2 Kibayã 17 - SEBR SÕNGO

A Zozafat naam Zɩɩda

¹ A Asa biig a Zozafat n led zaoorẽ, a paasa a naama pãnga.

² A ninga tãb-biis a Zɩɩda tãnsoben-tẽnsẽ, n ning kombɛɛmba Efrayim tẽnse a ba, a Asa, sẽn pãb n deege.

³ Naaba-Wẽnd zĩnda ne a Zozofat t'a vɩɩma wẽneg a ba, a Daviid, rẽnd sẽn sɩng to-to. A ka pʋg a Baal dãmb ye.

⁴ A baoo Naaba-Wẽnd, a ba rãmb Wẽnde, la a reega b noore. A ka maan wa Israyɛl dĩm dãmb ye.

⁵ Naaba-Wẽnd kenga naama a nusẽ. Zɩɩda neba fãa ra yaooda fadgo la woto a paama waoor la arzɛk wʋsgo.

⁶ A sũura tol n kẽe Wẽnd n paase t'a wã wẽn-naandsã, n menes ra-peesdi wã fãa.

⁷ A naam yʋʋmd a tãab soaba, a yiisa a taoor dãmb kẽere tɩ b sa n karem Zɩɩda tẽnsa rãmba n nek b yam. Yɩ-la a Ben-Ayil, a Obadiya, a Zakari, a Netaneyɛl, a Mikaya.

⁸ Levitsa kẽer n yãag-ba. Yɩ-la a Semaya, a Netaniya, a Zebadiya, a Asayɛl, a Semiramot, a Zonatã, a Adoniya, a Tobiya, a Tob-Adoniya, n paas maan-kʋʋdba a Elisama la a Zoram.

⁹ B sɩnga b zãmsga Zɩɩda ne Wẽnd noora sebre. B saaga Zɩɩda tẽnsa fãa n zãmsd neba.

¹⁰ Naaba-Wẽnd kɩtame tɩ tẽns niyns sẽn da gũbg-b Zɩɩda rig rabeem kãsenga. B pa tak zabr ne a Zoazafat ye.

¹¹ Filisti rãmba mens ra wata ne kũuni la ligdi. Arabsa waa ne rũmsi, pe-raad tus a yopoe la kobs-yopoe la boees tus a yopoe la kobs-yopoe.

¹² A Zozafat pãnga da tara paasgo, a mee tãnsoben-doto la kood bĩngr tẽnse.

¹³ B paam n bĩnga kood zembala Zɩɩda tẽnsẽ. A ninga tãb-biis sẽn tar sũur Zerizalɛɛm.

¹⁴ Ad-b sõore, roog-roogo. A Zɩɩda roogo: tãb-biis sẽn tar sũuri, bãmb tus kobs-tã, tɩ b tãnsoaba yaa a Adna,

¹⁵ n le paas tãb-biis tus kobs-yi la pis-nii tɩ b tãnsoab yaa a Zoana.

¹⁶ Sẽn waa n paas-a yɩ-la ned sẽn kẽ Naaba-Wẽnd tʋʋmda ne yamleoogo, a Zikri biig a Amasiya. A neba yɩɩ tãb-biis sẽn pid ne raoodo, bãmb tus kobs-yi.

¹⁷ Sã n yaa a Bẽnzame roogo, yɩ-la a Eliyada, gãndaoog menga ne neb tus kobs-yi, sẽn bob tãbdo la sẽn zãad gãndo.

¹⁸ Yẽ sɛɛgẽ da yaa a Zozabad, yẽ ra tara tãb-biis tus koabg la pis-nii sẽn bob zabre.

¹⁹ Sẽn da sõngd-b dĩma la woto, la pa gomd neb niyns a sẽn da ning tãnsoben-dotẽ wã, Zɩɩda tẽn-peelma fãa pʋgẽ ye.