2 Kibayã 23 - SEBR SÕNGO

A Atali ne maan-kʋʋdbã

¹ Yʋʋmd a yopoe soaba, a Zoyada baoo yella tɩɩm. A kɩtame tɩ b tɩ bool neb koabg tãnsoaben-dãmba: a Azariya, a Yeroam biiga, n paas a Yismayɛl, a Zoana biiga, n paas a Obɛd biiga a Azariya, n paas a Adaya biiga a Maaseya, n paas a Zikri biig a Elisafat, la b yẽsame n zems taaba.

² B saaga Zɩɩda tõre n bool Levitsa la buud kãsem-dãmba; fãa waa Zerizalɛɛm.

³ La b fãa wẽename tɩ b na n pʋga rĩm biiga poore, la yaa Wẽnd dooga pʋga la b wẽen dẽnna. A Zoyada yeelame: «Ad dĩma biiga. Bɩ a rɩ naam wala Naaba-Wẽnd sẽn kãab a Daviid kamba.

⁴ Ad-y y sẽn na n maan bũmb ninga. Y na n weela sags a tãabo, maan-kʋʋdba la Levitsã, sẽn na n kẽ wẽnd doogẽ, vʋʋsga raar pʋʋsg yĩnga, bãmb kẽer n na n lebg dagno-gũudbã.

⁵ Bãmb kẽer na n paa dĩma zakẽ, tɩ kẽer pa gũudba rota noore, tɩ zãma wã fãa pa wẽnd dooga sɩmannẽ.

⁶ Ned ba a ye ra saag n kẽ wẽnd dooga pʋga sã n ka maan-kʋʋdbã la Levitsã sẽn so b tʋʋna baraare, tɩ b welga toor rẽ yĩnga. Bãmb yẽ tõe n kẽeme. Zãma wã na n tedgame n gilgi.

⁷ Levitsa na n gũbga dĩma, tɩ ned kam fãa zãad a zab teedo, b na n yãaga dĩma a sẽn dabd zĩig ninga fãa. Sẽn kɩɩsa n kẽ wẽnd dooga pʋg bɩ b kʋ-a.»

⁸ Maan-kʋʋd a Zoyada sẽn yals bũmb ningã, Zɩɩda rãmba deega fãa. Sẽn baasd-b tʋʋmde wala sẽn da sɩngd-bã, fãa yalsa b sẽn yet tɩ b yals zĩig ninga tɩ maan-kʋʋd a Zoyada ka bak ned ba a ye n bas ye.

⁹ A kõo tãb-biisa kãna, gãndo, bɛd la bõonego, a Daviid dẽnna sẽn da be Wẽnd doogẽ wã.

¹⁰ A tonga zãma wã, ned kam fãa ne a zab teed a nugẽ. B tonga pipi gõdrã nug rɩtgo n tãag nug goabg gõdrã. B gũbga maan-kugrã ne wẽnd dooga, n bas dĩma a zĩigẽ.

¹¹ B yaoolame marsã n yiis dĩma biiga, n fõgneg-a naam pugla, n kõ-a naam. A lebga dĩma. A Zoyada ne a kamba pʋdga kaam a zugu. Dẽ poore b tãsame tɩ sãde: «Wẽnd na kõ dĩma yõore!»

¹² A Atali wʋma zãma wã sẽn kilsd la a kaasd dĩma, t'a na n kolg Naaba-Wẽnd roogã.

¹³ A sẽn yãend dĩma t'a yɛs yĩngr, wẽnd dooga noore, a sẽn yãend nanamsa la tõntõodã dĩma sɛɛgẽ, a sẽn yãend zãma wã t'a kɩdemnẽ la a peebd tõntõodo, a sẽn yãend yɩɩn-yɩɩndba ne b yʋʋm teedo tɩ b putẽ la b reesd yɩɩlã, a Atali kẽesa a futu n yetẽ: «Zãmbo, zãmbo!»

¹⁴ Maan-kʋʋd a Zoyada yiisa tãb-biisa ne b nanamse. A yeel-b lame: «Yiis-y paga, a Atali, yɩnga, la ned sã n kẽed a tãpẽ, bɩ b kʋ-a.» Maan-kʋʋda ra yeelame: «Da kʋ-y paga wẽnd dooga pʋg ye.»

¹⁵ A sẽn ta dĩma yiri b yõk-a-la wiida noorẽ, n kʋ.

A Zoyada le nekda Wẽnd tũudem

¹⁶ A Zoyada yalsa ne nebã la dĩma tɩ b na n modgame n yɩ Naaba-Wẽnd neba.

¹⁷ B tũu taaba n dʋ a Baal wẽnd doogã, n wãa-a zãnga. B sarma a maan-kugã, a wẽn-naandsã; b kʋ-la a Baal maan-kʋʋdã, a Matã.

¹⁸ A Zoyada gũnuga wẽnd doogã a Levi maan-kʋʋdbã. Yaa bãmb la a Daviid da kõ wẽnd doogã wala b pʋɩɩre, tɩ b na n tõog n kõ yũ-nood maando, wala sẽn gʋls a Moyiiz noora sebrẽ la b yɩɩla ne sũ-noogo wala a Daviid sẽn da rate.

¹⁹ Wẽnd dooga noyẽ, a ninga gũudba, sẽn na yɩlẽ tɩ nin-dẽgd da tõog n kẽ ye.

²⁰ A boola tãb-biisa nanamse, nin-bɛda sẽn da tar-b naam buud fãa la zãma wã la b yisa dĩma wẽnd doogẽ. B kẽe dĩma zakẽ. B tũu tẽnsʋk noorã. B tɩ zĩndg-a-la a zaoorẽ.

²¹ Neba fãa ra kɩdemda sũ-noogo la tẽnga pa kaoog ye. Sã n yaa a Atali, b kʋ-a-la ne sʋʋga.