2 Kibayã 25 - SEBR SÕNGO

A Amaziyas

¹ A Amaziyas yʋʋm pida pisi la a nu t'a yaool n deeg naam la yaa yʋʋm pisi la a wɛ la a rɩ naam Zerizalɛɛm. A ma ra boondame tɩ Zoadã la a ma wã roga Zerizalɛɛm.

² A Amaziyas maana taa Naaba-Wẽnd yam. Baasgo d ka tõe n yeel t'a maana pʋ-peelem zãng ye.

³ A naama sẽn waa n paam pãnga, a kʋʋ neb niyns sẽn da yãk a ba wã yõore.

⁴ A yaool n pa kʋ b kamb ye tɩ gʋlsa Noora pʋgẽ, a Moyiiz sɛba pʋgẽ, sebr ning a sẽn da paam Soaala-Wẽnd nengẽ. Ad sebra sẽn da yete: «Ba rãmb ka tog n ki b kamb beegr yĩng ye, kamba me ka tog n ki b ba-rãmb beegr yĩng ye; f kũum tũuda f meng beegre.»

⁵ A Amaziyas tigma Zɩɩda rãmb gilli, n tigim b sak-saka, n kõ-b neb tusr la neb koabg tãnsoaben-dãmba, a Zɩɩda wala a Bẽnzame. A sõda sẽn da tar-b yʋʋm pisi bɩ yɩɩd rẽ la a paama neb sẽn ta tus kobs-tã la yaa zab-mitb sẽn tõe n zẽk kãnd la gãongo.

⁶ Israyɛl pʋgẽ a yãee gãndaad tus koabga, n yao wanzurf zɩslem sẽn ta neb koabg la pis-nu zɩɩbo n kẽes-ba a tãpẽ.

⁷ Wẽnd norɛɛs a ye yaool n wa yeel-a lame: «Ad-y pa tog ye, dĩma, tɩ Israyɛl tãb-biis wa naag yãmb ye, tɩ Israyɛl la Efrayim ned fãa, Soaala-Wẽnd lak n bas-a lame.

⁸ B sã n naag foo, ba f modgda, ba f zabd ne raoodo, Soaala-Wẽnd kõn sõng-f tɩ f ka lʋɩ f bɛɛba nugẽ ye. Naaba-Wẽnd b ye tãa n tõe n sõnge la bãmb me n tõe n bas tɩ lʋɩ.»

⁹ Dẽ la a Amaziyas leok norɛɛsã: «La m wanzurfa sẽn ta neb koabg la pis-nu zɩɩba, ãnda n na n lebs-ma?» T'a yeele: «Soaala-Wẽnd tõe n kõo foo tɩ yɩɩg rẽ wɛ!»

¹⁰ Neb niyns sẽn da yit Efrayim tẽn-peelmẽ wã, a Amaziyas welg-b-la ne a nebã n lebs-ba, b tẽngẽ, tɩ b sũur kɛɛda.

A Amaziyas wɩɩbdo

¹¹ A Amaziyas yii ne nebã n tɩ tak zabre. Yaa Yamsem bãg-faaga la a tũ yã. Neb tus piig la a tõog Seyir.

¹² Zɩɩda kamba talla b sẽn yõg b rãmba n dʋ pĩig sẽn lugi n tus b tɩ b lʋɩ n bõgse.

¹³ Sã n ya ne neb niyns a Amaziyas sẽn pa reeg a tãpẽ tɩ b lɛɛg n leb b tẽngẽ wã, ad-y b tɩ kẽe Zɩɩda ne Samari tẽnse la Bɛt-Orõ. B sega zab-zabdb sẽn ta tus a tã n tõog-ba la b zɛɛ b zɛɛbo.

¹⁴ Zabr sẽn zab ne Seyir dãmb n sɛ, a Amaziyas waa ne Seyir wẽn-naandse; a waoog-b-la wa wẽnd, a wõgemda b taoore la a yõoga wisdu b yĩnga.

¹⁵ Dẽ la Naaba-Wẽnd sũur puug ne a Amaziyas tɩ b tʋm bãngd a nengẽ. Bãngda sokame: «Bõe tɩ f pʋgd wẽnd dãmba sẽn ka tõog n fãag b neb fo meng nugẽ?»

¹⁶ Bãngda yaasame n le baas n yeele: «M miime tɩ yaa Wẽnd n yẽs b na sãam f yelle la f sẽn ka reeg b saglsã n maan f sẽn maana.»

¹⁷ Zɩɩda dĩma, a Amaziyas, rega saglgã n tʋm tɩ b tɩ yeel a Zoakaz biiga, la Israyɛl dĩm a Yewu yagenga a Zowas: «Wa tɩ d wags taaba.»

¹⁸ La Israyɛl dĩm a Zowas leoka a Amaziyas, Zɩɩda dĩma, koe-kãnga: «Libã yõees-tabda tʋmame tɩ b wa yeel Libã kʋkã: ‹Dɩk f bi-pugla n kõ m biig t'a maan a paga.› Mik Libã we-rũmsa waa n taba yõees-tabdã.

¹⁹ Fo yeelame: ‹M tõoga Edom,› n na n maan wilg-m-menga. Pĩnd n pa ne f raoodã f zakẽ. Bõe yĩng la f baood n na n wã f menga la f naag n wã Zɩɩda?»

²⁰ A Amaziyas pa kelg ye. La yaa Soaala-Wẽnd n wa ne rẽ, n dat n ning b yãnde b sẽn kẽ Edom wẽn-naandsa yĩnga.

²¹ Israyɛl dĩma, a Zowas, boba zabre. Yẽ ne Zɩɩda dĩm a Amaziyas sega taab Bɛt-Semɛs, Zɩɩda tẽn-peelmẽ.

²² Zɩɩda dãmbã n kong raoodo n lɛɛg n zoe a Israyɛl taoore.

²³ Sã n yaa a Amaziyas, Zɩɩda dĩma, a Zowas biig la a Akaziyas yagenga, Israyɛl dĩm a Zowas pag-a-la roog Bɛt-Semɛs, n wa yiis-a be n dig Zerizalɛɛm. A luba lal-gũbrã, sẽn sɩng Efrayim noore n ta gõdra noore, kãntɩɩs kobs-naase.

²⁴ A looga ne sãnema fãa, wanzurfã, teeda fãa sẽn da be wẽnd doogẽ t'a Obɛd-Edom da gũudẽ, n paas na-yira arzɛka, la yemse, la a leba Samari.

²⁵ Zɩɩda dĩm a Zowas biiga a Amaziyas paa tẽng zug yɛs yʋʋm piig la a nu, a ba a Zowas kũum poore.

²⁶ A Amaziyas kibɛ a taaba, a sɩngre, n tãag a kũum, dẽ fãa pa gʋls Zɩɩda la Israyɛl dĩm dãmb sebrẽ bɩ?

²⁷ La a Amaziyas sẽn waa n lak n bas Naaba-Wẽnde, b seda a kũum Zerizalɛɛm. A zoe n diga Lakis. La b pʋg-a-la be n yõk n kʋ.

²⁸ B tʋk-a-la ne wiidi la b waa n mum-a-la ne a saam dãmba, a Daviid na-tẽngẽ.