2 Kibayã 34 - SEBR SÕNGO

A Zoziyas naam

¹ A Zoziyas da tara yʋʋm a nii a sẽn waa n lebg dĩma.

² A maana sẽn ta Soaala-Wẽnd yam, a togsa a yaab a Daviid n ka bʋgd goabg bɩ rɩtg ye.

³ A naama yʋʋmd a nii soaba, dẽ t'a nan ket n yaa bilfu, a sɩng n na n baoo Naaba-Wẽnd, a yaab a Daviid Wẽnde. A naama yʋʋmd piig la a yiibu soaba, a yiisa Zerizalɛɛm la Zɩɩda tãmsa zut maan-kuga, ra-peesdi, nin-naandse.

⁴ B sarma Baal dãmb maan-kuga a nifẽ, la tɩdara sẽn da wisd zĩis niynsã, a wãa ra-peesdi, wẽn-naandsa, a to-b-la wa zom, n dɩk n yugl sẽn da kʋʋd-b bãmb maanda yaado.

⁵ A yõoga maan-kʋʋdba kõab b maan-kuga zugu. Yaa woto la a yɩlg Zɩɩda la Zerizalɛɛm.

⁶ A Zoziyas maana boto me Manase, Efrayim, Simeõ la Neftali tẽn-peelmẽ, la b tẽn-kogse sẽn da zĩ ne nimbãanega.

⁷ A wãa maan-kugã la ra-peesdi, a too wẽn-naandsa n bõgse, a sarma tɩdara maan-kuga zĩig zãnga, n yaool n lɛɛg n wa Zerizalɛɛm.

Wẽnd dooga tʋʋma

⁸ A Zoziyas naam yʋʋmd piig la a nii soaba, a tʋlg n yɩlga wẽnd doogã. Woto wã a yiisa a Asaliya biig a Safã, tẽnga kombere a Maaseya, la koe-moãnd a Zoa, a Zoakaz biiga, tɩ b tɩ maneg Naaba-Wẽnd doogã.

⁹ B tɩ kɩsa maan-kʋʋd kãseng a Ilkiya, b sẽn da tall ligd ning n wa wẽnd doogẽ tɩ dagno-gũudba reegã. Ligda ra yita Manase tẽnsẽ, Efrayim tẽnsẽ, la Israyɛl tẽns a taaba, n paas Zɩɩda la Bẽnzame rãmb sẽn da kẽed Zerizalɛɛm.

¹⁰ B kɩsa ligdã wẽnd doog tʋʋm nanamse, a manegra yĩnga.

¹¹ B kõo ligdã ra-wãadbã, la ro-metbã tɩ b paam n da kuga la raado n tõog n maneg wẽnd doogã, Zɩɩda dĩm dãmba sẽn bas tɩ sãama.

¹² Neba tʋmame, b modgame. Sẽn da get b yelle yaa Levitse, a Merari yagense, a Yaat ne a Obadiya la a Keyat yagense, a Zakari la a Mesullam, bãmb la tʋʋmda zu-raoogo. Levitsa sẽn da minim yʋʋm teeda zãabã,

¹³ bãmb n da get zɩtba yelle, la b ra yaa tʋʋma pʋɩtba, ned kam fãa ne a tõog la a bãngre. Levits kẽer da yaa sɛb-gʋlsdba, bɩ tʋʋma wilgdba, bɩ ragno-gũudba.

Noora sebr yãeebo

¹⁴ B sẽn waa n vaagd ligdã b sẽn da tall n wa wẽnd dooga yĩnga, maan-kʋʋd a Ilkiya me yãenda a Moyiiz noora sebre.

¹⁵ A Ilkiya yeela sɛba naab a Safã: «M yãenda Noora sebr wẽnd doogẽ.» La a rɩka sebrã n kɩs a Safã.

¹⁶ A Safã tall-a lame n tɩ kɩs dĩma la a naagame n wilg yɛla sẽn be zĩig ninga. A yeela woto: «Y sẽn kõ y neba tʋʋmd ninga, b tar-a lame n dabd a baas-neera zĩigẽ.

¹⁷ B kɩsa tʋʋm-tʋmdba la tʋʋmda getba ligda sẽn da be wẽnd doogẽ wã.»

¹⁸ Dẽ poore sɛb gʋlsd a Safã yeela rĩma: «Maan-kʋʋd a Ilkiya kõ-m-la Sebr a ye.» A karma sebrã dĩma taoore.

¹⁹ A sẽn wʋm Noora karõngo, dĩma kẽesa a futu.

²⁰ A yeela a Ilkiya, la a Safã biig a Ayikam, a Mika biig a Abdõ, a Safã menga, sɛba naaba, la a Asaya, dĩma kombere:

²¹ «Kẽng-y n tɩ sok Soaala-Wẽnde b sebra poorẽ tɩ maam ne Israyɛl la Zɩɩda bãnge. B sũur tog n puuga wʋsg ne tõndo tɩ d ba rãmb ka reeg la b pa tũ sẽn gʋls sebra pʋgẽ wã ye.»

Bãngd-poak koɛɛga

²² A Ilkiya ne dĩma neba kẽnga bãngd poaka a Ulda nengẽ. Da yaa a Salum paga, a Tokeyat biiga, a Asra yagenga. A sɩda n da gũud futã. A ra bee Zerizalɛɛm Kẽedpaolgo. B goma ne-a n wilg yɛla sẽn be zĩig ninga.

²³ Dẽ la a Ulda yeel-b tɩ b taas dĩma koe-kãnga:

²⁴ «Ad Soaala-Wẽnd meng sẽn yete: ‹M na n taka yel-beed tẽn kãnga ne a neba zugu. La yaa kãab wẽns niyns sẽn be sebra pʋgẽ, sebr ning b sẽn karem Zɩɩda dĩma taoorã.

²⁵ B basa maam n waoog wẽn-naandse, n tʋlg n puug m sũuri ne b tʋʋm wẽnse. La sɩda m sũur widga bugum ne tẽngã la m bugma kõn kiis ye.

²⁶ La tɩ yeel-y Zɩɩda dĩma sẽn tʋm tɩ b wa sok-ma, ad maam a Israyɛl Wẽnnaam koɛɛga: Fo sẽn wʋm koees niynsa na n taasame.

²⁷ La ade, fo sẽn sãam f sũuri, n sulg f meng Naaba-Wẽnd taoore, f sẽn wʋm b sẽn segend bũmb ning tẽnga yĩnga, fo sẽn sulg f meng mam taoore n kẽes f futu n yãb m taoorã, ad-m yãeeme, maam, Naaba-Wẽnde.

²⁸ M na n bas-f lame tɩ f tɩ sak f saam dãmba, tɩ f sig f yaoogẽ ne laafi, tɩ f nin ka yãend yel-beeda fãa sẽn na lʋɩ tẽn-kãnga ne a neba zug ye.› » Maan-kʋʋd kãseng a Ilkiya ne a tʋmd-n-taasã lɛɛg n tɩ wilga dĩma Naaba-Wẽnd leokre.

Zood yõgbo

²⁹ Dĩma kɩtame tɩ b tigim Zɩɩda la Zerizalɛɛm kãsem-dãmba.

³⁰ Dĩma tũ-b lame n kẽ Wẽnd doogẽ, ne Zɩɩda la Zerizalɛɛm neba, maan-kʋʋdba, Levitsã, zãma wã fãa, nin-bɛd la kom-bõonego. Bãmb taoore a karma Zooda sebre b sẽn yãend wẽnd doogẽ wã.

³¹ Dĩma da yɛsa yĩngri a zĩigẽ la a kãaba Naaba-Wẽnde t'a na n modga a meng n deeg b noya, b salgse, b rog-n-miki, t'a na n tũ ne a sũuri, ne a pãng fãa, sebra, sẽn yet bũmb niynsã fãa.

³² A goma neba fãa zĩigẽ, f be Zɩɩda bɩ Bẽnzame tẽn-peelmẽ. Zerizalɛɛm dãmba saka zoodã ne Naaba-Wẽnd, b ba rãmb Wẽnde.

³³ Bũmb ning fãa sẽn da be Israyɛl tẽn-peelmẽ n ka tog ne Soaala-Wẽnde, a Zoziyas menes-a lame. A vɩɩma tõre, Israyɛl kẽed fãa lebga wẽnd-tũuda. B pa le lak ne Naaba-Wẽnd, b ba rãmb Wẽnnaam ye.