2 Kibayã 33 - SEBR SÕNGO

A Manase naam

¹ A Manase da tara yʋʋm piig la a yi a sẽn waa n lebg dĩma, a dɩɩ naam yʋʋm pis-nu la a nu Zerizalɛɛm.

² A maana sẽn ka ta Naaba-Wẽnd yam, a togsa bu-zẽmba wɩɩbdo, bu-zẽmb niyns Naaba-Wẽnd sẽn da rig bãmb taoorã wɩɩbdo.

³ A le yalsa wẽn-yooda waoogre, wẽnd niyns waoogre a ba a Ezekiyas sẽn da gɩdge. A mee maan-kug Baal dãmb yĩnga la a peesa raad n sele. A yĩgimda n waoog yĩngr ãdsa.

⁴ A saag n mee Naaba-Wẽnd dooga pʋga, wẽn-naandsa maan-kuga, n yĩm tɩ Soaala-Wẽnd da yeelame: «Yaa Zerizalɛɛm la m yãk n na n kẽes m ziira daar fãa yĩnga.»

⁵ A mee maan-kuga yĩngr ãdsa yĩnga, Naaba-Wẽnd dooga sɩmannẽ.

⁶ Yaa yẽ n yõog a kamb bugum Inom bãg-faagẽ. A bʋga bagre, n sogs kɩɩmse, n kẽ tɩto. A maana bũmb ning fãa Soaala-Wẽnd sẽn get wa wẽnga la sẽn yikd b sũuri.

⁷ A kɩtame tɩ b rõog bũmbu t'a tɩ kẽes-a wẽnd doogẽ. La Wẽnd da yeelame: «Yaa wẽnd dooga pʋga, yaa Zerizalɛɛm la m tũus Israyɛl sʋka, n na n kẽes m ziir daar fãa yĩnga.

⁸ M kõn le zãag Israyɛl kamba nao ne tẽng ning m sẽn kõ b ba rãmba ye. B ye n modg n tũ m sẽn wilgi, n deeg m noya, m saglse, m dog-n-mik, a Moyiiz sẽn taas bãmba.»

⁹ A Manase kẽesa moogo Zɩɩda la Zerizalɛɛm neba, al tɩ b wẽnema wa yɩɩg buud niyns Naaba-Wẽnd sẽn menes b rãmb bãmb taoorã.

¹⁰ Soaala-Wẽnd goma ne a Manase la a soolma rãmba la b pa kelg ye.

A Manase zʋg tedgre

¹¹ Naaba-Wẽnd yiisa Asiri tãnsoaben-dãmba tɩ b wa zab ne-a. B yõk-a lame n balg ne yãndo n tall a n kẽng Babilon.

¹² Woto wã a baoome n na n sigs Naaba-Wẽnd sũuri, n sulg a meng sõmbo a ba-rãmb Wẽnd taoore.

¹³ A sẽn sɩd pʋʋs-ba, b zoe-la a nimbãanega. B wʋma a kosgo n le tall-a n wa Zerizalɛɛm, a naama zaoorẽ. A reegame tɩ Naaba-Wẽnd la Wẽnde.

¹⁴ A Manase le manega a Daviid na-tẽnga yɩng lalgã, Giõ nin-taoore, bog zulunga yegende, n ta Zĩma noorẽ. Lalga tõogame marsã n gũbg Ofɛl, la a paasa a zãndlma wʋsgo. A ninga tãnsoaben-dãmb Zɩɩda tãnsoben-tẽnsa fãa pʋgẽ.

¹⁵ A zãaga Naaba-Wẽnd dooga marsã ne sãamba wẽn-naandse, ne naandã a meng sẽn da kudi, n paas maan-kugã a sẽn da me wẽnd dooga sẽn zao tãng ninga zugu, la Zerizalɛɛm pʋgẽ.

¹⁶ A lebsa Naaba-Wẽnd maan-kugrã a zĩigẽ, n kʋ laafi kosg maand la pẽgr maando. A wilga Zɩɩda rãmba tɩ b waoog Naaba-Wẽnd, Israyɛl Wẽnnaam.

¹⁷ Zãma wã sã n da ket n kʋʋd maand b tẽnsẽ, b pĩnd zĩisẽ, da ka le ya wẽn-naandsa yĩng ye, da yaa Soaala b Wẽnnaama yĩnga.

¹⁸ A Manase vɩɩma kibar gʋlsa Israyɛl dĩm dãmba sebrẽ. Sebr kãng pʋg la b gomd pʋʋsgã a sẽn pʋʋsa yelle, n gomd Soaala-Wẽnde, Israyɛl Wẽnda koees a sẽn paam bãngdb kʋʋng nengẽ.

¹⁹ B gomda a kosgã la Wẽnd sẽn deeg-a to-to. B sõdga a yel-wẽna, a wẽn-kɩɩsgã, zĩis niyns fãa a sẽn yals wẽn-faada waoogre, n sel da-peesdi, n dõog nin-naandse. B goma a sẽn deeg a kongre Wẽnd taoore. Dẽ fãa gʋlsa bãngdba sebrẽ.

²⁰ A Manase gãanda ne a saam dãmba, tɩ b mum-a a zakẽ, a biiga Amon n led-a a zaoorẽ.

A Amon naam

²¹ A Amon da tara yʋʋm pisi la a yiibu a sẽn waa n dʋ zaoore. A rɩɩ naam yʋʋm a yi Zerizalɛɛm.

²² A maana sẽn ka ta Soaala-Wẽnd yam, wala a ba, a Manase. A Amon kʋʋ maando n waoog nin-naandse, a sẽn da rõoge.

²³ A ka sulg a meng Naaba-Wẽnd taoor wala a ba a Manase sẽn da sulg a meng ye. A pʋs n yɩɩga a Manase ne beegre.

²⁴ A sõgen-kamb maana sudum n kʋ-a a zakẽ.

²⁵ Zãma wã me yika ne neb niyns sẽn kʋ a Amon n kʋ bãmb me. A Amon biig a Zoziyas la b dʋʋs a zaoorẽ.