2 Kibayã 6 - SEBR SÕNGO

¹ A Salomo goma woto: «Naaba-Wẽnde, yãmb da yeelame tɩ y na n solga y meng sawad-sablgẽ,

² tɩ m yet tɩ m na me roog sẽn tog ne rĩma n kõ yã tɩ y tõe n zĩ be daar fãa.»

A Salomo gomda ne zãma wã

³ Dĩma sẽn wẽnemde, a yãee Israyɛl zãma wã fãa sẽn yɛs yĩngri t'a pʋʋs-a.

⁴ A yeelame: «M pʋʋsda Naaba-Wẽnd barka, a Israyɛl Wẽnnaam barka! Bãmb noor sẽn da kãab bũmb ning m ba a Daviid, b meng nug pids-a lame.

⁵ B ra yeel-a-la woto: ‹M sẽn yiis m buud, a Israyɛl, Ezipt tẽng tɛka m pa yãk tẽng, Israyɛl tẽnsa sʋka, n kɩt tɩ b me roogo tɩ m kẽes m meng a pʋgẽ ye. M pa yãk ned me sẽn na n lebg m buuda dĩm ye.

⁶ Ade, Zerizalɛɛm tẽng la m wa n yãk n zĩnd a pʋgẽ la foom a Daviid la m yãk yã tɩ f na n yɩ m buud, a Israyɛl, dĩma.›

⁷ M ba, a Daviid, sẽn waa n dat n me ro-sõng n kõ a Israyɛl Wẽndã,

⁸ Soaala meng n waa n leok-a: ‹F sẽn tʋlg n me roogo m waoogr yĩngã, f maana neere.

⁹ La ade, ka foo n na n me rooga ye, na n yɩ-la f biiga. N-ye! Na n yɩ-la f kur-wĩir biiga n na n me roogo m yʋʋra waoogr yĩnga.›

¹⁰ Bãmb pidsa b sẽn da kãabe, tɩ m dʋ m ba zaoorẽ n lebg a Israyɛl dĩma, wala b sẽn da wilgi. M mee roogo bãmba, a Israyɛl Wẽnnaam, waoogr yĩnga.

¹¹ M tol n ninga dooga pʋga kuga walsa koglgã. Zood ning bãmb sẽn yõg ne a Israyɛl kamba kaset bela a pʋgẽ.»

A Salomo pʋʋsgo

¹² A Salomo yalsa Soaala-Wẽnd maan-kugra taoore n tees a Israyɛl zãma wã la a tẽega a nusi n na n pʋʋse.

¹³ A Salomo ra maana geer ne zũudu la a da rɩgl-a-la sɩmanda tẽnsʋka. Geera woglem da yaa kãntɩɩs a nu, a yalma kãntɩɩs a nu, a zãndlma kãntɩɩs a tãabo. A Salomo dʋʋ n yĩgimda a zug, Israyɛl zãma wã taoore la a zẽka a nus n na n pʋʋse,

¹⁴ la a yeelame: «Naaba-Wẽnde, a Israyɛl Wẽnnaam, yãmb ka tar y to, yĩngri la tẽng zug ye. Yãmb zood la y yamleoog ka tol n lak ne y kamba sẽn kẽn tɩrg, n kẽn ne nonglem y taoora ye.

¹⁵ Y pidsa kãabg ning y sẽn da kãab y biig a Daviid, mam ba nongrã. Yãmb nug pãng pidsa y noor sẽn da togse, wala d sẽn ne rũnna wã.

¹⁶ Marsã, Naaba-Wẽnde, kãabg a ye la y kãab m ba a Daviid tɩ m kot-y tɩ y pids-a. Yaa yãmb sẽn yeele: ‹F kamba sã n maan gũusgu, n deeg m noor la b kẽn m taoore wala fo sẽn kẽne, a Israyɛl kõn kong dĩm sẽn yi f pennẽ, la sẽn na n dɩ naam m taoor ye.›

¹⁷ N-ye, Naaba-Wẽnde, pids-y rũnna bũmb ning y sẽn togs y sõgna, a Daviid!

¹⁸ La m na n sokame n gese, Naaba-Wẽnd tõe n zĩnda ninsaalb sʋk tẽng zug bɩ? Yĩngri la yĩngr saas sẽn ka tõe n deeg a soaba, doogã m sẽn me wã maanda a wãna n deeg-ba?

¹⁹ Kelg-y y yamba kosgo neere, Naaba-Wẽnde, m Wẽnnaam, kelg-y sẽn be-a yãmb taoora koɛɛg la a pʋʋsgo.

²⁰ Ypk-y y nin wĩndg la yʋngo n ges ro-kãnga, n ges y sẽn yet tɩ b pʋd y yʋʋr zĩig ninga. Kelg-y pʋʋsg ning m sẽn pʋʋsd yãmb zĩ-kãngã.

A Salomo pʋʋsda zãma wã yĩnga

²¹ Maam, a Salomo, la y buud a Israyɛl sã n pʋʋs y zĩ-kãngã bɩ y kelg-do. Zĩnd-y yĩngri, y sẽn be zĩig ningã n kelg la y kõ sugri.

²² B sã n dõnd neda n yet tɩ yẽ n kɩt t'a to dɩ bõne la woto wã bɩ a wẽen n kãab a meng beedo yãmb do-sõnga pʋga la y maan-kugra taoore,

²³ zĩnd-y yĩngr n kelg la y leoke. Bʋ-y bʋʋdo n paalg nin-wẽngã la y kõ nin-sõngã wala a sẽn tog ne.

²⁴ Yãmb buud a Israyɛl sã n beeg yãmb n kong pãng a bɛɛba taoore, a sã n deeg a kongre, n wa pẽg yãmba, n wa pʋʋs yãmb doog ning y sẽn be a soab pʋgẽ wã,

²⁵ zĩnd-y yĩngri n kelge la y kõ sugri la y bas-a t'a lɛɛg wa kẽe a tẽngẽ ne bãane.

²⁶ Yĩngr ko-yũusa sã n wa page tɩ saag ka le niida, y kamba sẽn beeg yãmb yĩnga, la b wẽnemd n teesa zĩ-kãngã n pʋʋse, n pẽg y yʋʋre, n deeg b kongre ne sũur sẽn tuubdi,

²⁷ zĩnd-y yĩngri n kõ y yemse, n kõ y buud a Israyɛl sugri la y wilg so-sõng ning b sẽn tog n dɩke la y kõ tẽnga saaga, tẽng ninga sẽn ya b pʋɩɩre.

²⁸ Kom sã n lʋɩ tẽngã, tɩ y neba bẽed nod kegemse, tɩ kooda wãkdẽ, tɩ gãnem sobd koodo, tɩ sʋʋr la kalwaar dɩt-a, tɩ bɛɛb pag tẽnga noore, sẽn ya yel-beed la bãag ning fãa n yõk y nebã,

²⁹ pʋʋsg la kosg sã n kose, sẽn ya bũmb ning yĩng la pʋʋsga pʋʋs yã, tɩ kosga kose, yaa nin-yend bɩ Israyɛl tõr n kote, tooga la yel-beeda sã n nek pʋtẽere, tɩ nus zẽk n tees ro-kãngã,

³⁰ zĩnd-y yĩngri n kelge, n kõ sugri la y maan ne ned kam fãa wala a sẽn tog ne, wala y sẽn mi ninsaal sũuri tɛka, tɩ yãmb bala n mi ninsaal sũuri.

³¹ Woto b na zoe yãmb la b tũ yãmb sore, b vɩɩm fãa pʋgẽ y sẽn kõ d ba rãmb tẽng ninga pʋgẽ.

³² Sãan meng sẽn ka kĩ ne y buud a Israyɛl, sẽn yi tẽn-zãorgẽ n wa, t'a wʋmame tɩ b gomd y yelle, tɩ b gomd y nug pãng yelle, t'a wa ro-kãnga pʋga n pʋʋs yãmba,

³³ zĩnd-y yĩngri, y sẽn be zĩig ningã n kelg-a, reeg-y, Soaala, a kosg fãa, woto bu-zẽmba fãa na wʋm y yʋʋre la b na yik wala y buud a Israyɛl, n dig rabeem y taoore la b bãng tɩ yaa m sẽn me roog ninga pʋga la b na n pẽg y yʋʋre.

³⁴ Y neba sã n tũ sor ninga y sẽn wilg-ba, n kẽng zabre, b sã n tẽeg n pʋʋs yãmba, b sã n wẽnemd b neng n ges roog ning m sẽn me yãmb yĩngã, y tẽn-sõnga pʋga,

³⁵ zĩnd-y yĩngri n kelg b pʋʋsgo, n kelg b koɛɛga la y maan wa b sẽn tog ne.

³⁶ B sã n beeg yãmba, tɩ d mi tɩ ned ka be n ka beegd yãmb ye, y sũur sã n wa puug ne-ba, tɩ y rɩk-ba n sagl b bɛɛba nusẽ, tɩ bɛɛba tall-ba n loog yembdo, tẽng sẽn pẽ bɩ tẽng sẽn zãrẽ,

³⁷ b sã n sulg b menga n zẽk b koɛɛg b yembda tẽngẽ n yeele: ‹Tõnd kongame, tõnd ka maan neer ye, tõnd wegmame,›

³⁸ b sã n zĩnd be n wẽnemd b neng n tees tẽng ning m sẽn me n kõ yã, ne yam paale la sũ-paale, b sã n tees y tẽn-nongrã, n tees y roogã m sẽn me y yʋʋr waoogr yĩngã,

³⁹ zĩnd-y yĩngri, y zaoora zugu, n kelg b kosgo, n kelg b pʋʋsgo, n maan-b neere la y kõ-b b beegra sugri.

⁴⁰ La marsã, m Wẽnnaam, puk-y y nin la y yoog y tʋba n kelg sẽn pʋʋsd-b yãmb do-kãnga pʋga.

⁴¹ M Wẽnnaam, sig-y marsã y vʋʋsga zĩigẽ n vigl y naam zaoore, sagl-y maan-kʋʋdba nao y fãagr sor pʋgẽ, kõ-y y buudã sũ-noogo.

⁴² Naaba-Wẽnde, da zãag-y y menga ne y sẽn kõ a soab naama ye, tẽeg-y kũun sõma niynsi y sẽn kõ y yamb a Daviid.»