2 Kibayã 29 - SEBR SÕNGO

A Ezekiyas

¹ A Ezekiyas yʋʋm da yaa pisi la a nu a sẽn waa n lebg dĩma. A dɩɩ naam yʋʋm pisi la a wɛ Zerizalɛɛm. A ma ra boondame t'a Abiya. A Abiya yaa a Zakari biiga.

² A naana taa Soaala-Wẽnd yam, tɩ bãmb taoore a kẽna wa a yaab a Daviid.

³ Yẽ n kɩt tɩ b le pags wẽnd dooga kʋɩlense, a naama pipi yʋʋmda pipi kiuugu. A le lebsa bũmb fãa b zĩisẽ.

⁴ A boola maan-kʋʋdba la Levitsã, n tigs b yaang kɩrenga

⁵ n yeel-ba: «Kelg-y ka, Levitse, yɩlg-y y mense, la y yɩlg d yaab rãmba Wẽnnaam doogo. Yiis-y rẽgd buud fãa.

⁶ Y ba-rãmb wegmame, n maan sẽn pa ta Naaba-Wẽnd yam. B basa bãmba, b pa le ges b rooga ye, b wẽnemda b kãare.

⁷ B paga zãonga noore, n kiis bugma, b pa le kʋ yũ-noog maoongo, b pa le wis tɩdare, b ro-sõnga pʋg ye.

⁸ Naaba-Wẽnd sũur puuga ne Zɩɩda la Zerizalɛɛm la yaa woto la Soaala-Wẽnd kɩt t'a lebg yel-yoogo, la bɛɛb laado, wala a sẽn yaa a soab rũnna.

⁹ Yaa rẽ yĩng la sʋʋg kʋ d ba rãmba, tɩ b wʋk d kom-dibli, d kom-pugli la d pagb n loog pa-weere.

¹⁰ M dat n yõga zood ne Naaba-Wẽnd, a Israyɛl Wẽnnaam, n kos-b tɩ b sigs b sũuri.

¹¹ M kamba, da le lak-y ne Soaala-Wẽnd ye tɩ yaa yãmb la b yãk n na n yals b taoore, tɩ y tʋm b tʋʋma, n ges b waoogre yelle, n ges b wisda yelle.»

¹² Levitsa yikame. Yɩ-la: a Amasayi biig a Maat, a Azariya biig a Zowɛl, a Keyat doogẽ, sã n yaa a Merari doogẽ, a Abdi biiga a Kis, a Yealelɛl biig a Azariya, a Gersõ doogẽ, a Zima biig a Zoa la a Zoa biig a Eden.

¹³ A Elizafã kamba: a Simri ne a Yeyiyɛl. A Asaf kamba: a Zakari ne a Mataniya.

¹⁴ A Eman kamba: a Yeyiyɛl ne a Simeyi; a Yedutun kamba: a Semaya ne a Uziyɛl.

¹⁵ B tigma b saam-biisã, n yɩlg b mense, wala dĩma sẽn yeele, wala Soaala-Wẽnd sẽn date. Dẽ poore b yɩlga wẽnd doogã.

¹⁶ B kẽe wẽnd doogẽ wã n na n yɩlg a. B yiisa wẽnd dooga sɩmannẽ bũmb ning fãa b sẽn yãend a pʋgẽ tɩ ya bõn-dẽgdo. B yiis-b-la bal-balle, n tɩ rʋʋg b Sedrõ bãg-faagẽ.

¹⁷ B sɩnga yɩlgrã kiuuga pipi raare. Yaa kiuuga raar a nii soaba la b ta wẽnd dooga zãongẽ. B yɩlga rooga dasem a nii. Dɩlla b sɛɛ pipi kiuuga piig la a yoob daare.

Sugr kosg maoongo

¹⁸ B bʋʋga a Ezekiyas a zakẽ n yeel-a: «Tõnd yɩlga wẽnd dooga zãnga. Sẽn sɩng maan-kugrã ne a teedo.

¹⁹ A Akaz sẽn da yiis teed niynsa fãa, tõnd le lebs-b-la b zĩisẽ. D dɩgl-b-la Naaba-Wẽnd maan-kuga taoore.»

²⁰ Dĩm a Ezekiyas wẽneg n yikame, n tigs a taoor dãmba tɩ b kẽng wẽnd doogẽ.

²¹ B waa ne lols a yopoe, pe-bi a yopoe n paas boees a yopoe yel-wẽna sugr kosgo maoong yĩnga. Maoonga na n kʋʋ dĩma yĩnga, wẽnd dooga yĩnga, Zɩɩda yĩnga. Dĩma kõo maan-kʋʋdba, a Aarõ yagensa, noore tɩ b kood dũmsã maan-kugra zugu.

²² B kooda niisã tɩ b kok b zɩɩma n daal a zugu.

²³ B kolga ne sugra kosg boeesã dĩma la zãma wã taoore tɩ b tẽeg b nus b zutu.

²⁴ B kood-b lame n daag b zɩɩma maan-kugra zugu tɩ yɩ sugr kosgo a Israyɛl gill yĩnga. La sɩda, ra yaa a Israyɛl gill yĩnga la dĩma tʋlg yũ-noog maoongã la sugra kosg maoongã.

²⁵ B kẽesa Levitsa wẽnd doogẽ ne kɛma, pendse, ruudsi wala a Daviid sẽn da yalse, tɩ dĩma bãngd a Gad, la Naaba-Wẽnd bãngd a Natã wilgi. Noorã ra yaa Soaala-Wẽnd noore tɩ bãngdba reegd-a n taasdẽ.

²⁶ Levitsa sẽn ta b zĩisẽ ne a Daviid yʋʋm teedã, tɩ maan-kʋʋdba me yɛs ne b tõntõodo,

²⁷ a Ezekiyas yeelame tɩ b kʋ yũ-noog maoongã. La b sẽn sɩng kʋʋbo, la yɩɩla me sẽn sɩnge, tɩ tõntõoda peebdẽ tɩ kɛma wẽedẽ, tɩ pɛndga la ruudga wãagdẽ, wala a Israyɛl dĩma a Daviid sẽn yalse.

²⁸ Zãma wã wõgemdame, n yɩɩnẽ, tɩ tõntõoda peebdẽ, n ta maoonga baasgo.

²⁹ A sẽn baase, dĩma ne a poorẽ dãmb yĩgimdame, la b wõgemdame.

³⁰ Dĩma ne a poorẽ dãmba yeela Levitsã tɩ b pẽg Soaala-Wẽnde ne a Daviid la bãngd a Asaf yɩɩla. Sɩd yɩɩ pẽgr menga. Bãmb me waa n yĩgimdame, b wa n wõgemdame.

³¹ A Ezekiyas zẽka a koɛɛg marsã n yeele: «Marsã yãmb n so Naaba-Wẽnd tʋʋma. Kolg-y, wa-y ne y maan-dɩtse, la y pẽgr maando.» Tɩ zãma wã wa ne maan-dɩtse, pẽgr maando la yamleoog kũuni.

³² Yũ-nood maanda niis yɩɩ pisopoe, pe-raad koabga, pe-bi kobs-yi. Fãa kʋʋ Naaba-Wẽnd sũur maagr yĩnga.

³³ Dẽ poore, yɩɩ niis kobs-yoobe la piis tus a tã la b kõ Soaala-Wẽnde.

³⁴ Maan-kʋʋdba sõor da paood ne b tõog n sɩɩg maanda fãa. Woto wã Levitsa sõng-b lame, tɩ fãa wa sɛ, tɩ b fãa yɩlge. Levitsa pus n wilgame tɩ bãmb n dat b mens yɩlgre n yɩɩda.

³⁵ B yõoga kaama me la ra yaa wʋsgo. B waa ne kũuna sẽn tũnugd maandã. Woto Wẽnd doog pʋga b le rɩka pĩnd waoogra sore.

³⁶ A Ezekiyas ne zãma wã sũur yɩɩ noogo b sẽn sak tao n pa kɩɩsã.