2 Kibayã 32 - SEBR SÕNGO

Zab ne a Senakerib

¹ Ne a Ezekiyas vɩɩma sẽn yɩ sõngã, Asiri dĩm a Senakerib waa n kẽ-la a tẽngẽ. Sɩda a kẽe Zɩɩda n wẽ a sik tãnsoben-tẽnsa noore la a yeelame tɩ b po lalsã.

² A Ezekiyas bãnga neere t'a sẽn dat n lub n yɩɩda yaa Zerizalɛɛm.

³ Dẽ la a kɩt t'a tãnsoaben-dãmba la a gãndaadã pag bulsã sẽn da be lalga poore. B sõnga taaba.

⁴ Neb wʋsg waame n yẽd bulsã la sẽn yɩɩda, kʋɩlg a ye sẽn da zoet ko-sorẽ, ko-sor sẽn tuk zulunga. B ra yeta taab woto: «Bõe yĩng la d na n bas tɩ Asiri neba wa mik koom sẽn ka sɛt kaalẽ.»

⁵ A Ezekiyas yika ne raoodo, n le kɩt tɩ b me lal-gũbrã a sẽn da lʋɩ zĩig ningã. A paasa ro-lug-lugi, n le paas lalg a to yɩnga. A Daviid na-tẽngẽ, a le maneg n sĩda Milo bokã. A kuda kãna la gãnd ka tɛka.

⁶ A baoo tãnsoaben-dãmba n zĩndig-b tẽnga pʋga. B tigma neba tẽnga noore la b gomame n kõ-b raoodo, n yeele:

⁷ «Keng-y sũuri, maan-y raoodo, da zoe-y rabeem ye, da rig-y Asiri rĩma taoor ye, da rig-y rabeem a tãb-biis ka tɛka sẽn pʋgd-a wã taoor ye. Sẽn be-a ne tõndã pãng yɩɩda sẽn be-a ne Asiri rĩma.

⁸ Yẽ sẽn teegã yaa ninsaalba. Sẽn sõngd-a tõndã, yaa Naaba-Wẽnd meng nugu. Bãmb n zabd tõnd zĩigẽ.» Zãma wã sẽn wʋm Zɩɩda rĩm a Ezekiyas goama, b raood paasame.

A Senakerib gom-yoodo

⁹ Dẽ wẽnde tɩ Asiri dĩma, a Senakerib da bee Lakis ne a tãb-biisa fãa. A tʋma a neb a Ezekiyas nengẽ la Zɩɩda rãmba fãa sẽn da kẽed Zerizalɛɛma nengẽ. Sẽn tʋm b rãmba waa n yeela woto:

¹⁰ Ad Asiri rĩm a Senakerib koɛɛga: «Yãmb teega bõe taki la y sẽn paad Zerizalɛɛm sẽn gãneg tãp n gilgã?

¹¹ A Ezekiyas n belgd yãmba tɩ y Wẽnnaama na n fãaga yãmb mam nugẽ. Ad-y belgr la a belg yãmb, tɩ y rɩk kom la ko-yũud sore, a belg-y lame tɩ y rɩk kũum sore.

¹² M yet tɩ yaa Ezekiyas kãng n menes wẽn-naandsa waoogre la a wilg Zɩɩda la Zerizalɛɛm tɩ yaa maan-kugr a ye taoore, la y tog n wõgemde, tɩ maan-kugr a ye bal la y na n wisi.

¹³ Yãmb yĩma maam ne m ba sẽn maan bũmb ning ne tẽns ka tɛka laa? M sok n gese tẽn-kãens wẽnd dãmba tõog n fãag-b-la mam nugẽ bɩ?

¹⁴ Yaa tẽns ka tɛk la m wã yã la tẽn-bʋg wẽnde n tõog n fãag a neba mam nusẽ? Y tẽedame tɩ yãmb dẽnna n na n fãag-y bɩ?

¹⁵ A Ezekiyas da belg-y ye, a ra tudg-y woto ye. Da tẽe-y y rĩma goama ye, tɩ tẽng ba a ye wẽnde, rĩung ba a ye wẽnde, ka tõe n fãag-a, maam la m ba rãmb nusẽ ye. Yãmb Wẽnda me kõn fãag-y mam nugẽ bada.»

¹⁶ Asiri dĩma sẽn tʋm b rãmba ra ket n gomdame n paoogd Soaala-Wẽnd la b tʋʋm-tʋmd a Ezekiyas.

¹⁷ Asiri dĩma meng ra gʋlsa sebre n na n tʋʋs Soaala-Wẽnde, a Israyɛl Wẽnnaama. Sebra ra gʋlsa woto: «Wala buud a taab wẽnd dãmba sẽn pa tõog n fãag fɩ mam nugẽ, a Ezekiyas Wẽnnaama me kõn tõog n fãag bũmb ye.»

¹⁸ A Senakerib sẽn tʋm b rãmba ra gomdame Ebre rãmba goama n zẽkd b koɛɛga. B ra gomda ne Zerizalɛɛm nebã sẽn zao lal-gũbrã zugu. B da baood n na, n yɛɛs-b lame la b woog b raoodo tɩ b paam n kẽ tẽngã.

¹⁹ B ra gomda Zerizalɛɛm Wẽnda yelle wala b sẽn da gomd wẽnd dãmb a taaba yelle, neb sẽn maan ne b nusi.

A Ezekiyas pʋʋsga yõodo

²⁰ Yaa rẽ yĩng la dĩm a Ezekiyas la bãngda a Izayi, a Amos biiga, pʋʋs yã n yõk Naaba-Wẽnd sɛɛga.

²¹ Naaba-Wẽnd tʋma malɛka Asiri dĩma tãb-sikẽ t'a kʋ gãndaadã la tãnsoaben-dãmba. Dĩma lɛɛga ne yãnde n leb a tẽngẽ. A sẽn kẽ a wẽnd doogẽ a meng kamb kʋ-a-la ne sʋʋga.

²² Yaa woto la Naaba-Wẽnd fãag dĩm a Ezekiyas la Zerizalɛɛm dãmba, Asiri dĩma a Senakerib nugẽ, la a bɛɛb a taaba nugẽ. Naaba-Wẽnd kẽesa laafi a Ezekiyas soolmẽ.

²³ Wʋsg waa Zerizalɛɛm ne b kũuni Naaba-Wẽnd yĩnga la Zɩɩda dĩm a Ezekiyas yĩnga. Yell kãensa poore dĩma yʋʋr yiime n paas, bu-zẽmba sʋka.

A Ezekiyas kũum

²⁴ A Ezekiyas waa n lʋɩ bãaga la kella bilf bal t'a kiẽ. A pʋʋsame tɩ Soaala-Wẽnd sãoog-a b toore.

²⁵ A Ezekiyas ka lebs Naaba-Wẽnd sõm ye. Wilg-m-meng wuka a sũuri la Soaala-Wẽnd zaba ne dĩma, n zab ne Zɩɩda la Zerizalɛɛm.

²⁶ La a waa n tuubame, tɩ Zɩɩda ne Zerizalɛɛm me maan wa yẽ. Naaba-Wẽnd sigsa b sũuri, la b sũura ka le yik ne a Ezekiyas n tãag a kũum ye.

²⁷ A Ezekiyas paama ziiri la arzɛk ka tɛka. A tigsa sãnem, wanzurfu, kug neeba, kaam sẽn tar yũ-noodo, fan-teedo, laog sẽn be yõodo.

²⁸ A manega tẽnse a kooda bĩngr yĩnga, a rãama la a kaama yĩnga. A mee wuba a rũmsa yĩnga.

²⁹ A daa bõeense, a daa rũms wʋsgo, rũm-bɛd la rũm-bõonese. Naaba-Wẽnd da kõ-a-la b kũuna zembala.

³⁰ Yaa a Ezekiyas n gõdg Giõ kʋɩlgã n tees a Daviid na-tẽnga, nin-taoore. A Ezekiyas tõoga a sẽn mak fãa.

³¹ A sẽn waa n yik ne tɩtaam n gom ne Babilon dĩma tãnsoaben-dãmba, n wilg-b bõn-bãndã sẽn maan a soolmẽ wã, Soaala-Wẽnd bas-a lame bala n na n gese bõe n be a sũurẽ.

³² A Ezekiyas vɩɩma, a nonglma ne Soaala kaseto, dẽ fãa gʋlsa bãngd a Amos biiga a Izayi sebrẽ la Zɩɩda ne Israyɛl dĩm dãmb sebrẽ.

³³ A Ezekiyas kiime tɩ b mum-a a Daviid kamba yaadẽ. Zɩɩda la Zerizalɛɛm dãmb waoog-a lame. A biig a Manase n led-a a zaoorẽ.