2 Rĩm-dãmba 12 - SEBR SÕNGO

A Zowas naam Zɩɩda

¹ A Zowas da tara yʋʋm a yopoe, a naam reegr wakato.

² A Zewu naam yʋʋmd a yopoe soaba, la a Zowas lebg dĩma; a rɩɩ naam yʋʋm pis-naase, Zerizalɛɛm, a ma da boondame t'a Sibiya, t'a ba yir ya Beerseba.

³ A Zowas maana sẽn ya tɩrga Wẽnd nifẽ daar fãa, a vɩɩm tɛka tɩ maan-kʋʋd a Zoyada da gʋʋl-a-la neere.

⁴ La baasgo, wẽn-naandsa waoogra ka boog ye; b da ket n kẽnd n kʋʋda maando la b yõogd tɩdare.

⁵ A Zowas yeela maan-kʋʋdba: «Ligda fãa sẽn kõt Naaba-Wẽnd b ro-sõngẽ wã, ligd-dɩtma, b sẽn deegd ned kam fãa nengẽ, wa a sẽn tõe n kɩse, yamleoog kũuna,

⁶ bɩ maan-kʋʋdba reeg rẽ fãa n maneg wẽnd doogã, a sẽn wat n dat manegre zĩig ninga.»

⁷ La a Zowas naam yʋʋmd pisi la a tã soaba taame tɩ maan-kʋʋdba pa tol n maneg wẽnd dooga sẽn sãam zĩig ning ye.

⁸ La dĩma a Zowas boola maan-kʋʋd a Zoyada ne a tʋmd-n-taase n yeel-ba: «Yaa bõe yĩnga la yãmb pa maneg bũmb ninga fãa sẽn sãam wẽnd doogẽ wã? Marsã tɛka bɩ sẽn deesd-b ligda da le reeg-a n kɩs yãmb ye. B na n kɩsa ligd kãng wẽnd dooga manegdbã.»

⁹ La maan-kʋʋdba sakame tɩ b kõn le reeg neba ligd ye, la b kõn le soog wẽnd dooga manegre ye.

¹⁰ Maan-kʋʋd a Zoyada dɩka koglg a ye n poog a limda võore n dɩgl maan-kugra sɛɛga. F sã n kẽed wẽnd doogã, a bee f nug rɩtgo. B sẽn zĩndig maan-kʋʋdb niyns tɩ b gũud wẽnd dooga noor n da tog n deegd n ning koglga pʋga ligd ning fãa b sẽn da tar n wat wẽnd dooga yĩnga.

¹¹ B sã n da mik tɩ ligda waooga koglga pʋga, b ra boonda dĩma sɛb gʋlsda la maan-kʋʋd kãsengã tɩ b wa yiis ligda fãa n sõde.

¹² Ligdã sẽn sõdã kɩta sẽn tʋmd-b tʋʋma la sẽn get-b tʋʋma tɩ bãmb deegd-a n yaood da-wãadbã,

¹³ tãn-metbã ne kug peesdbã la b daad raado la kug sẽn peese, wẽnd doogã manegr yĩnga, la b yaood manegra sẽn dɩ ligd ning fãa.

¹⁴ Sãnema la wanzurfã b sẽn da reegdã, b ra ka reegd n yõg wẽnd dooga yĩnga, yõg-la-zulumsi, wõrsdse, zɩ-mesdem laase tõntõodo bɩ bũmb a to ye.

¹⁵ Ligd kãng ra kɩta sẽn da tʋmd-b tʋʋmna tɩ b reeg-a wẽnd dooga manegr yĩnga.

¹⁶ B sã n sõd ligdã n kɩs tʋʋmda rãmba b pa le yɛs n kot bãmb tɩ b wilg b sẽn dɩka n maan bũmb ning ye. B rãmba da maanda bũmba fãa ne pʋ-peelem.

¹⁷ B sẽn da kɩt ligdã sugr kosg bɩ yell manegr maoong yĩnga, ligd kãng n da pa kẽed wẽnd dooga rẽnnẽ. A yaa maan-kʋʋdba soolem.

A Zowas naama baasgo

¹⁸ Wakat n waa n zĩndi t'a Azayɛl, Siri dĩma wa kaoog zabre ne Gat tẽng rãmba. B sẽn tõog tẽn-kãnga, a seglame n na n wa tak zabre ne Zerizalɛɛm.

¹⁹ La a Zowas, Zɩɩda dĩma, wʋka laog ning fãa yẽ saam-dãmba: a Zozafat, a Zoram, a Akaziyas la yẽ meng sẽn da kõ Soaala-Wẽnde, n paas sãnema fãa sẽn da be wẽnd doogẽ, la dĩma koglgẽ, a pɩɩga fãa n tʋm tɩ b tɩ pʋʋs a Azayɛl, Aram dĩma, t'a sak n loog la a bas Zerizalɛɛm laafi.

²⁰ A Zowas tʋʋm a taaba la a sẽn maan fãa, pa gʋls Zɩɩda dĩm dãmba kibara sebr pʋg bɩ?

²¹ A tãnsoaben-dãmba sũu taaba n soos n yẽs ne taaba n na n lub-a. B pãba a Zowas n kʋ.

²² Yɩ-la a Zozabad, a Simeat biiga, la a Yeozabad, a Somɛr biiga n pãb-a n kʋ, Bɛt-Milo. B mum-a-la ne a saam-dãmba, a Daviid na-tẽngẽ, t'a biiga a Amaziyas led a zaoorẽ.