2 Rĩm-dãmba 14 - SEBR SÕNGO

A Amaziyas naam Zɩɩda

¹ Israyɛl dĩma a Zoakaz biig a Zowas sẽn lebg dĩm tɩ yʋʋmbitẽ la Zɩɩda dĩm a Zowas biig a Amaziyas lebg dĩma.

² A naam deegr wakato, rẽ t'a tara yʋʋm pisi la a nu, a rɩɩ naam yʋʋm pisi la a wɛ Zerizalɛɛm. A ma yʋʋr da boondame t'a Zoadã, n da ya Zerizalɛɛm paga.

³ A mana sẽn ya tɩrga Soaala-Wẽnd nifẽ, la yaool n ka yɩ wala a saamba a Daviid ye; yɩɩ wala a ba, a Zowas.

⁴ Ne rẽ fãa tãmsa zut wẽn-naands waoogr zĩisa ra ketame tɩ neba ket n kʋʋd maando la b yõogd tɩdare.

⁵ A naama pãng sẽn waa n paase, a kʋʋ na-yir dãmba sẽn da yiis a ba yõore.

⁶ A pa kʋ b kamb ye, tɩ wala sẽn gʋls a Moyiiz noora sebr pʋgẽ, dẽ ra kisame. Naaba-Wẽnd da yeelame: Ba rãmba kõn kʋ, b kamb beegr yĩng ye, kamb me pa kʋʋd, b ba rãmb beegr yĩng ye; b kʋʋda neda a meng yel-wẽnd yĩng bala.

⁷ Yẽ n zab ne Edomitsã yamsem aoogẽ n tõog-ba, dap na ta tus piiga; yẽ n zab n deeg Sela n pʋd a yʋʋr tɩ Yokteyɛl, la b ket n boonda yʋ-kãng al ne rũnna.

⁸ A Amaziyas kong n tʋmame tɩ b tɩ yeel Israyɛl dĩma a Zowas, a Zoakaz biiga la a Zewu yagenga: «Aya, wa-y tɩ d seg taaba!»

⁹ La a Zowas, Israyɛl dĩma tʋmame tɩ b tɩ yeel a Amaziyas Zɩɩda dĩma woto: «Libã yõeens-tabda tʋmame tɩ b yeel Libã kʋka: ‹Rɩk f bi-pugla n kõ m bi-ribla t'a maan a paga.› La ade, Libã we-rũnga taba a yõeens-tabdo.

¹⁰ Yaa sɩda, fo zaba ne Edom la fo tõog-a lame, tɩ f sũur wʋk ne wilg-m-menga. Nage la f kell n pa f yiri. Bõe tɩ f na n bao yelle n kõ f menga, n wa ne f menga la Zɩɩda fãa sãoongo?»

¹¹ La a Amaziyas pa kelg-a ye. Yẽ ne Israyɛl dĩma, a Zowas, sega taaba Bɛt-Semɛs, Zɩɩda soolmẽ.

¹² A Israyɛl tõoga a Zɩɩda, tɩ rapa fãa zoe n tɩ kẽ b rotẽ.

¹³ La a Zowas, Israyɛl dĩma, yõka Zɩɩda dĩma, a Amaziyas, a Zowas biiga la a Akaziyas yagenga, n tɩ pag roog Bɛt-Semɛs. Dẽ poore a waa Zerizalɛɛm; a luba Zerizalɛɛm lalga wɛdga, a Efrayim dagnoorẽ n tãag Gõdra dagnoorã; lalga lʋɩɩ na ta kãntɩɩs kobs-naase.

¹⁴ A Zowas wʋka sãnema la wanzurf la laoga fãa sẽn da be wẽnd doogẽ la dĩma ligda koglgẽ. A yõga neb n paas tɩ ya waa a raa bãmb dãmba yõore, n mi tɩ nin-bãmb yĩnga ned kõn tees n gɩdg-b ye, la a leba Samari.

¹⁵ A Zowas tʋʋm a taaba a sẽn mane, a raooda yelle, a zaba ne a Amaziyas, Zɩɩda dĩma, dẽ fãa pa gʋls a Israyɛl dĩm dãmba kibar sebrẽ bɩ?

¹⁶ A Zowas tɩ saka a saam-dãmba, b mum-a-la Samari ne a Israyɛl dĩm dãmba, t'a biiga a Zeroboam led-a a zaoorẽ.

¹⁷ A Zowas biiga, a Amaziyas, Zɩɩda dĩma, le kaoosa ne yõore, yʋʋm piig la a nu, Israyɛl dĩma, a Zowas kũum poore. A Zowas yaa a Zoakaz biiga,

¹⁸ A Amaziyas tʋʋm a taaba, dẽ fãa pa gʋls Zɩɩda dĩm dãmba kibarã sebrẽ bɩ?

¹⁹ Neb seda ne taaba Zerizalɛɛm n na n lub-a, t'a zoe n kẽng Lakis, tɩ b tʋm neba tɩ b babs-a Lakis, la b kʋ-a lame.

²⁰ B rɩk-a-la ne wiidi n tɩ mum Zerizalɛɛm ne a saam-dãmba, a Daviid na-tẽngẽ.

²¹ Zɩɩda neba fãa tũusa a Azariyas sẽn da tar yʋʋm piig la a yoobe t'a rɩ naam, n led a ba, a Amaziyas, naama zaoorẽ.

²² Yẽ n le n maneg n me Ebat tẽnga n yalse, Zɩɩda dĩma kũum poore.

Zeroboam a yiib soaba naam Israyɛl

²³ A Zowas biiga, a Amaziyas, Zɩɩda dĩma, naam piig la a nu yʋʋmde, Israyɛl dĩma, a Zowas biig a Zeroboam n dɩ naam Samari, yʋʋm pis-naas la a ye.

²⁴ A maana sẽn ya wẽnga Naaba-Wẽnd nifẽ; a pa tol n bas a Zeroboam, a Nebat biiga sẽn maan n lub a Israyɛl yel-wẽnd pʋgẽ wã ye.

²⁵ Yẽ n lebs a Israyɛl toaagã a zĩigẽ, sẽn sɩng Lebo-Amat n tɩ tãag Yamsem Mogre, wala Naaba-Wẽnd, a Israyɛl Wẽnnaam, sẽn da pĩnd n togs ne a Zonas noore. A Zonas yaa Gat-Efɛr bãngda, yaa a Amitayi biiga,

²⁶ Naaba-Wẽnd da yãee yãnd kãseng ning a Israyɛl sẽn da paame. Yamba bɩ burkĩna, ned ba a ye da ka be sẽn fãagda Israyɛl ye.

²⁷ Naaba-Wẽnd yaool n da nan pa kaool tɩ b na n yẽesa Israyɛl yʋʋre saaga tẽngr ye. Yaa rẽ yĩng la b lʋɩɩs a Zowas biiga a Zeroboam taoore, n fãag-a.

²⁸ A Zeroboam tʋʋm a taaba a sẽn maan fãa, a sẽn zab ne raood ning n le reeg Amat la Damas n lebs a Israyɛl, dẽ fãa pa gʋls a Israyɛl dĩm dãmba kibar sebr pʋgẽ bɩ?

²⁹ Dẽ poore a Zeroboam tɩ saka a saam-dãmba, tɩ b mum-a Samari ne Israyɛl dĩm dãmba, t'a biig a Zakari led-a a zaoorẽ.