2 Kibayã 2 - SEBR SÕNGO

Dooga meeb seglse

¹ A Salomo rɩka neb tus pisopoe, teeda tʋkr yĩnga, n dɩk tus pis-nii n na n vigs la b pees kug tãnga zugu, n dɩk neb tus a tã la kobs-yoobe sẽn na n ges-b tʋʋmdã.

² Dẽ poore a toolame tɩ b tɩ yeel Tir dĩma a Iram woto: «Maan wala f sẽn maan ne m ba a Daviid n tool-a ra-sĩdma t'a me a na-yirã.

³ Sã n ya maam a biigã, yaa roog la m dat n me Naaba-Wẽnd, mam Wẽnnaama, waoogr yĩnga. M datame tɩ wakat buud fãa, a Israyɛl pʋgẽ, bɩ tɩdar tõog n wis Naaba-Wẽnd taoore, tɩ bura b sẽn kõt bãmba tedg b taoore n ka vaanẽ, tɩ yibeoog la zaabr paamd a yũ-nood maando, tɩ vʋʋsg raare, ki-paala la tig-raase me paam b rẽnna, wala Soaala-Wẽnnaam sẽn yalse.

⁴ Roogã m sẽn dat n me wã na n yɩɩ ro kãsenga, tɩ tõnd Wẽndã n yɩɩd fãa.

⁵ La sã n ya sɩda, yĩngr saasa sẽn ka tõe n deeg a soaba, ãnda n tõe n me roogo n kõ bãmba? La sã n ka m sẽn dat n dʋʋs tɩdara yũ-noogã b taoorã, m na n mee rooga bõe yĩnga?

⁶ Tʋm ned sẽn mi sãnem, wanzurfu, zũudu, la kut tʋʋmd neere, ned sẽn tõe n wʋg peende t'a yɩ moomde, miuugu, mismiuugu, ned sẽn mi bõn-neeb peesgo. A na n waa Zerizalɛɛm, Zɩɩda tẽn-peelmẽ, n naag mam nebã, mitba sẽn zĩnd-b ne m ba a Daviid.

⁷ Tʋm Libã tɩ b wa kõ-m ra-sĩdma wa kʋgse, la sɩɩse. M wʋmame tɩ f nebã mii Libã tɩɩsa kɛɛbo. M neba na naag fo nebã n tʋm.

⁸ B na segl daad wʋsgo tɩ yira m sẽn dat n me wã bedrema la a neerma na n yɩka pelense.

⁹ Ra-kɛɛdba yĩnga, m na kõ alkam zom pet tus pisi, alkam kɛgeng zom pet tus pisi, rãam lagd tus pisi, kaam tʋgd tus pisi.»

¹⁰ Tir dĩma, a Iram, gʋlsame n leoke: «Naaba-Wẽnd nonga b buudã, b sẽn kõ-a dĩm wala yãmb to.»

¹¹ A paasame: «Israyɛl Wẽnnaam paam pẽgre! Bãmb n naan yĩngri la tẽnga. Bãmb n kõ a Daviid bi-sõngo sẽn pid ne tõog-m-meng la pãnga t'a na n me roog n kõ a meng la a me roog n kõ Naaba-Wẽnde.

¹² Rũnda bala, m tʋmd-f-la ned sẽn mi tʋʋmd sõmbo: yaa a Uram-Abi.

¹³ A ma yaa a Dã buud paga, t'a ba ya Tir neda. A mii sãnem tʋʋmde, wanzurfu, zũudu, kutu, kuga, daado. A tõe n wʋga peen moonde, mismiuugu, miuugu. A tõe n wʋga beren-dɩgre gĩs bãanese la a yũnug pɛɛl kẽer tɩ wẽneg saag-paga a Ninanina. A tõe n peesame bɩ n dõog bũmb fãa tɩ wẽnda. Yẽnda n na n tʋm ne yãmb nebã la y ba a Daviid sẽn bas b rãmbã.

¹⁴ Yãmb ye n sõng ne alkam pɛɛlga, alkam kɛgenga, kaama la rãama, wala y sẽn togsã. B tool dẽ marsã tɩ wa.

¹⁵ Tõnd na kɛ Libã tɩɩsã wala y sẽn dat tɛka. D na rugs b koomẽ n wa Zafa. Y na yaool marsã n sõng tɩ b ta Zerizalɛɛm.»

¹⁶ A Salomo tʋlg n bãnga sãamba fãa sẽn be Israyɛl tẽng sõore. A rɩka a ba a Daviid sõadga sebre la a mikame tɩ yaa tus koabg la pis-nu la a tã la kobs-yoobe.

¹⁷ A Yãka neb tus pisopoe tʋkr yĩnga, tus pis-nii kuga peesg yĩnga, tus a tã la kobs-yoobe tʋʋmda gesg yĩnga.