2 Kibayã 13 - SEBR SÕNGO

A Abiya naam Zɩɩda

¹ A Zeroboam naam yʋʋmd piig la a nii soaba la a Abiya lebg Zɩɩda dĩma.

² A rɩɩ naam yʋʋm a tã Zerizalɛɛm. A ma ra boondame t'a Mikaya n ya Gibeya rao a Uriyɛl bi-pugla. A Abiya ne a Zeroboam talla zabr ne taaba.

³ A Abiya yi n seg-a-la ne tãb-biis sẽn pid ne raoodo, tãb-biis tus kobs-naase sẽn mi zabr sõmb-sõmbo. A Zeroboam me yii ne tãb-biis sẽn pid raoodo, sẽn mi zabr sõmb sõmbo, bãmb tus kobs-nii.

A Abiya koɛɛga

⁴ A Abiya dʋ Semarayim tãng sẽn be Efrayim tãmsa sʋka, n yeele: «Zeroboam, la yãmb fãa, Israyɛl kamba, kelg-y yã!

⁵ Yãmb da tog n tẽegame tɩ Naaba-Wẽnd, a Israyɛl Wẽnnaam, kõ-la a Daviid Israyɛl naam daar fãa yĩnga. Yaa zood sẽn yalse n pa le tõe n viigi, a Israyɛl ne a kamba yĩnga.

⁶ A Nebat biiga a Zeroboam, a Daviid biiga a Salomo sõgne, yik n zẽka a zug ne a soaala.

⁷ Nin-yaalse, nin-yoodo n yik n kẽ sʋka n sagl-a Roboam la a sẽn da nan ket n ya yãag yĩnga a basame tɩ b belga n tõog-a.

⁸ Marsã y yetame tɩ y kõn sulg y mens a Daviid yagensa taoore, tɩ naama yaool n ya Naaba-Wẽnd n ning-a a Daviid kamba nugẽ. Ad-y y sẽn sũ taaba zembala, tɩ y wẽn-naandsa ya sãnem nag-bi a Zeroboam sẽn dõog n kõ yã!

⁹ Yãmb rigame n yiis y sʋka, Naaba-Wẽnd maan-kʋʋdba, a Aarõ kamba, n paas Levitsã, n yaool n bao y toorẽ maan-kʋʋdb wala bu-zẽmba sẽn maandã. Yãmb nengẽ, ned ning fãa sẽn wata ne loalga la piis a yopoe n dat maan-kʋʋr tõogo, ra tõe n lebga maan-kʋʋda, wẽn-naand maan-kʋʋda!

¹⁰ Sã n ya tõndo, Naaba-Wẽnd la d Wẽnde la d ka bas-b ye. A Aarõ kamb la maan-kʋʋdba, tɩ Levitsa sõngd-ba.

¹¹ Yibeoog la zaabr fãa d kʋʋda d yũ-noog maando Naaba-Wẽnd, d Wẽnnaama yĩnga. D tara tɩdar sõngã, d dɩgenda kaset buri, a roagendga zugu, d tara sãnem fitil kãsenga n yõgend zaabre. Tõnd ket n deegda Naaba-Wẽnd, d Wẽnnaam noor, tõnd ka bas-b wa yãmb ye.

¹² Tõnd Tãnsoab la Naaba-Wẽnde la d le tara b maan-kʋʋdba ne b tõntõodo. Bãmb n na n peeb tɩ tõnd kelem la d sɩng zabr ne yãmba! Israyɛl kamba, da kaoog-y zabr ne Naaba-Wẽnd, y yaab rãmb Wẽnd, zaalem ye! Ka na n yɩ raood tʋʋmd la y na n tʋm ye.»

Zabre

¹³ A Zeroboam yãka tãb-biis kẽere tɩ b na n soos n leb Zɩɩda rãmba kudgẽ. Woto a Zɩɩda ra nee Israyɛl zãma wã a taoore mik neb n solg poorẽ.

¹⁴ B sẽn wẽnemde, Zɩɩda rãmb yãeeme tɩ zab-zabdba gũbg-b-la taoor la poorẽ. B yõka Soaala-Wẽnd sɛɛga. Maan-kʋʋdba peeba tõntõodo.

¹⁵ A Zɩɩda rãmb tãsa b zabr kɛlenga, la wakat kãng bala Naaba-Wẽnd kʋ-la a Zeroboam ne a nebã, a Abiya la Zɩɩda taoore.

¹⁶ A Israyɛl kʋɩɩ tĩig a Zɩɩda taoore, Naaba-Wẽnd sagl-b-la a Zɩɩda nugẽ.

¹⁷ A Abiya ne a tãb-biisa tõog-b-la sõmb-sõmbo. B neb tus kobs-nu sẽn ya zab-mitb lʋɩɩme.

¹⁸ A Israyɛl paama yãnde, a Zɩɩda raood paasame, tɩ b teega Naaba-Wẽnd, b ba rãmb Wẽnde.

¹⁹ A Abiya pʋga a Zeroboam n deeg a tẽns kẽere. Betɛl ne a tẽn-kogse, Yesana ne a tẽn-kogse, Efrõ ne a tẽn-kogse.

²⁰ A Abiya wakato Soaala-Wẽnd wooga a Zeroboam naama pãnga. Naaba-Wẽnd wẽ-a lame n kʋ.

²¹ A Abiya maneg n vigla a naam zaoore. A kẽe kãadem ne pagb piig la a naase, n dog kom-dibli pisi la a yi, kom-pugli piig la a yoobe.

²² A Abiya kibare, a vɩɩma sẽn yɩ a soaba, a tʋʋma, fãa gʋlsa bãngd a Ido sebrẽ.

²³ A Abiya kiime tɩ b mum-a a Daviid na-tẽnga. A biiga Asa n led-a a zaoorẽ. A Asa naama wakato, tẽnga zĩnda yʋʋm piig ne laafi.