2 Rĩm-dãmba 15 - SEBR SÕNGO

A Azariyas naam Zɩɩda

¹ Israyɛl dĩma a Zeroboam naam pisi la a yopoe yʋʋmde, a Amaziyas biiga a Azariyas n dɩ Zɩɩda naam.

² A naam reegr wakato t'a tara yʋʋm piig la a yoobe; a rɩɩ naam Zerizalɛɛm yʋʋm pis-nu la a yi. A ma yʋʋr da boondame t'a Yekoliya, t'a ba yir ya Zerizalɛɛm.

³ A maana sẽn ya tɩrga Soaala-Wẽnd nifẽ, wala a ba Amaziyas sẽn maane.

⁴ La baasgo tãmsa zut wẽn-naandsa waoogr zĩisa ra ketame tɩ neb me ra ket n kẽnd be n kʋʋd maand la b yõogd tɩdare.

⁵ Naaba-Wẽnd wẽe dĩma t'a lebg yĩng soaba n tãag a kũum, t'a kell n zĩnd, a ye, roog sẽn zãag ne a taaba pʋga. A biiga a Zotam n da get a yir yelle la a soolma.

⁶ A Azariyas tʋʋm a taaba la a sẽn maan fãa, dẽ pa gʋls a Zɩɩda dĩm dãmba kibar sebrẽ bɩ?

⁷ A Azariyas tɩ saka a saam-dãmba tɩ b mum-a a Daviid na-tẽngẽ, t'a biiga a Zotam led-a a zaoorẽ.

A Zakari naam Israyɛl

⁸ A Azariyas, Zɩɩda dĩma, naam pis-tã la a nii yʋʋmde la a Zeroboam biiga a Zakari lebg Israyɛl dĩma, Samari, n dɩ naam kiis a yoobe.

⁹ A maana sẽn ya wẽnga Soaala-Wẽnd nifẽ, wala a saam-dãmba sẽn maane a pa tol n bas a Zeroboam, a Nebat biiga, sẽn maan n lub a Israyɛl yel-wẽnd pʋgẽ wã ye.

¹⁰ A Yabɛs biiga, a Salum, zãmb-a lame, a pãb-a-la neba fãa nifẽ n kʋ, n led-a a zaoorẽ.

¹¹ A Zakari tʋʋm a taabã, ade, b gʋls-b-la a Israyɛl dĩm dãmba kibar sebr pʋga.

¹² Yaa Soaala-Wẽnd gomd n pidsi, bãmb sẽn da pĩnd n yeel a Zewu: «Fo yagens na n zaoonda a Israyɛl naam zaoore tɩ ta zamaan a naas soaba.» Sɩd yɩɩ boto.

A Salum naam Israyɛl

¹³ A Salum, a Yabɛs biigã, lebga dĩma, Zɩɩda dĩma a Azariyas naam pis-tã la a wɛ yʋʋmde. A rɩɩ naam kiuug a ye, Samari.

¹⁴ A Menaem, a Gadi biiga, yii Tirsa n wa Samari, n pãb a Yabɛs biig, a Salum, n kʋ, la a led-a, a naam zaoorẽ.

¹⁵ A Salum tʋʋm a taabã la a suduma, ade, yɛl bãmb fãa gʋlsa Israyɛl dĩm dãmba kibar sebr pʋgẽ.

¹⁶ Wakat kãnga la a Menaem pãb Tifsa n kʋ nebã sẽn da be a pʋgẽ la a tẽn-toosa gilli, sẽn sɩng Tirsa. A maana boto tɩ tẽnga rãmb zãgsame tɩ b kõn pak b kʋɩlens ye. La a sẽn kẽ, a weeda tʋtr-pʋsa fãa sẽn da be-b tẽn-kãnga.

A Menaem naam Israyɛl

¹⁷ A Azariyas, a Zɩɩda dĩma, naam yʋʋmd pis-tã la a wɛ yĩnga, a Menaem, a Gadi biiga, lebga a Israyɛl dĩma, a rɩɩ naam Samari yʋʋm piiga.

¹⁸ A maana sẽn ya wẽnga Soaala-Wẽnd nifẽ; a pa tol n bas yel-wẽna fãa a Zeroboam, a Nebat biigã, sẽn maan n lub a Israyɛl yel-wẽnd pʋgẽ wã ye.

¹⁹ Asiri dĩma a Ypl waa n kẽe tẽngã. La a Menaem kõ-a-la wanzurf sẽn ta neb tusr la kobs nu zɩɩbo t'a sõng t'a naama paam pãnga a nugẽ.

²⁰ Ad-a Menaem sẽn paam ligda to-to. Israyɛl biig fãa nug sẽn da zãade da tog n kɩsa bũmbu tɩ b saglg Asiri dĩma nugẽ, ned kam fãa ra kɩta wanzurf wakɩ koeems pis-nu. Woto a leba a tẽngẽ.

²¹ A Menaem tʋʋm a taaba, a sẽn maan fãa, dẽ pa gʋls a Israyɛl dĩm dãmba kibar sebra pʋgẽ bɩ?

²² A Menaem tɩ saka a saam-dãmba, t'a biiga a Pekaya led-a a zaoorẽ.

A Pekaya naam Israyɛl

²³ Zɩɩda dĩm a Azariyas naam pis-nu yʋʋmde, a Pekaya, a Menaem biiga, lebga Israyɛl dĩm yʋʋm a yi, Samari.

²⁴ A maana sẽn ya wẽnga Soaala-Wẽnd nifẽ, a pa bas yel-wẽna, a Zeroboam, a Nebat biiga, sẽn maan n lub a Israyɛl wẽng pʋgẽ wã ye.

²⁵ A Peka, a Remaliya biiga sẽn da ya wed-kɩɩma zãmb-a lame, a kʋ-a lame, dĩma gaosg pʋga, neb pis-nu n da be ne-a, Galaad dãmba.

²⁶ A kʋʋ dĩma n led-a a naam zaoorẽ. A Pekaya tʋʋm a taaba, a sẽn maane, yell bãmb fãa gʋlsa a Israyɛl dĩm dãmba kibar sebr pʋgẽ.

A Peka naam Israyɛl

²⁷ A Zɩɩda dĩma, a Azariyas naam pis-nu la a yi yʋʋmde, a Remaliya biiga, a Peka, n lebg a Israyɛl dĩm Samari; a dɩɩ naam yʋʋm pisi.

²⁸ A maana sẽn ya wẽnga Soaala-Wẽnd nifẽ; a pa tol n bas a Zeroboam, a Nebat biiga, sẽn maan n lub a Israyɛl yel-wẽnd pʋgẽ wã ye.

²⁹ A Israyɛl dĩma a Peka zamaanẽ, a Teglat-Falasar, Asiri dĩma waa n zabame n deeg Iyõ, Abɛl-Bɛt-Maaka, Yanoa, Kedɛs, Asor, Galaad, Galile la Neftali tẽnsa fãa, n wʋk neba n kẽng yembdo, Asiri.

³⁰ A Oze, a Elat biiga, soos n zãmba a Peka, a Remaliya biigã, n pãb-a n kʋ, n led-a a naam zaoorẽ, a Azariyas biig a Zotam naam pisi yʋʋmde. A Zotam dɩɩ naam Zɩɩda.

³¹ A Peka tʋʋm a taabã, a sẽn maan fãa, ade, yell bãmb gʋlsa a Israyɛl dĩm dãmba kibar sebr pʋgẽ.

³² A Peka, a Remaliya biigã, Israyɛl dĩma, naam yʋʋmd a yiib soaba, a Zotam, a Azariyas biiga, n dɩ Zɩɩda naam.

³³ A ra tara yʋʋm pisi la a nu a naam deegr wakato, la a rɩɩ yʋʋm piig la a yoobe Zerizalɛɛm, a ma yʋʋr boondame t'a Yerusa, a ra yaa a Sadok biiga.

³⁴ A mana sẽn ya tɩrga Soaala-Wẽnd nifẽ, wala a ba a Azariyas sẽn maane.

³⁵ La baasgo, wẽn-naandsa waoogra ra ketame; neba ra ket n kẽnd n kʋʋda maanda yaare la b yõod tɩdare. Yaa a Zotam n me wẽnd dooga dignoor ninga sẽn zãnda n yɩɩd a taabã.

³⁶ A Zotam tʋʋm a taaba, a sẽn maan fãa, rẽ fãa pa gʋls Zɩɩda dĩm dãmba sebr pʋgẽ bɩ?

³⁷ Yɩɩ yẽnda wakatẽ la Aram dĩm, a Resẽ la a Remaliya biig a Peka paam Soaala-Wẽnd sore n kaoog zabre ne a Zɩɩda.

³⁸ A Zotam saka a saam-dãmba; b mum-a-la a saamba, a Daviid, na-tẽngẽ, ne a saam-dãmba, t'a biiga Akaz led-a a zaoorẽ.