2 Kibayã 30 - SEBR SÕNGO

Pak kibsa

¹ A Ezekiyas tʋma neb Israyɛl la Zɩɩda, n gʋls sebr a Efrayim la a Manase n yeel tɩ b wa Zerizalɛɛm wẽnd doogẽ n maan pak kibsa, n tẽeg a Israyɛl Wẽnnaam sẽn pɩʋʋg b sʋkã.

² Dĩma, a poorẽ dãmbã, zãma wã sedame tɩ b na n maana kibsã kiuug a yiib soaba,

³ t'a wakata da zoe n loogame. Maan-kʋʋdba ka paam n yɩlg b mens a wakata ye, la neba me ra ka paam n tigs Zerizalɛɛm ye.

⁴ Dĩma la zãma wã gesame tɩ boto n zemse.

⁵ B maana wa b sẽn yalsã. Woto b toola sebre n bool Israyɛl neba gilli, sẽn sɩng Dã n ta Beerseba, tɩ b wa Zerizalɛɛm tɩ b maan paka kibs Naaba-Wẽnd, a Israyɛl Wẽnnaama yĩnga, tɩ ka wʋsg n da paam n maan kibsa wala sẽn gʋls sebra pʋg ye.

⁶ Dĩma ne a poorẽ dãmba gʋlsa sɛba la b yiisa neba tɩ b saag Israyɛl la Zɩɩda tõre n moon woto: «Israyɛl kamba lɛɛg-y n wa kẽ a Abraam, a Izaak la a Zakoob Wẽnnaam, tɩ bãmb me na pa ne yãmba.

⁷ Da maan-y wa y ba rãmba la y saam-biisa ye, bãmb lak n basa Soaala-Wẽnde, tɩ Wẽnd me bas-b ne fare wala d sẽn ne a soab rũnna wã.

⁸ Da nak-y y kãare wa y ba rãmba sẽn maana ye. Lɛɛg-y n kẽ-y Wẽnde la y wa b roogẽ tɩ b welg-a-la toor b meng yĩnga la b na n zãaga b sũ-fõora ne yãmba.

⁹ Yãmb sã n lɛɛg n wa kẽ Naaba-Wẽnde, y saam-biisã la y kambã na paam tɩ b bɛɛba zoe b nimbãanega n bas-b tɩ b lɛɛg n wa b tẽngẽ, tɩ Naaba-Wẽnd, yãmb Wẽnnaama, yaa nin-noanga la nimbãan-zoeta, yãmb sã n lɛɛg n kẽ bãmba, b me kõn wẽnemd b neng ye.»

¹⁰ Sẽn tʋm b rãmba kẽe tẽng woo tẽnga, n ta Efrayim, Manase la Zabulõ. La bãng-y tɩ b yãee laado la paoogre.

¹¹ Asɛr neb kẽere la Zabulõ neb kẽer bala n sulg b meng n wa Zerizalɛɛm.

¹² Yɩɩ Zɩɩda bala la Soaala-Wẽnd nek neba raabo tɩ b na n deeg dĩma ne a poorẽ dãmba noore sẽn ya Naaba-Wẽnd meng noorã.

¹³ Neba tigma taab Zerizalɛɛm, kiuug a yiib soaba, Ziv kiuugu, n maan bur sẽn ka ning bɩll kibsa. Neba sɩd waa wʋsgo.

¹⁴ B sɩngame n wã maan-kuga sẽn be Zerizalɛɛm la wisda maan-kuga la b tɩ lob-b-la Sedrõ sudga pʋga.

Kibsa raare

¹⁵ B kʋʋ paka rũmsi kiuug a yiib soaba piig la a naas raare. Maan-kʋʋdba la Levitsã zoe yãnde n yɩlg b mense la b tõog n kolga ne maanda rũmsa wẽnd doogẽ.

¹⁶ Ned kam fãa tɩ yalsa a zĩigẽ wala a Moyiiz noora sẽn da wilgi. Maan-kʋʋdba da reegda zɩɩma Levitsa nusẽ n daagdẽ.

¹⁷ Ka zãma wã fãa n da paam n yɩlg ye. Woto wã Levitsa reega nin-bãmb zĩiga n koot rũmsã, b sẽn da ka tõe n kolg Naaba-Wẽnd taoorã.

¹⁸ Sɩda neb wʋsgo wala Efrayim dãmba, Manase rãmba, Isakar la Zabulõ rãmba da ka paam n yɩlg b mens ye. B da rɩɩ pakã la b pa tũ noora sẽn da rat ye. A Ezekiyas yõka sɛɛg bãmb yĩnga. A yeela woto: «Ned ning fãa sẽn tʋl ne a sũur n bao Soaala-Wẽnnaam a ba rãmb Wẽnde,

¹⁹ bɩ a paam a yel-wẽna yẽesgo, a sã n ka tõog n yɩlg a meng wa sẽn segde wakat fãa a sẽn kolgd Soaala-Wẽnde.»

²⁰ Naaba-Wẽnd deega a Ezekiyas kosgo, n pa maan neba bũmb ye.

²¹ Neb niyns sẽn da be-b Zerizalɛɛm maana bur sẽn ka ning bɩll kibsa ne sũ-noogo. Levitsa ne maan-kʋʋdba da pẽgda Naaba-Wẽnd ne b pãng fãa.

²² A Ezekiyas pẽga Levitsa sẽn da wʋm Soaala-Wẽnd daabo, n wa rasem a yopoe tõre, n na n dɩ la b pẽg Naaba-Wẽnde la b kõ-b maando.

²³ B naaga taab n yeel tɩ b na n paasa rasem a yopoe yɛsa, la sɩd yɩɩ dasem a yopoe sũ-noogo.

²⁴ Zɩɩda dĩm a Ezekiyas kɩtame tɩ b wa ne lols tusri, la piis tus a yopoe zãma wã yĩnga, tɩ dĩma poorẽ dãmb me wa ne niis tusri la piis tus piiga. Maan-kʋʋdba waa wʋsgo la b yɩlga b menga.

²⁵ Yɩɩ sũ-noog kãseng ne Zɩɩda rãmba, ne maan-kʋʋdba la Levitsã sẽn yi Israyɛl. Yɩɩ sũ-noogo ne b sẽn da yiis b rãmb b tẽnsẽ tɩ b be Zɩɩda bɩ Israyɛl tẽn-peelmẽ.

²⁶ Yɩɩ sũ-noog kãseng Zerizalɛɛm, tɩ b ra pa le yãend kibs a woto buudu al Israyɛl dĩma a Daviid biig a Salomo loogr poor ye.

²⁷ Levitsa sẽn ya-b maan-kʋʋdba ninga zãma wã barka. Soaala-Wẽnd zĩnda b yĩngr do-sõnga pʋga n wʋm b koɛɛga la b reega b pʋʋsgo.