2 Kibayã 12 - SEBR SÕNGO

Zabr ne Ezipt dĩm a Sisak

¹ A Roboam naam ra paam n viglame n tar pãnga, la wakat kãng la a yik ne a Israyɛl tõre n zãgs Soaala-Wẽnd noore.

² A naama yʋʋmd a nu soaba, Ezipt dĩm a Sisak gãnega tãp Zerizalɛɛm, a sẽn da yi Wẽnd poorẽ wã yĩnga.

³ A waa ne bilim-bilm tusr la kobs-yi, ne wed-dʋʋdb tus pisoobe la tãb-biis ka tɛka sẽn yi Ezipt ne-a, ne Libi, Suk la Nubi.

⁴ A pãba Zɩɩda tãnsoben-tẽnsa la a taa Zerizalɛɛm.

⁵ Bãngd a Semaya waa n yãenda a Roboam la a tãnsoaben-dãmba tɩ b sẽn wʋm a Sisak rãamde, b fãa zoe n wa tigma Zerizalɛɛm. Ad-a sẽn yeele: «Naaba-Wẽnd koɛɛg la woto. Yãmb basa maam, yaa rẽ me yĩng la mam me bas yãmb ne a Sisak.»

⁶ Woto wã tãnsoaben-dãmba ne a Roboam sulga b meng Soaala-Wẽnd taoore. B yeelame: «Naaba-Wẽnd sẽn maana zemsame.»

⁷ La Naaba-Wẽnd sẽn yãend tɩ b tuubame b yeela a Semaya: «B sẽn deeg b kongra yĩnga, m kõn kʋ-b zãng ye. Sã n yɩ bilfu m na fãag-ba, tɩ ka na n tũ ne a Sisak nugu tɩ m sũura bugum yõog Zerizalɛɛm ye.

⁸ La ade, a na n kẽes-b-la a tʋʋma la woto b na bãng são-sãood sẽn be zĩig ninga. Yaa mam nengẽ, yaa bɛɛba nengẽ, b na bãnge.»

⁹ Ezipt dĩm a Sisak waa Zerizalɛɛm. A kɩtame tɩ b yiis Soaala-Wẽnd arzɛka sẽn da be wẽnd doogẽ la dĩma arzɛkã. A looga ne fãa gilli; sãnem gãndã a Salomo sẽn kɩt tɩ b kuda fãa loogame.

¹⁰ A Roboam kuda zũud gãndo n lebse. A yeela sẽn da kogend b dĩma yõora kãsem-dãmba sẽn da be dĩma zaka noorã tɩ b ges b yelle.

¹¹ Dĩma sã n da rabd wẽnd doogẽ fãa, sẽn da kogenda a yoorã ra wat n dɩk-b lame n yaool n le wa lebs-ba.

¹² Dĩma sẽn sulg a meng yĩnga, Wẽnd ka bas tɩ b sũurã fudg n daag n sãam-a zãng ye. Zɩɩda tẽn-peelma ra ka pid ne wẽnem bal ye. Bõn-sõma me ra ket n bee be.

¹³ Dĩma naam maneg n vigla Zerizalɛɛm n paase. A Roboam da tara yʋʋm pis-naase la a ye a sẽn waa n lebg dĩma la a dɩɩ naam Zerizalɛɛm, tẽng ning Naaba-Wẽnd sẽn tũus Israyɛl tẽnsa sʋka n na n maan b na-tẽnga. A Roboam ma ra boondame t'a Naama. A ra yaa Amonitga.

¹⁴ A sẽn maan tɩ ka yɩɩ neere, yaa a sẽn pa kẽ Naaba-Wẽnd ne a sũuri.

¹⁵ A Roboam vɩɩma kibare, a sɩngre n taa a baasgo, fãa pa gʋls bãngd a Semaya sebrẽ n paas bãngd a Ido me rẽnnẽ? A Roboam ne a Zeroboam zaba ka yãk raar n yals ye.

¹⁶ A Roboam kiime tɩ b mum-a a Daviid na-tẽngẽ. A biig a Abiya n led-a a zaoorẽ.