2 Kibayã 10 - SEBR SÕNGO

ZƖƖDA DĨM DÃMB KIBARE Zɩɩda welgre

¹ A Roboam kẽnga Sikɛm tɩ yaa Sikɛm la a Israyɛl tigim n yug a na-paalga.

² A Nebat biig a Zeroboam sẽn bãng rẽ, a yii Ezipt n wa. Yẽ ra zoe-la a Salomo rabeem n dig Ezipt tẽnga.

³ B bool-a lame la a waa Sikɛm tigsgã. Buuda goma woto ne a Roboam, dĩm paalgã:

⁴ «Y ba wã ra zɩlga tõnd zɩɩb sẽn zis wʋsgo, d kos tɩ y yols-do tɩ woto d na pʋg yã.»

⁵ A leoka buudã: «Kul-y la sã n maan dasem a tã bɩ y lɛɛg n wa.» La neba loogame.

⁶ A Roboam soka nin-kẽemsã sẽn da sõngd a ba a Salomo a sẽn waa n ketẽ: «M tog n leok-b-la wãna?»

⁷ Tɩ b yeele: «Yãmb sã n yɩ bʋgsgo, n kelgd-ba, n kõt-b koe noodo, b na tũ yãmb daar fãa.»

⁸ A Roboam basa nin-kẽemsa saglse, n sok a reemd-n-taase sẽn da paam tʋʋmd a sɛɛgẽ, zãma wã zãab tʋʋmde.

⁹ A sok-b-la woto: «Y yetame tɩ m leok nin-bãmba wãna? Ad-y yaa woto la b gom ne-ma: ‹Yols-y zɩɩb ning y ba sẽn da zɩlg tõndã.› »

¹⁰ Kom-bɩɩbã, a reemd-n-taasã leokame: woto la y na n yeel sẽn togs b yãmbã: «Y ba zɩlga tõnd wʋsgo, la yãmb yols-dã. Yeel-y woto: ‹M nug-bila pãng yɩɩda m ba kanga.

¹¹ M ba tʋka yãmb sẽn zɩse la mam na n paasa y zɩɩbo. M ba pãba yãmb ne sãbse la mam na pãb-y ne kaas sẽn yod kutu.› »

¹² Dɩlla a Zeroboam ne zãma wã le tigma taab a Roboam taoore dasem a tã wã sẽn waa n pidi, wala a meng sẽn da wilgi: «Lɛɛg-y n wa ka ra-yɩta.»

¹³ Dĩma leok-b-la pãr-pãre. Dĩma pa reeg nin-kẽemsa sagls ye.

¹⁴ Yaa a reemd-n-taasa la a kelg yã. Ad-a sẽn yeele: «M ba tʋka yãmb sẽn zɩse, la mam na n paasa y zɩɩbo. M ba pãba yãmb ne sãbse la mam na pãb-y ne kaas sẽn yod kutu.»

¹⁵ Dĩma pa kelg zãma wã ye, la rẽ yɩɩ Soaala-Wẽnd n lʋɩ sʋka sẽn na n yɩlẽ n pids b sẽn da kãab a Nebat biig a Zeroboam ne Silo bãngd a Ayiya noore.

¹⁶ Dĩma sẽn pa sak n kelg zãma wã, Israyɛl nug goabg rãmba me leokame: «D pʋɩɩr bʋgo n be ne a Daviid? Tõnd pʋɩɩr ka be a Zese biig nugẽ ye. Dẽ yĩnga, Israyɛl leb f rotẽ. Marsã tɛka, a Daviid soolem tek a na-tẽngẽ.» A Israyɛl leba a tẽnsẽ.

¹⁷ A Roboam dɩɩ naam tẽns niyns sẽn da be a Zɩɩda tẽn-peelmẽ bala.

¹⁸ A Roboam tʋma a Adoram, yẽ n da get a tʋʋma. A tʋm-a lame t'a kẽng tɩ b le tɩ maneg n yẽse, la b lob-a-la ne kug n kʋ. A Roboam kong n kẽe a bilim-bilm n zoe n tees Zerizalɛɛm.

¹⁹ Yaa woto la a Zɩɩda ne a Israyɛl roog welg taaba n ta rũnna.