2 Kibayã 16 - SEBR SÕNGO

A Asa ne a Basa zaba

¹ A naama yʋʋmd pis-tã la a yoob soaba, Israyɛl dĩm a Basa yika zabr ne a Zɩɩda. A maneg n me Rama n paas a pãnga la a tõog n gɩdga Zɩɩda dĩma a Asa leebgo.

² A Asa kong n kẽe wẽnd doogẽ, n kẽ dĩma roogẽ n yãk wanzurf la sãnem n tool Aramsa dĩma, a Ben-Adad. Dĩm kãng ra kẽeda Damas. A Asa yeel-a-la woto:

³ «Zood n be maam ne foom tẽnsʋka, m ba la fo ba tẽnsʋka; m toond-f-la wanzurf la sãnem. Ade, sãam f zooda ne a Basa, Israyɛl dĩma, t'a zãag, la a ra le wa zab ne m ye!»

⁴ A Ben-Adad deega dĩma Asa kosgo. A yiisa a tãnsoaben-dãmb tɩ b tɩ zab ne Israyɛl tẽnse. A pãba Iyõ tẽnga, Dã, Abɛl-Mayim, la Neftali tẽnsã, a sẽn da bĩngd a kood zĩis niynsã.

⁵ A Basa sẽn wʋm dẽ a bas a meeba a sẽn da met Rama.

⁶ A Asa tɩ wʋka fãa n wa Zɩɩda. Yaa kuga la raadã, la b tall-b lame n me Geva la Mispa, n paas b pãnga.

⁷ Yaa wakat kãng la bãngd a Anani wa dĩma a Asa mengẽ. Ad-a sẽn yeele: «Fo sẽn bas Naaba-Wẽnd teegre n teeg Aram dĩma, bãng t'a tãb-biisa na n fʋsg n yi-la f soolmẽ.

⁸ Nubi la Libi tãb-biisa ra naaga tãaba n ya neb ka tɛka, n tar wiidi la bilim-bilm ka tɛka. Fo sẽn da teeg Naaba-Wẽnd yĩnga, b rɩk-b lame n sagl f nugẽ.

⁹ Naaba-Wẽnd nin kargda tẽnga gilli n na n keng sẽn kẽed b bãmb sũuri. Fo maana yalemdo, la marsã tɛka yaa zabr la f na n yãe.»

¹⁰ A Asa sũur puuga ne bãngdã, la a sẽb-a lame n kẽes roogo. Baraar tɛka a zãa toogo, a soolma neb kẽere.

A Asa kũum

¹¹ A Asa kibare, a sɩngre n ta a baasgo, fãa gʋlsa a Israyɛl la a Zɩɩda dĩm dãmba sebrẽ.

¹² A naam yʋʋmd pis-tã la a wɛ soaba, a yika bãag sẽn zab a nao. A bãaga pʋgẽ a basa Naaba-Wẽnd teegre n teeg tɩt rãmba.

¹³ A Asa kiime, a naam yʋʋmd pis-naas la a ye soaba.

¹⁴ B mum-a-la yaoog ning a meng sẽn da kɩt tɩ b tu a Daviid na-tẽngẽ. B gãneg-a-la a gãagẽ n wʋk yũ-nood kaam, la tɩdare la bõn-yood a taaba n zam-a. A waoogr yĩnga, b widga bugum sẽn ka zĩnd taar ye.