2 Kibayã 7 - SEBR SÕNGO

Wẽnd doog kibsa

¹ A Salomo sẽn pʋʋs n sɛ la bugum sẽn yi yĩngri n wa rɩ maandã tɩ sõmblem dooga lɛɛg n pid ne Naaba-Wẽnd ziiri.

² Maan-kʋʋdba ka tõog n yals a pʋgẽ ye, tɩ Naaba-Wẽnd ziira ra pid-a lame.

³ B sẽn yãend yĩngr bugma sẽn sigi la Naaba-Wẽnd ziira sẽn pid ne sõmblem doogã, a Israyɛl gill wõgemdame n kɩ a neng tẽnga la a kilsa Naaba-Wẽnd n yet tɩ b yaa nin-noanga la b nonglem ka be sɛɛb ye.

⁴ Dĩma ne zãma wã kʋʋ maand Naaba-Wẽnd taoore.

⁵ Ad-a Salomo sẽn kʋ: niis tus pisi la a yi, piis tus koabg la pisi. B rɩka roogã n kõ Soaala-Wẽnde.

⁶ Maan-kʋʋdba ra yɛsa b zĩigẽ la Levitsa ra pẽgda Naaba-Wẽnd ne yʋʋm teed niyns a Daviid sẽn da maan Soaala-Wẽnd pẽgra yĩnga; b ra yetame tɩ b yaa nin-noanga la b nonglem ka be sɛɛb ye. Yaa bãmb n da yɩɩnd pẽgr yɩɩla a Daviid sẽn da maane. Maan-kʋʋdba ra yɛsa bãmb sɛɛgẽ n peebd tõntõodo, la zãma wã ra yɛsa yĩngri.

⁷ A Salomo ninga zaka tẽnsʋka barka, la be n lebg zĩig ning b sẽn na n kõ yũ-nood maanda, la laafi kosg maanda kaam. Maan-kugr ninga a Salomo sẽn maan ne zũuda ra pa tõe n deeg yũ-noog maoonga, ne kũuna sẽn tũnugdã la kaama ye.

⁸ Yɩɩ rasem a yopoe tõre la a Salomo maan sẽgd kibsã, ne Israyɛl kamba sẽn da yi zĩig zãnga, al Lebo-Amat sẽn be nug goabga, al Ezipt kʋɩl-bɛɛga sẽn be nug rɩtgo.

⁹ Daar a nii soaba le yɩɩ sɛɛg yõkr daare. Yɩɩ rasem a yopoe tõre la wẽnd dooga kibsa tõog n maane.

¹⁰ Tisri kiuugu, kiuug a yopoe soaba, pisi la a tãab raare, a Salomo basa ned kam fãa t'a leb a tẽngẽ, n noogd a sũuri la a kɩdemnẽ tɩ Naaba-Wẽnd maana a Daviid neere, n maan a Salomo neere, n maan b buud a Israyɛl neere.

Wẽnd saglgo

¹¹ A Salomo baasa wẽnd doogã la a meng rooga tʋʋma, wala a sẽn da rata.

¹² Dẽ marsã la Soaala-Wẽnd lika a Salomo yʋngo n yeel-a: «M wʋma f sẽn pʋʋs n kos bũmb ningã. M deega ro-kãnga t'a na n yɩ maanda roogo.

¹³ M sã n wa pag yĩngr ko-yũusã tɩ saag paooge, m sã n wa yeel sʋʋr t'a rɩ tẽnga koodo, m sã tʋm bã-longdem m buuda sʋka,

¹⁴ b sẽn yõkd m sɛɛg buud ning yĩngã, sã n sulg a menga, a sã n pʋʋse, a sã n baood m zĩiga, a sã n deeg a kongre, m na zĩnd yĩngr n kelge, m na kõ beegra sugr, m na le maneg tẽnga nenga.

¹⁵ Marsã tɛka, m na n puka m nini la m yoog m tʋba n kelg pʋʋsg ning fãa sẽn na n pʋʋs zĩ-kãnga.

¹⁶ Yaa ro-kãnga la m welg toore n na n zĩndg m meng a pʋgẽ. M nin la m sũur na n zĩnda be daar fãa.

¹⁷ Sã n ya foom, f sã n kẽn m taoor wala f ba a Daviid sẽn kẽne, f sã n maan mam sẽn wilg-fã, f sã n deeg m noore la m saglsã,

¹⁸ f naama na kaoos a zaoorẽ, wala m sẽn kãab f ba, m sẽn waa n yeel-a: ‹F buuda kõn kong biig sẽn na n dɩ naam Israyɛl ye.›

¹⁹ La yãmb sã n bas maam, y sã n pa reeg m noya la m saglse, y sã n pʋg wẽn-naandse, y sã n waoog-ba,

²⁰ m na yiis a Israyɛl tẽng ning m sẽn da kõ-a, m na yiis m taoore doog ning y sẽn me m waoogr yĩngã, la a na lebg bu-zẽmba fãa laado.

²¹ Ned ninga fãa sẽn da mi wẽnd do-kãnga, n da mi a neerma, sã n wa pẽneg-a, a na n yɛɛsame la a yetẽ: ‹Bõe tɩ Soaala-Wẽnd maan woto ne tẽn-kãnga la wẽnd do-kãnga?›

²² La b na n leok-b lame: ‹Yaa b sẽn bas Naaba-Wẽnd, b yaab rãmb Wẽnnaam, sẽn yiis bãmb Ezipt tẽnga, yaa b sẽn tɩ kẽ wẽn-naandse, n waoog-ba, n kʋ b maandã, la Soaala-Wẽnd tʋm b yel-beed a woto fãa.› »