2 Kibayã 31 - SEBR SÕNGO

Naaba-Wẽnd bal n tog ne waoogre

¹ Dẽ poore Israyɛl kamba fãa sẽn da tigma kẽe Zɩɩda tẽnsa fãa n wã kuga la raada sẽn pees n selã, n bugs tãmsa zut maan-kugã n menes-b zãnga, Zɩɩda, Bẽnzame, Efrayim la Manase tẽn-peelmẽ. B yaoolame n leb b tẽnsẽ la b zagsẽ.

² A Ezekiyas le pʋɩɩ maan-kʋʋdba la Levitsa sags-sagse. F ya maan-kʋʋd bɩ Levitga, f paamda f tʋʋmde. Tõe n yɩɩ yũ-nood maand tʋʋmde, bɩ laafi kosg maando, tõe n yɩɩ wẽnd doog tʋʋm a taaba, bark pʋʋsgo bɩ pẽgr yɩɩla, wẽnd dooga dagnoya gũubu.

³ Dĩma kɩsa a meng ligdi yũ-nood maanda yĩnga, yibeoog la zaabr dẽnna, vʋʋsg raar la ki-paal dẽnna, tig-raasa rẽnna, wala sẽn gʋls noor sebra pʋga.

⁴ A yeela zãma wã la Zerizalɛɛm dãmba, tɩ b ges tɩ maan-kʋʋdba la Levitsa paam b pʋɩɩre, b me tõog n deeg Soaala-Wẽnd noore.

⁵ Koɛɛga sẽn lʋɩ b tʋbrẽ, Israyɛl dãmb waa ne b kood rẽemsa lems zembala, paas rãam, kaam, sɩɩdo, la b sẽn paam b pʋtẽ fãa.

⁶ Israyɛl kamba la Zɩɩda tẽnsa neba waa ne rũmsa kom-dẽemse, b rũm-bɛd la b rũm-bõonese, b waa ne b yamleed kũun sõma, b talla fãa n wa zam taaba.

⁷ Yaa kiuug a tãab soaba la b sɩng yã, la yaa kiuug a yopoe soab la b baas yã.

⁸ A Ezekiyas ne a poorẽ dãmba kolg n gesa kũuna sẽn same la b pẽga Naaba-Wẽnd la b buud a Israyɛl.

⁹ A Ezekiyas soka maan-kʋʋdba la Levitsã kũuna poorẽ.

¹⁰ Yɩ-la a Azariya, maan-kʋʋdba kãsma, la a Sadok yagengã n leoke: «B sẽn sɩng n wat ne kũuna tɛka tõnd me modga ne rɩɩbo la sẽn kella labsa tɩ Naaba-Wẽnd ninga b buuda barka. Yaa kũuna la sẽn ket n sam woto fãa wã.»

¹¹ A Ezekiyas yeelame tɩ b maneg dot wẽnd dooga pʋga, tɩ b manege.

¹² Woto b tõog talla wakat buud fãa n wa bĩng be neba kũuni, lemsã la yamleoog kũun sõma wã. Levit a Konaniya ne a yao a Simeyi n soog b bĩngri.

¹³ Dĩma Ezekiyas naaga maan-kʋʋd kãseng a Azariya, tɩ yẽ n da get wẽnd dooga yelle la b bao nin-bãmba n paas a Konaniya ne a Simeyi, teeda gũub yĩnga. Yɩ-la a Yeyiyɛl, a Azaziya, a Naat, a Asayɛl, a Yerimot, a Zozabad, a Eliyɛl, a Ismakiya, a Maat, la a Benaya.

¹⁴ Levitga a Imna biig a Kore da soo yaang noorã gũudem, la yẽnda la b leb n kos t'a reegd yamleoog kũuna sẽn kõt Naaba-Wẽndã la a welg toore kũun-sõma ne kũun niyns sẽn ya-b sõmb n yɩɩdã.

¹⁵ Sẽn da sõngd a Kore wakat buud fãa, maan-kʋʋdba tẽnsẽ da yaa a Eden, a Miniyamin, a Yesuwa, a Semaya, a Amariya la a Sekaniya. Bãmb n da so rɩɩba pʋɩɩbo. B ra pʋɩt-a-la b tũud-n-taasã, bɛd la bõonese, ned kam fãa a tʋʋmda zĩigẽ.

¹⁶ Sẽn paama t'a yʋʋr gʋls fãa da reegda a pʋɩɩre, ba a yʋʋma sã n zems yʋʋm a tãabo. B ra pʋɩta neb niyns fãa sẽn da wat-b n tʋmd wẽnd dooga pʋga, ned kam fãa ne a sull la a raare.

¹⁷ B ra gʋlsda maan-kʋʋdba roog-roogo; la sã n ya Levitsã yʋʋm sẽn ta pisi, b tʋʋmda sull la b ra get n gʋlsd-ba.

¹⁸ B ra naagd n gʋlsa b zaka rãmb fãa, b pagba, b kom-dibli la b kom-pugli, b zĩnd-n-taas fãa sẽn tar sor n dɩt maanda ne b sẽn tũnugd bũmb niynsã.

¹⁹ Sã n ya maan-kʋʋdba, a Aarõ yagensã sẽn be-b rũmsa wãbneg zĩisẽ, n pẽ tẽns niyns b sẽn bok n kõ bãmbã, b ra yãka neb be tɩ b get b yelle n kõt bãmba b sẽn tog n deeg bũmb ningã, wala Levits niyns yʋʋr sẽn be sebra zugã.

²⁰ A Ezekiyas sẽn maan woto a soolma pʋgẽ a maana sẽn tog la sẽn ya sõmbo, Wẽnnaam a Soaala sẽn nonge.

²¹ A sẽn waa n na n maneg wẽnd doogã, a sẽn waa n yet tɩ b modg n deeg Soaala noor la b saglsã, a tʋlg n maana b sẽn dat fãa ne pʋ-peelem la rẽ me yĩng la bũmb ka tol n kedbe n baas neer zãnga.