2 Kibayã 19 - SEBR SÕNGO

¹ Sã n yaa a Zozafat, yẽ leba a tẽngẽ n ka tol n pogl ye.

² Bãngd a Anani biig a Yewu n yi n seg dĩma n yeel-a: «Yɛ la yãmb yãe tɩ b sõngd nin-yaalga? Bõe tɩ y na n nong sẽn kis-b Wẽnde, n tak Wẽnd beem y zugu?

³ Bũmb la b yãe yãmb nẽngẽ sẽn ya sõmbo; yãmb yiisa ra-peesdi wã fãa sẽn da be tẽnga pʋga la y sũur yaa ned sẽn baood Wẽnd sũuri.»

Tẽeb yalgr tʋʋma

⁴ A Zozafat yalsa Zerizalɛɛm bilfu, la dẽ poore a yi n saag n gesa a nebã, sẽn sɩng Beerseba n ta Efrayim tãnga. La yaa sẽn na n le tall-ba n wa b yaab rãmb Wẽnda nengẽ, Naaba-Wẽnd nengẽ.

⁵ A ninga bʋ-kaoodb tãnsoben-tẽnsẽ la tẽns a taaba pʋga.

⁶ A yeel-b-la woto: «Bãng-y y tʋʋmna võore tɩ ka ninsaal yĩng la y kaood bʋʋdo, yaa Naaba-Wẽnd yĩnga, la b bee ne yãmba y bʋʋda wakato.

⁷ Dẽ yĩnga zoe-y Soaala-Wẽnd wʋsgo. Tũ-y noorã, deeg-y y vɩɩma pʋgẽ, tɩ Naaba-Wẽnd ka sak zãmbo, b ka sak a zagl yɩɩda a zagl ye, b ka rat tɩ b reeg kũuni tɩ bʋʋda tũ rẽ n kedb ye.»

⁸ A Zozafat ninga maan-kʋʋdb Zerizalɛɛm, n ning Levitse la sags kãsem-dãmba. Bãmb n da wilgd sẽn toge la b paasd zaba. B ra bee Zerizalɛɛm.

⁹ A Zozafat yeela bãmb me: «Tʋm-y tʋʋma woto, n zoet Soaala-Wẽnde, la y maand pʋ-peelem la y gãd rẽ y sũurẽ zãnga.

¹⁰ Koɛɛg ning fãa y saam-biisa sẽn na n tall n wa y nengẽ: yaa zɩɩm la b rat n daag n dole, yaa no-koeemde, noora poorẽ, saglsa poorẽ, dog-n-mika poorẽ, bɩ y vẽneg-ba, tɩ b ra beeg Naaba-Wẽnd ye la woto b sũura kõn yik ne tõndo la y saam-biisa ye la yãmb me kõn dɩ taal ye.

¹¹ A Amariya, maan-kʋʋdba kãsma, n na n lʋɩ y taoore, n leok-y sẽn segd la sẽn pa segd ne Naaba-Wẽnde. Sã n ya sẽn get dĩma yelle na n yila a Zebadiya, a Yismayɛl biiga, sɩmand naaba. Levitsa n na n sõng-y ne gʋlsgo. Da reem-y ye, tũ-y m sẽn wilga fãa. Wẽnd na zĩnd ne ned ning fãa sẽn baood neere!»