2 Kibayã 26 - SEBR SÕNGO

A Oziyas

¹ Zɩɩda rãmb lagma taaba n yãk a Oziyas n maan b dĩma, a ba a Amaziyas zĩigẽ. A yʋʋm da zemsa piig la a yoobe.

² Yẽ n le maneg n me Elat la a lebs-a Zɩɩda soolmẽ, a ba kũum poore.

³ A Oziyas sɩnga a naam dɩɩb a yʋʋm piig la a yoobe. A rɩɩ naam Zerizalɛɛm, yʋʋm pis-nu la a yiibu. A ma ra boondame tɩ Yekoliya, a ba yir yaa Zerizalɛɛm.

⁴ A maana sẽn ta Wẽnd yam, wala a ba a Amaziyas.

⁵ A modgame n bao Soaala-Wẽnde, a Zakari vɩɩma tɛka. A Zakari yɩ ned sẽn loog a taab ne Wẽnd nif zoeere. A Oziyas sẽn bao Soaala-Wẽnd wakat ning fãa a yell manegame.

A pãnga

⁶ A Oziyas tɩ zaba ne Filisti rãmba, n wã Gat lalse, Yabne la Asdod dẽnna. A le maneg n mee tẽns kẽer Asdod sẽnẽ la Filisti rãmb tẽn-peelmẽ.

⁷ Naaba-Wẽnd sõng-a-la a zabrẽ ne Filisti rãmba, ne Arabsã, ne Gur-Baal la Mewunitsã.

⁸ Amonitsa mens yaoo a Oziyas fadgo. A Oziyas pãnga waa n paasa wʋsgo. A yʋʋr yiime n ta Ezipt toaagẽ.

⁹ A Oziyas mee ro-lug-lug Zerizalɛɛm, gõdra noorẽ, Bãooga noorẽ, la lalsa pẽkẽ. A paasa b pãnga.

¹⁰ A mee ro-lug-lug we-raoogẽ, n ning ko-bao ka tɛka, tɩ rũmsa ra yaa wʋsgo. Koaadba ra yaa wʋsgo tẽn-nabrẽ wala tãmsa zutu. Bugsuntunda me ra yaa wʋsgo, tãmsa zut la Karmɛl. A Oziyas ra nonga koobo.

¹¹ A Oziyas tãb-biis ra zãmsa b tʋʋmda neere. B ra bob-n-dõbame, b ra weela sak-saka la a Yeyiyɛl ne a Maaseya da gʋlsa ned kam fãa ne a zĩiga la a tʋʋmde. A Ananiya, dĩma tãnsoab a ye, n da get b yelle.

¹² Yaa tãb-biis sẽn tar sũur ne zabre. B sagsa kãsem-dãmba da yaa bãmb tus a yi la kobs-yoobe.

¹³ Bãmb n da so tãb-biisã sẽn tõe n bob zabrã, bãmb tus kobs-tã la a yopoe la kobs-nu. B ra mii b tʋʋmda neere n tõe n sõng dĩma n zab a bɛɛba.

¹⁴ B sã n dabd zabr fãa, a Oziyas ra kõt-b-la gãndo, kãna, kut zug-peto, kut-futu, tãbdo la loob-kuga.

¹⁵ Zerizalɛɛm pʋgẽ a kɩtame tɩ sɩlem-dãmb maan zab-teedo, a ro-lug-luga zutu la lal-gũbra gõdrẽ. Yaa zab-teedo sẽn tõe n tão yɩɩg-yɩɩga la ne pãnga, kãn buudu la kug bɛda. A Oziyas yʋʋra zãaga zĩiga. La rẽ sɩd yɩɩ Soaala-Wẽnd n sõng-a.

A wilg-m-menga la a sɩbgre

¹⁶ A sẽn wa n mik t'a pãnga lebga wʋsgo, a maana wilg-m-menga la rẽ n wa ne a sɩbgre. A tar n basa Naaba-Wẽnd, a Wẽnnaam. A saag n kẽe wẽnd dooga pʋga, n wis tɩdar maan-kugra zugu.

¹⁷ A Azariya ne Wẽnd maan-kʋʋdba, nin-tɩrse sẽn ta pis-nii,

¹⁸ pa sak ye la b yeela a Oziyas: «Ka yãmba, d dĩm sõngo, n tog n yõog wisd Naaba-Wẽnd taoor ye, yaa maan-kʋʋdba, a Aarõ kamb sẽn welg toor dẽnna yĩnga. Yi-y wẽnd dooga pʋga tɩ y wɩɩbame, la ziir ninga Wẽnd sẽn kõ yãmb ka le tog ne y ye.»

¹⁹ A Oziyas sũur puugame t'a nan ket n zãad wisda laaga. A sũura sẽn yik ne maan-kʋʋdba n sɛ, la yĩng bãag sẽn puk a rĩirẽ, maan-kʋʋdba taoore, wẽnd dooga pʋga, tɩdar maan-kugra taoore.

²⁰ Maan-kʋʋd kãseng a Azariya ne a tũud-n-taasã yãee yĩnga sẽn puk a rĩirã tɩ b rig-a tao-tao la yẽ meng sakame n yi, a sẽn yãe tɩ yaa Soaala-Wẽnd meng nug n sɩɩs-a.

²¹ A Oziyas paa ne a bãagã n tãag a kũum. A paa roogẽ, b ka le bas-a t'a kẽ wẽnd dooga pʋg ye. A biig a Zotam n da get a zaka yelle la a soolma me yelle.

²² A Oziyas kibare, a sɩngre n taa a baasgo, bãngd a Izayi, a Amos biigã, n gʋls-a.

²³ A Oziyas kiime tɩ b mum-a dĩm dãmb yaad sẽn tuudẽ, la a ka naag ne a saam dãmba ye. B ra yeela woto: «A bẽeda yĩng bãaga.» A biig a Zotam n led-a a zaoorẽ.