-kugra zugu.

¹⁴ A kɩtame tɩ b viig zũud maan-kugr sõngã sẽn da be wẽnd dooga noorã, wẽnd dooga ne maan-kugr paalga sʋka. A tɩ ning-a-la maan-kugr paalga poore, nug goabga.

¹⁵ La dĩma Akaz yaool n kõo maan-kʋʋd a Uriya noor kãnga: «Yaa maan-kugr kãsenga zug la f na n kʋ maoongo. F na n kʋʋ yibeoog yũ-noog maoongã; zaabre, be la f na n kõ zoma, be la f na n kʋ dĩma yũ-noog maoongo la f tũnug-a a sẽn tog n tũnug bũmb ningã. Lebd n kʋʋ buuda maandã la f tũnug-b ne zom la rãam la f raag rũmsa zɩɩm. Sã n ya zũud maan-kugrã mam meng na ges m sẽn na n maanega.»

¹⁶ Maan-kʋʋd a Uriya maana dĩma a Akaz sẽn yeela fãa.

¹⁷ Dĩma a Akaz kɩtame tɩ b kɛ wẽnd dooga bilim-bilma n lags b zũudã la b sik b sĩmsã sẽn da zao b zugã. A kɩtame tɩ b sik n dɩgl kug peesem zugu sĩn-kãsenga sẽn da zao niis piig la a yiiba zugã.

¹⁸ A sẽn da rat n noog Asiri dĩma sũuri, a Akaz teema zãong ning sẽn da be wẽnd dooga kɩreng tɩ b boond tɩ Vʋʋsg raar zãongã; a le teema dĩma sẽn da tũud noor ning n kẽed wẽnd doogã.

¹⁹ A Akaz sẽn maan fãa, rẽ fãa pa gʋls Zɩɩda dĩm dãmba kibar sebr pʋgẽ bɩ?

²⁰ A Akaz tɩ saka a saam-dãmba tɩ b mum-a a Daviid na-tẽngẽ ne a saam-dãmba; a biiga a Ezekiyas n led-a a zaoorẽ.