2 Kibayã 9 - SEBR SÕNGO

Saba dĩm-poaka

¹ A Salomo yʋʋra sẽn da yi n zãag yĩnga, Saba dĩm-poaka wʋma rẽ n wa Zerizalɛɛm. A talla yɛl wʋsg ne pagdo n kos a Salomo t'a wegs n wilg b võore t'a rɩ a bãngra zulum kaseto. A waa ne arzɛgs me, ne yʋgma sẽn zɩt yũ-nood kaam, sãnem, la kug-neeba. A sẽn ta a Salomo nengẽ a yiisa a sẽn da bʋgs a yamẽ wã fãa.

² A Salomo leoka a sokr fãa. Bũmb pa zĩnd t'a wilgr yi toog ne-a ye.

³ Saba dĩm-poaka sẽn bãng a Salomo yama sẽn zẽk n ta zĩig ninga, a sẽn yãe na-yira sẽn me to-to,

⁴ dĩma sẽn dɩt bũmb ninga, a tʋʋma sẽn pʋɩ to-to, tʋʋmd fãa ne a taoor soaba, futa b sẽn yerã, sõgen-kamba ne b faongã, maanda sẽn da kʋʋd wẽnd doogẽ, a yɛɛsa wʋsgo.

⁵ Dẽ la a yeel dĩma: «M sẽn wʋm tɩ b gomd bũmb ninga m tẽngẽ yãmb ne y bãngra poorẽ da yaa sɩd bala!

⁶ M pa tʋlg n deeg tɩ m pa reng n wa m toor la m yãend ne m nif ye. La sã n ya sɩda, b pa wilg maam y bãngra pʋɩ-sʋk ye. Yãmb zʋʋga b sẽn togsdã al wʋsgo.

⁷ Sũ-noog rãmb la f pagba, f sõgen-kamba sẽn be f taoore n kelgd f bãngre!

⁸ Naaba-Wẽnd, f Wẽnnaam paam barka, b sẽn maan f neere n dʋʋs-fo b naam zaoorẽ, bãmb pẽgr yĩnga! Yaa f Wẽnnaam sẽn nong a Israyɛl wʋsgo, n dat t'a ziira paasã la b kõ-f naam tɩ f na n wilg-a sẽn tog la sẽn kisi la f da bas-a t'a kong legend ye.»

⁹ Saba dĩm-poaka kõo dĩma sãnem. Sãnema zɩslem: seka neb koabg la pisopoe la a nu zɩɩbo. A paasa yũ-nood kaam ka tɛka, la kug-neeba. Yũ-nooda kaama taare da ka yãet moog ye.

¹⁰ A Iram ne a Salomo neba me lɛɛg n wa ne Ofir sãnem, n paas ra-sĩdma, la kug neeba.

¹¹ Dĩma rɩka ra-sĩdma n pees n gãneg wẽnd dooga pʋga la na-rotã, n pees bɛɛla la pendse, yʋʋma yĩnga. B zɩ n yãend woto taar Zɩɩda tẽn-peelmẽ ye.

¹² Dĩm a Salomo kõo Saba dĩm-poakã a sẽn tʋlg bũmb ning fãa. Dĩma pa ges a sẽn tall n wa n yaool n kõ-a ye. Yɩɩga rẽ al wʋsgo. Saba dĩm-poaka ne a neba yaool n leba b tẽngẽ.

A Salomo arzɛka

¹³ Yʋʋmd a ye pʋgẽ sãnem sẽn wa a Salomo yĩng yɩɩ sãnem gil sẽn sek neb tusr zɩɩbo.

¹⁴ B pa naag n sõd lɛɛbdba ne b neba sẽn da tar n watẽ wã ye. B pa sõd Arabsa dĩm dãmba la tẽnga kombɛɛmbã rẽnd ye. Bãmb fãa ra wat n kõta a Salomo sãnem la wanzurfu.

¹⁵ A Salomo maana gãndo, bãmb kobs-yi, gãnd sẽn da ya bɛd-bɛda. Kuta la sãnema sẽn dɩk n dõog a ye fãa zɩslem taa yubl sẽn pid koom.

¹⁶ A maana gãnd sẽn ya bõonese, bãmb kobs-tã; kuta la sãnema sẽn dɩk n dõog a ye fãa zɩsa wa wam-pogbr sẽn pid ne koom. B tɩ yagl-b-la Libã Googa zãongẽ.

¹⁷ Dĩma maana naam zaoor sẽn ya bedre, n tablg ne wob-yẽna la sãnem sẽn yɩlge n le yɩlge.

¹⁸ Zaoora ra zẽkame. Tũuda sãnem teedse n dʋ la teedsa ra yaa a yoobe. Zaoora ra tara nusa sẽn gãte bɩ kamsa sẽn palgd zĩiga, goabg la rɩtgo. Kamsa sẽn palgd zĩig ninga b rõoga bõnyẽes a yi,

¹⁹ b rõoga bõnyẽes piig la yi n tedg teeds a yoobã, goabg la rɩtgo. B zɩ n maan a buud rĩung ba a ye pʋg ye.

²⁰ A Salomo sẽn da tar lagd niyns n yũudã da yaa sãnem gilli. Teed niyns me sẽn da be Libã googa zãongẽ wa da maana ne sãnem sẽn yɩlge. A Salomo wakatã, b ra pa get wanzurf wa bõn-yõod ye.

²¹ Dĩma ra tara koom-kogend sẽn da tʋgd Tarsis ne a Iram nebã, la yʋʋm a tãab fãa b ra lɛɛgd n wata ne sãnem, ne wanzurf, ne wob-yẽna, ne wãmse la noos-buudu sẽn ya neeba n sakd gesgo.

²² A Salomo waa n yɩɩga dũni nanamsa fãa ne arzɛk la bãngre.

²³ Dũni dĩm dãmb fãa da rat n taa a Salomo nẽngẽ n bãng a menga la b kelg a bãngra goama, bãngr zulung ning a sẽn da paam Naaba-Wẽnd nengẽ wã.

²⁴ Ned kam fãa ra wata ne kũuni: sãnem lagdo, wanzurf lagdo, futu, zab teedo, yũ-nood kaam, wiidi, bõn-weese, yʋʋmd-yʋʋmd fãa.

²⁵ A Salomo mee do-bõones tus a naase wiida yĩnga. A ra tara bilim-bilm la wed-dʋʋdb tus piig la a yi. A da basa kẽer a sɛɛgẽ, Zerizalɛɛm.

²⁶ A Salomo dɩɩ naam Efrat kʋɩlga n ta Filisti, n ta Ezipt toaaga.

²⁷ A kɩtame tɩ wanzurf lebg wa kug zaal Zerizalɛɛm pʋga, tɩ tɩ-bɛd yãeeb ka toog n yɩɩd kankamse, bãada tẽnsẽ ye.

²⁸ A Salomo wiida ra yita Ezipt la tẽns a taabã.

²⁹ A Salomo vɩɩma kibare, a sɩngre n tãag a baasgo, dẽ fãa pa gʋls bãngd a Natã sɛbẽ, la Silo bãngd a Ayiya sebẽ, la bãngd a Yedo sɛbẽ bɩ? Bãngd kãng yãenda bũmb wʋsgo la a togsa yɛl wʋsgo a Nebat biig a Zeroboam poorẽ.

³⁰ A Salomo dɩɩ Israyɛl naam Zerizalɛɛm, yʋʋm pis-naase.

³¹ A gãanda ne a saam dãmba tɩ b mum-a a ba a Daviid na-tẽngẽ la a biig a Roboam n led-a a zaoorẽ.