2 Rĩm-dãmba 1 - SEBR SÕNGO

A Azariyas kũum

¹ Dĩma a Akab poore, Moab zãgsame t'a kõn le kẽe a Israyɛl ye.

² A Akaziyas zĩnda a roog noorẽ kogsre n lʋɩ n pogle, Samari tẽnga. La a tʋma neba n yeel-ba: «Bɩ y kẽng-y n tɩ sok a Baal-Zebub, Ekrõ wẽn-naandã, n ges m na n tɩlga ne m sãmpogrã bɩ m ka na n tɩlge?»

³ Soaala Malɛk yeela a Eli, Tisbe rao: «Yik n seg Samari dĩma sẽn tʋm b rãmba la f yeel-ba: ‹Yaa Soaala-Wẽnd n ka le be Israyɛl pʋgẽ bɩ bõe tɩ y na n tɩ sok a Baal-Zebub, Ekrõ tẽng wẽn-naandã?›

⁴ Dẽnd yĩnga, Soaala-Wẽnd koɛɛg la woto: ‹Fo sẽn dʋ gãag ninga zugã, fo kõn le sig ye. Sɩd ne sɩda, fo na n kiime.› » La a Eli loogame.

⁵ Dĩma sẽn tʋm b rãmbã leba a Akaziyas nengẽ t'a sok-ba: «Bõe yĩng tɩ yãmb lɛɛg n wa?»

⁶ Tɩ b leoke: «Dao a ye n seg tõndo n yeel tõndo: ‹Leb-y dĩma sẽn tʋma yãmba nengẽ, la y yeel-a: Soaala-Wẽnd koɛɛg la woto: Yaa Soaala-Wẽnd n ka le be Israyɛl tẽng bɩ tɩ f tʋm tɩ b tɩ sok a Baal-Zebub, Ekrõ tẽng wẽn-naandã? Woto wã, fo sẽn dʋ gãag ninga zugã, f kõn le sig ye. Sɩd-sɩda fo na n kiime.› »

⁷ A Akaziyas sok-b lame: «Dao ninga sẽn sega yãmb n gom woto ne yãmba da yaa wãna?»

⁸ Tɩ b leoke: «Yaa dao sẽn da yer fuug sẽn wʋg ne pe-kõbdo la yaa gãong n da mobg a sɛɛga.» A Akaziyas yeelame: «Yaa a Eli, Tisbe daoã!»

⁹ Dĩma tʋma a nengẽ tãnsoab ne a neb pis-nu. Tãnsoaba babsa a Eli. A ra zao Karmɛl tãnga zug tẽnsʋka. Tãnsoaba yeel-a lame: «Wẽnd neda, dĩma tɩ y sig n wa!»

¹⁰ A Eli yeela tãb-biis pis-nu tãnsoaba: «M sã sɩd yaa Wẽnd neda, bɩ bugum yi saag zugu n dɩ-fo, foom ne f neb pis-nu wã!» La bugum yii saag zugu n dɩ tãnsoaba ne a neb pis-nu wã.

¹¹ Tɩ dĩma le tʋm tãb-biis pis-nu tãnsoaba a to ne a neb pis-nu. Tãnsoaba yeela a Eli: «Wẽnnaam neda, naab tɩ y sig tao-tao koe!»

¹² T'a Eli leoke: «M sã n ya Wẽnnaam neda bɩ bugum yi saaga zugu n dɩ-fo, foom ne f neb pis-nu wã!» La bugum yii saag zugu n dɩ tãnsoaba ne a neb pis-nu wã.

¹³ Dĩma le tʋma tãb-biis pis-nu tãnsoaba, naoor a tãab soaba. Tãnsoaba babsa a Eli la a sẽn ta, a yĩgimda a Eli taoore, n yõk a sɛɛga n yeel-a: «Wẽnnaam neda, bɩ y ges wa sẽn zem bũmbu maam la m neb pis-nu wã vɩɩm!

¹⁴ Ade bugum yii yĩngri n dɩ tãb-biis pis-nu nanams a yi ne b neba. Marsã, y kabre! Bɩ m vɩɩma la m tãb-biisa vɩɩm wẽneg bũmb sẽn tar yõod y nifẽ.»

¹⁵ Soaala malɛka yeela a Eli: «Tũ daoã n sigi la f da zoe rabeem ye!» A Eli yikame la a tũ-a lame n leb dĩma nengẽ, n yeel-a:

¹⁶ «Soaala-Wẽnd koɛɛga la woto: Fo sẽn tʋm neb a Baal-Zebub, Ekrõ wẽn-naanda nengẽ wala Wẽnd n kongd Israyɛl sẽn tõe n leok fooma, ade, fo sẽn dʋ gãag ninga zʋgã, fo kõn sig ye, tɩ fo na n kiime, dẽ yaa vẽenega.»

¹⁷ A Akaziyas kiime, wala Naaba-Wẽnd sẽn da togs a Eli, t'a yao a Zoram deeg naam n led-a zaoorẽ, t'a da ka tar biig ye. La yɩ-la a Zozafat biiga, a Zoram, Zɩɩda dĩma naamẽ, a naama yʋʋmd a yiib soaba.

¹⁸ A Akaziyas tʋʋm a taaba, a sẽn maan bũmb ninga, dẽ fãa pa gʋls a Israyɛl dĩm dãmba kibar sebrẽ bɩ?