2 Kibayã 4 - SEBR SÕNGO

¹ A Salomo maana zũud maan-kugri; a woglma taa kãntɩɩs pisi, a yalem kãntɩɩs pisi, a zãndlem kãntɩɩs piiga.

² A yẽnega zũudu n maan sĩng sẽn ya bedr-bedre, n pʋd-a tɩ mogre. A noora yalem yaa kãntɩɩs piiga, a yaa gilga. A zulum yaa kãntɩɩs a nu; gĩsg sẽn ta kãntɩɩs pis-tã bal n tõe n mobg-a n sege.

³ Rũms sẽn wẽnd niis la b naan n ning sĩnga noore, n gilgi, naoor a yiibu. Sõta bãmb piig, kãntɩɩg a ye zugu. Fãa naaga ne sĩngã n dõog wakat yɛnga.

⁴ Ko-sĩnga da roga zũud niis piig la a yi zugu. A tãab geta rɩtgo, t'a tãab get nin-taoore, t'a tãab get goabga, t'a tãab get yaanga. Sĩnga da roga bãmb zugu. B seesa ra togla pʋgẽ.

⁵ Sĩnga taglem yaa nug pʋga. A noora lɛɛ wa laaga, wa lɩɩng puugu. A ra tõe deega rʋg bɛd sẽn ta tus a yi, rʋk fãa sã n pit ne ko-yʋy a tãabo.

⁶ B maana zũud sĩn-bi n tong a nu rɩtgo, n tong a nu goabga, maanda rũmsa pegb yĩnga. Yaa ko-sĩnga pʋga la maan-kʋʋdba ra pekd b mense.

⁷ B rõoga sãnem fitils roagends piiga tɩ b ra tog n yɩɩ piiga, ro kãsenga pʋga, a nu goabga, a nu rɩtgo.

⁸ B maana te-roagends piiga n ning b ro-kãsenga pʋga, a nu rɩtgo, a nu goabga. B maana zɩ-mesdem laas koabga. B maan-b-la ne sãnem.

⁹ B maana zak kãsenga, maan-kʋʋdba yĩnga, ne a kʋɩlense la kʋɩlensa tablga ne zũudu.

¹⁰ Ko-sĩnga ra tara a zĩiga. A ra bee sẽn lebd rɩtg bilf, yaanga.

¹¹ A Uram-Abi maana tompɛglem laase, kardo, zɩ-mesdem laase. A maana a Salomo sẽn da kos a bũmb ning fãa wẽnd dooga yĩnga.

¹² Le paasa kut ra-lug bɛd a yiibã, ne kutã sẽn dogl b zugu n paas b yalma. N paas gãms a yiibu sẽn da mobg ralugsa zugẽ kutã.

¹³ N paas tɩ-biisa sẽn wẽnd pooloomse; bãmb kobs-naase n da yag gãmsã n tong rũns a yiibã.

¹⁴ N paas sĩn-bi piiga la b roagendsã.

¹⁵ N paas mogrã, yẽnda a ye bala, ne niis piig la a yiibã sẽn da be a tẽngrã.

¹⁶ N paas la-zulumsã, tompɛglem laasã, kardã, bãn-sɩlemsã sẽn tar n yaasd nemdã. D yeel bala t'a Uram-Abi sẽn da rõog teed niynsa fãa wẽnd dooga yĩnga, a da rõog-b-la ne zũud sẽn ya yɩlemde, wala a Salomo sẽn da kose.

¹⁷ Yɩɩ Zʋrdẽ bãoogẽ la a yõg-ba, Sukot la Seredata sʋka. Boaaga yɩɩ yagd sõngo la yagd taok boaaga.

¹⁸ A Salomo kɩtame tɩ b maan bũmb fãa zembala al tɩ b pa tõe n geelg zũuda sẽn dɩk n tʋma zɩslem ye.

¹⁹ A Salomo le kɩtame tɩ b rõog teed a taaba ne sãnem: ad sãnem maan-kugrã, te-roagendsã, bura kũun yĩnga,

²⁰ fitilsã ne b roagendse, fitils sẽn dõog ne sãnem, sõmblem dooga yĩnga tɩ b ra tog n wid a pʋgẽ.

²¹ Paas-y puudã, fitilsã, wõrsdsã sẽn maan ne sãnem sẽn yɩlg zãnga.

²² Paas-y sʋʋse, zɩ-mesdem laasã, ko-teesã, wisda laasã, la laas a taabã. Paas-y wẽnd dooga noya, sõmblem dooga kʋɩlensã, zaka kʋɩlensã, bãmb me yɩɩ sãnem.