2 Rĩm-dãmba 11 - SEBR SÕNGO

Dĩm-poak a Atali naam

¹ A Atali, sẽn yãe t'a biiga Akaziyas kiime, a kɩtame tɩ b kʋ Zɩɩda dĩm biisa fãa.

² A Zoseba, dĩma a Zoram bi-pugla, la a Akaziyas tão, rɩka a Akaziyas biiga, a Zoas. A kɩtame t'a Zoas ma-wubdga yiisa b sẽn da na n kood b rãmba sʋka n tɩ solg-a gãasa roogẽ. B pa bas t'a Atali yãend-a ye, woto me b pa kʋ-a ye.

³ Biiga paa ne a ma-wubdga wẽnd doogẽ. B soonda be yʋʋm a yoobe, dẽ t'a Atali n dɩt naam.

⁴ Yʋʋmd a yopoe soaba, maan-kʋʋd a Zoyada tʋmame tɩ b bool noakens sẽn yit Kari la sẽn ya tʋʋm-tʋmdb koabg nanamse n paas tãb-biis sẽn zao wiidi, tɩ b wa sak wẽnd doogẽ. A yõga zood ne bãmb n kɩt tɩ b kãab wẽnd doogẽ, la a wilg-b-la dĩma biiga, a Zoas.

⁵ A kõ-b-la noor n yetẽ: «Ad yãmb sẽn na n maan bũmb ninga: Yãmb neb kẽer rɩkda tʋʋmd, vʋʋsg raare. Yaa woto la neb kẽer so dĩma zaka gũub baraare,

⁶ tɩ neb kẽer gũud Sur noorã, tɩ neb kẽer gũud noor ning sẽn be tãb-biisa sika poore. Bãmb n na n gũud dĩma zakã n deesd taaba.

⁷ Sẽn pa so-b gũub vʋʋsga raarã, bãmb n na n wa baraare n gũ wẽnd doogã, dĩm bila sẽn beẽ wã.

⁸ Tãb-biig fãa zãada a sʋʋg a nugẽ, n tigim taab dĩma sẽn be zĩig ninga, n yãagd-a a sẽn dabd zĩig ninga. Ned ning fãa sẽn na n kolg y sẽn yɛsẽ wã tog n kiime.»

⁹ Sẽn so-b neb koabg nanamsa maana maan-kʋʋd a Zoyada sẽn kõ noor ninga fãa; bãmb ned kam fãa peega a neba, sẽn kẽed-b tʋʋmd vʋʋsg daare wa sẽn sigd b tʋʋmde, b fãa waa n bʋʋga a Zoyada.

¹⁰ Maan-kʋʋda pʋɩ tãb-biisa kãsem dãmba dĩma a Daviid kãna la gãndo sẽn da bĩng wẽnd doogẽ.

¹¹ Tãb-biisa zã b zab-teed b nusẽ, n yals yĩngri wẽnd dooga nug rɩtgo n tɩ tãag wẽnd doogã nug goabga, maan-kugra la Rooga taoore, n gũbg dĩma.

¹² A Zoyada yiisa dĩma biiga, n fõgneg a zug naam pugla, n kɩs-a zooda noya sebre; b kõ-a-la naam, n pʋdg a zug kaam tɩ b wẽ nug pogse la b kelem woto: «Wẽnd na kaoos dĩma!»

¹³ A Atali wʋma zãma wã sẽn kaoog n watẽ wã bʋʋre t'a me yi n naag zãma wã n kẽ wẽnd doogẽ.

¹⁴ La a sẽn gese, a yãeeme tɩ b zaoolga dĩma bũmb sẽn zãnd zugu, wala dog-n-mik sẽn da rate, tɩ kombɛɛmba la tõntõodã rãmba da be dĩma sɛɛgẽ, tɩ neb fãa kɩdemd sũ-noogo, tɩ tõntõod peebdẽ, t'a Atali na n kẽes a futu, la a kelem: «Zãmb wɛɛ! Zãmbo!»

¹⁵ La Maan-kʋʋd a Zoyada kõo tãb-biisa kãsem dãmba noor n yetẽ: «Yiis-y pagãb! Sẽn yik-a t'a be-la a Atali poorẽ, bɩ b kodg-a ne sʋʋga!» Maan-kʋʋda ra yeelame: «Pa tog tɩ b kʋ-a wẽnd dooga pʋg ye.»

¹⁶ B yõka a Atali, t'a tũ wiidi wã noor n tees dĩma zaka. La b tek n kʋ-a lame.

¹⁷ A Zoyada kɩtame tɩ dĩma la buuda maan kãabgo tɩ b na n yɩɩ Naaba-Wẽnd buudu.

¹⁸ Tẽnga fãa yaool n kaoogame n kẽng a Baal wẽnd doogẽ, la b luba wẽnd doogã, b sarma a maan-kugã la nin-naandsã. A Matã sẽn da yaa a Baal maan-kʋʋdã, b kʋ-a-la maan-kugra taoore. Maan-kʋʋd a Zoyada ninga tãb-biisi, Soaala rooga gũub yĩnga.

¹⁹ A peega neb koabg nanamsã, Kari rãmba la gũudba la neba fãa tɩ b na n yiis dĩm a Zoas, wẽnd doogẽ. B waa n zaoondg-a-la dĩm dãmba naam zaoorẽ.

²⁰ Tẽnga rãmb fãa da kɩdemba sũ-noogo, la na-tẽnga ka rãmb ye. La sã n yaa a Atali, b ra kʋ-a-la ne sʋʋga dĩma zakẽ.