1 Zã 1 - SEBR SÕNGO

Sebra tʋɩɩsgo — Wẽnd Gomda wata ne Wẽnd sõsd-n-taare

¹ Yaa Gomd ning sẽn wata ne vɩɩma yell la d gʋlsd-y. Gomd kãng la sẽn dag n be-a al dũni sɩngrẽ, tõnd tʋbr wʋma b yelle, tɩ d nif yãend-ba, d paam n ges-b lame n tɩge, d nus sɩɩs-b lame,

² — Vɩɩma sɩd pukame, tɩ d yãend-a la d kõt kaseto; Vɩɩm kãng ka be sɛɛb ye, tɩ d wat n na n wilg-a yãmba, a ra sɩng n bee ne Ba n yaool n wa lik a meng tõndo —

³ d sẽn yãend la d sẽn wʋme la d wilgd yãmba, tɩ yãmb me wa lagem ne tõndo. Tõnd sẽn lagem ne b rãmbã, yaa Wẽnnaam Ba la b Biig a Zezi Krista.

⁴ Yaa rẽ la d gʋlsd-y tɩ y sũ-nooga pid zãnga.

D kẽn vẽenemẽ

⁵ Ad-d sẽn wʋm b nengẽ n wat n na n wilg yã: Wẽnd yaa vẽenem, lik ka be b nengẽ ye.

⁶ Tõnd sã n kẽnd likẽ, n yaool n yet tɩ d lagma ne bãmba, d yagda zirẽ, d pa togsd sɩd ye.

⁷ La sã n yaa vẽenemẽ la tõnd kẽnda, b meng sẽn be vẽenemẽ wã, bãmb n lagemd tõnd ne taaba, la b Biiga Zezi zɩɩma n pekd tõnd yel-wẽnd buud fãa.

D zãag d meng ne yel-wẽnde

⁸ Tõnd sã n yeele: «D ka tar yel-wẽnd ye», d belgda d mense, sɩd ka be d pʋgẽ ye.

⁹ Tõnd sã n wilg d yel-wẽna, bãmb sẽn pidsd b kãabgo la b ya zemsg soaba, bãmb na n kõo d yel-wẽna sugri la b pek-do ne rẽgd buud fãa.

¹⁰ Tõnd sã n yeele: «D ka tar yel-wẽnd ye», tõnd kɩtdame tɩ b lebg zirẽ-be-neda la b Gomda ka na n pa ne d ye.